“Era Muri Ira na Parofita na Parofita,” Me iSakisaki ni iTabagone, Sepi. 2022.
Vakavakarau ki na Koniferedi Raraba
Era Muri Ira na Parofita na Parofita
Na tamata kecega e rawa ni kunea na veivakalougatataki ena nona muria na parofita—o ira sara mada ga na iApositolo.
Eda sa kerei tikoga ena veigauna me da muria na parofita. Ia eso era na vakataroga beka na vuna sa rui bibi kina me muri na domo ni parofita.
Ena koniferedi raraba ni Epereli 2017, a kerea kina o Peresitedi Thomas S. Monson, na parofita, vei ira na lewe ni Lotu me ra vulica, sega walega ni wilika, na iVola i Momani ena veisiga. O Peresitedi Russell M. Nelson kei Peresitedi Henry B. Eyring e rau a muria ruarua na ivakasala ni parofita ka rau wasea na ka a yaco.
Dua na iApositolo Talairawarawa
E kaya o Peresitedi Nelson: “Au tovolea meu muria na ivakasala nei [Peresitedi Monson]. Ena loma ni veika eso, au tuva na veika me baleta na iVola i Momani e, cava e vakadeitaka, cava e saqata, cava e vakataucokotaka, cava e vakamatatataka, kei na cava e vakatakila. Na raici ni iVola i Momani ena ivakarau ni rai eso oya esa dua na cakacaka vakavotukana ka veivakauqeti!”1
A tomana o Peresitedi Nelson ka vakamacalataka ni a taroga vei ira tale eso na mataqali taro vata ga oya ka raica ni sa tara e vuqa sara na bula na kena muri na ivakasala nei Peresitedi Monson. Na Turaga e dusimaki keda kece mai vua na noda parofita, na ivolanikalou, kei na ivakatakila ki na tamata yadua.
Dua na iApositolo Yalodina
A vakaraitaka Peresitedi Eyring:, “Au dau wilika na iVola i Momani e veisiga me sivia e 50 na yabaki. O koya au a rairai nanuma beka kina ni a vosa tiko o Peresitedi Monson vua tale e dua. Ia, me vaka e vuqa vei kemuni, au vakila ni nona veivakayaloqaqataki kei na nona yalayala na parofita e sureti au kina me‘u sasaga sara vakaukauwa.”
E tomana o Peresitedi Eyring: Na rogoci ni ivakasala nei Peresitedi Monson esa kauta mai kina vei au e rua tale na kena revurevu vakasakiti: iMatai, na Yalo a yalataka o koya sa vakatubura e dua na yalo ni nanamaki ki na veika vinaka e tu mai liu, ena gauna sara mada ga ni kena levu cake tiko mai na tiko yavavala e vuravura. Kei na, ikarua, sa solia vei au na Turaga—ka vakakina vei iko—me da vakila vakalevu cake na Nona loloma me baleti ira era sotava tu na leqa.”2
Na tamata yadua
Na tamata taucoko e rawa ka dodonu me ra muria na ivakasala ni parofita mai na koniferedi raraba. Veitalia na vanua o tu kina ena nomu ilakolako vakayalo, e rawa nio vinaka cake tikoga, se o dua na iApositolo, dua na curuvou, se o tiko ena dua na vanua ena kedrau maliwa. E sega ni vakabuwawataka na noda gagadre me da ciqoma na ivakatakila ni tamata yadua; oya esa dua tale na sala e rawa ni vakalougatataki keda kina na Kalou. Kevaka sara mada ga e rawa nira kunea na iApositolo eso tale na ikuri ni veivakalougatataki vakaoqo, e rawa talega vei keda na kena vo.