“Tolu na Lesoni mai na Yabaki ni iTabagone i Josefa Simici,” Me iSakisaki ni iTabagone, Sepi. 2023.

Tolu na Lesoni mai na Yabaki ni iTabagone nei Josefa Simici

Mai vei Matthew C. Godfrey

Tabacakacaka ni Tukutuku Makawa ni Lotu

Raica na veika o rawa ni vulica mai na veika a sotava na Parofita ena 200 na yabaki sa oti.

iVakatakilakila

cauravou

O sa bau vakila mada ni vaka e dredre me da semati vei ira ena gauna sa oti? Era a bula ena dua na gauna balavu sa oti—e rawa dina ni ra vakavulica vei iko e dua na ka me baleta na nomu bula? Io! O Josefa Simici e a dua na ivakaraitaki cecere. Ena gauna e yabaki 18 kina, sa vulica kina o koya e vica na ka me baleta na saumi ni masu kei na nona veiwekani kei na Tamana Vakalomalagi. Na veilesoni oqori e rawa ni vukei iko nikua.

Lesoni #1: Eso na gauna e dau taura na gauna me saumi na taro.

Na isau ni masu e sega ni dau yaco totolo mai. E sega ni rawarawa na wawa—vakabibi ni sa rawa ni saumi vakatotolo sara ena initaneti na taro kece sara.

Kevaka o nanuma ni sa dua na gauna balavu e taura tiko na Kalou me sauma mai kina na nomu taro, e sega ni o iko duadua ga. Ni sa yabaki 12 o Josefa Simici sa tekivu me vakasamataka “na kauwai bibi taucoko me baleta na tiko vinaka ni [nona] bula tawamate rawa.”¹ A vakasamataka tiko na taro me baleta na nona bula kilikili kei na caka ca ni vuravura ena rua na loma ni yabaki ka tarava. E taura e rua na yabaki ni vakasama vakatitobu, vulici ni ivolanikalou, kei na cakacakataki ni veitaro oqori ni bera ni rau qai rairai mai vei koya na Kalou kei Jisu Karisito ena Loma ni Veikau Tabu.

E vakakina vei keda. Ni tiko e dua na noda taro, ena rawa ni taura e vica na siga, vula, se vakayabaki sara mada ga ni bera ni da qai ciqoma e dua na kena isau. Sa daumaka o ya. Na cakacaka eda cakava ni da wawa toka e sa ka bibi. Nanuma na ka a vakatavulica o Elder Jeffrey R. Holland ena Kuoramu ni iApositolo Le Tinikarua: “Me na vakabulabulataki na sorenikau ka dodonu me da waraka me matua.”²

iVakatakilakila

Wilika tiko o Josefa Simici na ivola i Jemesa

Lesoni #2: E kilai keda na Kalou ena yacada.

Ni se bera ni yabaki 18, a sikovi Josefa na Kalou na Tamada, o Jisu Karisito, kei na agilosi o Moronai. Sa uasivi saraga oya. Era kila taucoko na yacai Josefa o ira na kabula vakalou oqo. Era kilai koya vakatamata!

Na Kalou e kilai iko vakavinaka. O iko na Luvena ka kila o Koya na yacamu. A vakavuvulitaka na Kalou na veika dina oqo me baleta na Nona ibulibuli, “ Raica au sa kilai ira kecega, ni ra sa noqu” (Mosese 1:35

E dua na vuna a yalonuidei kina o Josefa me cakava na veika a kerei me cakava oya ni sa kila vinaka tu ni o koya e dua na luve ni Kalou, ka sa kilai koya vakavinaka tu.

iVakatakilakila

Josefa Simici ena Veikau Tabu

Lesoni #3: Ni da sa veivutuni, eda sa dolavi keda me da sotava na veika vakayalo.

E dua vei ira na inaki bibi i Josefa ena nona gole ki na Veikau Tabu sa ikoya me lako iveivutunitaka kina na nona ivalavala ca. Oqori na vuna vata ga a masu kina ena bogi a rairai kina vua na agilosi o Moronai: “me vosoti na [nona] ivalavala ca kei na yalowai” (Josefa Simici—Ai Tukutuku 1:29). Oqo e vakavulica vei keda e rua na ka:

iMatai, kevaka eda sa caka cala, e sega ni dodonu me da nanuma ni da sa sega ni kilikili me da masu. A vakayacora o Josefa na “ivalavala ca kei na yalowai,” ia e kila tu ga ni rawa ni masu ka rawata na veivosoti.

iKarua, ni da sa veivutuni, eda rawa ni vakila vakaukauwa cake sara na Yalo. Me vaka e vakamacalataka o Elder Jörg Klebingat ena Vitusagavulu, “Ena levu cake na nuidei vakayalo ni o veivutunitaka ena reki na ivalavala ca.”³

Sa vakavuvulitaka o Peresitedi Russell M. Nelson ni veivutuni ena vukei keda me da vakataka cake na iVakabula. Ni da sa veivutuni, eda sa dolava kina na katuba kei lomalagi. Eda sa digitaka me da tubu vakayalo ka ciqoma na reki—na reki ni noda vueti mai Vua.⁴

Ia kevaka o gadreva mo veivutunitaka e dua na ka, cakava sara! Ena sega walega ni kauta mai vei iko na vakacegu ka vukei iko mo vakataka cake na iVakabula, ia ena vukei iko talega mo vakila vakaukauwa cake na Yalo ka rawata kina na isau ni masu.

E dina ni a bula ena dua na gauna balavu sa oti o Josefa Simici, ia na lesoni a vulica ni se yabaki tini vakacaca e rawa ni vukei iko tikoga nikua. E dua tale na vuna me da vakavinavinakataka kina na Parofita o Josefa Simici.