Na Taro kei na Kena iSau

“Na cava meu na cakava kevaka au vakila niu sega ni sotava tiko na veika vakayalo?”

“Masu ena yaca i Jisu Karisito me baleta na nomu kauwai, na nomu taqaya, na nomu malumalumu—io, mai na gagano sara ga ni lomamu. Ka qai vakarorogo! … Nio tokaruataka na iwalewale oqo … , o na ‘tubu ena ivakavuvuli ni ivakatakila.’”

Peresitedi Russell M. Nelson, “Na iVakatakila ki na Lotu, Na iVakatakila ki na Noda Bula,” koniferedi raraba Epe. 2018 (Ensign se Liaona, Me 2018, 96.

Vakasamataka Vakatitobu, Vola, ka Vakasamataka

“Ena icavacava ni siga, au dau taura na gauna meu vakasamataka kina vakatitobu ka vola ena noqu ivolaniveisiga na veika vakayalo au a sotava ena siga oya ka vakasamataki ira. Ena veigauna taucoko au cakava kina oqo, au vakila na vakacegu. E vakananuma talega vei au meu dau vakasaqara na sotavi ni veika vakayalo e veisiga.”

Kianna G., 16, Zamboanga del Norte, Filipaini

Kerea vua na Kalou

“Na wiliki tikoga ni nomuni ivolanikalou kei na masumasu ena veisiga esa dua na sala cecere mo vakaraitaka kina vua na Kalou ni ko vinakata mo sotava na veika vakayalo. Kevaka o vakila nio sega ni sotava tiko na veika vakayalo, qai kerea ena yalodina na Kalou me vukei iko mo vakila. E lomani iko o Koya ka na sauma na nomu masu ni ko vakasaqara mo cakava na nomu itavi.”

Elijah C., 18, Utah, Amerika

Mo Dauvosota

“Mo dauvosota. Na veika o sotava ena sega ni dau vakataka na nodra na tani’.”

Isabella F., 17, São Paulo, Brazil

Bulataka na Kosipeli.

“Eda na rawata na veika vakayalo ena noda wilika na ivolanikalou, rogoca na vosa ni parofita, lolo, masu, lako ki na valetabu, ka qaravi ira na tani. Na veika oqo ena vukei keda me da toro voleka vei Karisito ka ciqoma vakalevu cake na veivakauqeti ni Yalo Tabu ka na kauta mai vei keda na vakacegu.”

Nellie R., 16, Hidalgo, Mexico

Vakarorogo Matua.

“Meda dau nanuma tiko me da vakarorogo matua kina veivakauqeti ni Yalo Tabu. E rawa nida rawata mai na veika lalai sara. E dina ga ni ra ka lalai, e rawa ni ra voqa tiko me yacova yani na tawamudu.”

Melissa A., 14, Paraíba, Brazil

Na vei sau ni taro sa kena inaki me veivuke ka veivakararamataki, ka sega ni ivakaro vakadonui ni ivunau ni Lotu.

Se Cava na Nomu Nanuma?

“Meu na ‘vakacilava tiko vakacava na noqu rarama’ ke‘u sega ni tamata dau mamadua?”

Vakauta mai na nomu isaunitaro kei na itaba ni bera na ika 15 ni Epereli, 2023.

Imeli mai e na [e-mail]. Se gole kina ftsoy.ChurchofJesusChrist.org ka tabaka na “Submit Your Work.” Curu e na nomu Akaude ni Lotu ka digitaka na “For the Strength of Youth” e na ruku ni “Choose Magazine.” Tabaka na “Add File” mo digitaka na nomu faile kei na itaba, ka qai tabaka na “Submit” mo vakavodoka ka vakauta mai na nomu faile.

E na rawa ni veisautaki na nomu itukutuku me baleta na kena balavu se kena matata.