“Ni Sotava Tiko e Dua na Daulomani na Dredre Bula ni Vakasama,” Me iSakisaki ni iTabagone, Sepi. 2023.
Veivuke ni Bula
Ni Sotava Tiko e Dua na Daulomani na Dredre ni Bula ni Vakasama
Oqo e lima na vakasama mo nanuma tiko ni ko via vukea e dua e vakaleqai tu mai na lomaocaoca, nuiqawaqawa, se bolebole tale eso ni vakasama.
Droini mai vei Toby Newsome
E rawa ni dredre me da raica tiko e dua na itokani se lewe ni matavuvale ni sotava tiko na lomaocaoca, nuiqawaqawa, se so tale na bolebole ni bula ni vakasama. O na vinakata beka mo cakava e dua na ka mo veivuke kina ia o sega ni vakadeitaka se cava.
Oqo eso na vakasama mo nanuma tiko ni ko vakasamataka na sala mo vukea kina e dua e vakaleqai tiko na nona bula ni vakasama:
1. Dodoliga yani.
Kevaka o lomatarotarotaka tiko se vinaka me da dolele yani se me da kakua, na isau ni taro oqo: dolele yani vakaidina. Na veimaliwai voleka ena vukei ira dina na tamata me ra sotava na nodra dredre ni bula ni vakasama. Veitalanoa kei ira. Sema vei ira. E rawa saraga ni dua na ka e rawarawa ka matau, ia mo dodoliga yani.
2. Kakua ni soli ivakasala vakavo ga ke ra kerei iko.
Kevaka e dua e sega ni kerea na nomu veivuke, kakua ni solia vei ira na ivakasala. Me yacova ni o sa kerei, vakanamata mo veitokoni, veikauwaitaki, ka dina.
3. Mo yalomalua, mo ivakaraitaki ni veika vinaka, ka yalololoma.
Ni dua na tamata e kerea na nomu veivuke, muria na ivakaraitaki ni iVakabula. Masu vua na Tamada Vakalomalagi me baleta na veidusimaki. Mo veilaveti. Vosa vakamalua vei ira. Cavuta na veika vinaka. Vakaraitaka na veiciqomi kei na yalololoma. Me ra kila ni o tokoni ira ka o na tiko e yasadra. Vakayaloqaqataki ira vakamalua me ra vakasaqara na veivuke mai vei ira na kenadau.
4. Mo yalo vosota ka sasaga tikoga
O ira era sotava tiko na dredre era na sega beka ni dau malele mai vakatabakidua se me ra dau vakavinavinaka ena so na gauna. Ia mo dauvosota. Dau kabiti ira tikoga. Na tiko taudua e sega ni vinaka vei ira. Kakua ni vakasuka vakadua kevaka era sega ni kidava mai na nomu veitokoni ena ivakarau o vinakata.
5. Qarauni iko talega.
Vakadeitaka ni ko sa kunea tiko na reki ena nomu bula. Tomana tiko na nomu masu kei na vuli ivolanikalou. Dau gole ki na valetabu. Cakava eso tale na ka o dau taleitaka. Kakua ni vakatara me vakadruka na nomu bula na lomaocaoca se lomaleqataka na ituvaki ni nomu daulomani. Dolele yani vei ira na tani mo tokoni kevaka o gadreva.