“Au Rawa ni Tikoga ena Loma ni Laini,” Me iSakisaki ni iTabagone, Sepi. 2023.

Au sa Rawata Na Ka Kecega e na Vuku i Karisito

E ra wasea na itabagone na sala sa vakaqaqacotaki ira kina na Karisito me ra vakayacora na veika dredre (raica na Filipai 4:13).

Au Rawa ni Tiko Ga ena Loma ni Laini

iVakatakilakila

cici tiko e dua na goneyalewa ena dua na sotasota ni veitaucici

Me vakatekivu mai na gauna au tekivu veitaucici kina, sa dau noqu tatadra tu me‘u na voroka na isausau ni koronivuli ena cici dua na maile. Me yacova mai na icavacava ni gauna ni veitaucici oqo au a ciciva rawa na dua na maile ena lima vinaka na miniti, ka‘u a voroka kina na isausau ena sivia na tolu na sekodi.

Ena siga ka tarava, keitou qai kila ni sega ni vakawili na noqu cici dua na maile. Era a vakamacalataka na vakailesilesi ni‘u a kalawa vakatolu ena taudaku ni laini, o koya sa sega kina ni vakabau na noqu cici. A veibataka na noqu dauniveivakatavulici ni‘u a butu ga i tuba baleta ni a biligi au e dua tale na daucici. E kaya o koya na vakailesilesi, “Ena sega beka ni nona cala ni a biliraki tani, ia na nona cala ni sa rui voleka sara ki na laini.” Au a gole tani mai kea ka‘u vakila ni cala na kena kautani mai vei au na veika au a bunotaka.

Ena Sigatabu ka tarava ena kalasi ni Goneyalewa, keimami sarava kina e dua na vidio ka vakatauvatani kina na tiko ena loma ni noda laini ni qito ki na kena muri na ivunau.¹ Ena gauna taucoko ni lesoni au a dabe toka, ka cudruvaka tiko na veivakananumi ni‘u a sega ni rawata.

Ena siga ka tarava ni‘u cici wavokita tiko na laini ni cici, au rai sobu ka raica ni‘u sa ciciva sara tikoga na laini e loma. Ena so na gauna, au dau kalawa i loma, me vaka ga a kaya o koya na vakailesilesi. Ena gauna vata ga oya au a tu vakadua, ka yalomalumalumu mai. Au sa mai wele sara toka yani ena vanua au a ciciva toka ka‘u sa sega ni raica na leqa e rawa ni yaco.

E kalougata, ni a soli vei au e dua tale na madigi ena vica na macawa e muri. Au a vakayawaki au mai na laini e lomadonu ka‘u a voroka na isausau ni koronivuli, ena gauna oqo ni‘u tiko ga e loma.

Na ka au sotava oya a vakavuna me‘u vakasamataka na noqu sa rui cici volekata tiko na laini ena so na ivakaro. Ia ena vukui Jisu Karisito kei na Nona Veisorovaki, sa soli kina vei au e dua tale na madigi me‘u veivutuni.

Me baleta na ivakaro, sa dodonu me da vakayawaki keda mai na laini ka cakava na noda vinaka duadua me da tikoga e loma. Ia au vakavinavinaka ni gauna eda caka cala kina, sa vakatara na iVakabula me da veivutuni ka tovolea tale.

Raygan P., Utah, Amerika