“Ikaw ug ang Manluluwas batok sa Kalibotan,” Alang sa Kalig-on sa mga Kabatan-onan, Mar 2024.
Kalig-on sa Pagbuntog sa Kalibotan
Ikaw ug ang Manluluwas batok sa Kalibotan
Mga makabalda, mga tentasyon, pagpanglutos—si Jesukristo mibuntog sa mga butang niini nga kalibotan ug makalig-on kaninyo aron makabuntog usab niini.
Paghulagway pinaagi ni Alex Nabaum
Si Jesukristo mibuntog sa kalibotan, ug Siya nagdapit kanato sa pagbuhat sa ingon. Apan unsa man “ang kalibotan,” ug unsa man para kanato ang gipasabot sa pagbuntog niini?
Si Presidente Russell M. Nelson mipasabot niini nga paagi: “[Ang pagbuntog sa kalibotan] nagpasabot sa pagbuntog sa tentasyon sa labaw nga pag-atiman sa mga butang niini nga kalibotan kay sa mga butang sa Dios.”1
Ang “mga butang niini nga kalibotan” mahimong maglakip sa mga kabtangan, kabantogan, gahom, pagdayeg, paglingaw-lingaw, o bisan unsa nga butang nga matagamtam sa natural nga tawo isip kabahin sa mortalidad. Bisan kon ang pipila niini nga mga butang dili kanunay nga daotan, kon kita mawad-an sa atong pagtutok sa Dios tungod kay kita mas nagpakabana mahitungod sa kalibotanon nga mga butang, modangat kita sa tagdugay nga problema.
Si Jesukristo mitudlo nga kita mag-atubang og oposisyon ug pagpanglutos samtang kita mobuntog sa kalibotan (tan-awa sa Juan 15:18–21). Apan makakaplag gihapon kita og kalinaw ug “[m]agmadasigon” tungod kay Siya una nga mibuntog sa kalibotan (Juan 16:33).
Kini nga kabatan-onan nakakaplag og kalig-on diha ni Jesukristo sa pagbuntog sa kalibotanon nga mga babag, ug mao nga kamo usab!
Kalibotanon nga mga Makabalda
Migahin ko og daghang oras matag adlaw sulod sa daghang katuigan sa pagdula og kompyuter. Nakakaplag ko og mga higala , ug mibati ako nga importante. Apan human magdula, mobati ko nga haw-ang, ingon og adunay butang nga kulang. Dili ko hingpit nga malipayon.
Gusto ko nga motutok sa mga butang nga tinuoray nga makapalipay kanako ug motabang kanako nga molambo. Misugod ko sa pag-ampo kanunay. Sa dihang gipahayag nako ang unsay anaa sa akong kasingkasing ngadto sa Langitnong Amahan, mibati ko og kusog nga pagbati sa gugma.
Gusto ko nga mobuhat sa mga butang nga mopadayon kanako nga mahimong mas duol kang Kristo, mao nga mitutok ako sa yano nga mga butang sama sa inadlaw nga pagtuon sa kasulatan ug pag-ampo, paggahin og panahon uban sa mga tawo nga adunay pakig-uban sa Espiritu, ug pagpaningkamot nga dili mabalda sa mga butang nga makapabiya sa Espiritu Santo. Ang akong kinabuhi nausab. Nahimo kining mas malipayon alang kanako.
Dihang mas nagpaduol ako kang Kristo, nasayod ako nga adunay mas importante nga mga butang kaysa mga dula sa kompyuter kon gusto ko nga mahimong tinuod nga malipayon. Adunay mga butang nga walay kataposan.
Alina U., 18, Lithuania
Kalibotanon nga mga Kahimtang
Sa eskwelahan, gidaogdaog ug gibugalbugalan ko tungod sa akong mga gituohan. Tungod niana ug sa ubang mga hagit, gibati nako nga ingon og nahugno ang kalibotan diri kanako. Apan ang akong inahan miawhag kanako sa pagsalig sa Pag-ula ni Jesukristo tungod kay Siya nakasabot sa akong kasakit ug makahatag kanako og kalinaw ug kahupayan (tan-awa sa Doktrina ug mga Pakigsaad 19:23).
Midesisyon ko nga mosaad sa Langitnong Amahan nga makanunayon akong magpuasa. Mihangyo ako Kaniya sa pagtabang kanako sa akong mga kahuyang ug mga panglimbasog, ug gibuhat Niya kini sukad niadto.
Ang pagpuasa nakapaduol kanako sa Langitnong Amahan ug kang Jesukristo. Nasayod ako nga Sila kanunay nga anaa sa akong kiliran, naghatag kanako og kalig-on sa pagbuntog sa akong mga hagit ug sa pagpangita og tinuod nga kalipay. Giayo ni Jesukristo ang akong mga samad ug gitabangan ko nga makabalik ngadto sa Langitnong Amahan.
Vera R., 17, Brasília, Brazil