“Gamita ang sa Iyang Kalig-on—Karon ug sa Kanunay,” Alang sa Kalig-on sa Kabatan-onan, Mar. 2024.
Kalig-on sa Tanang Panahon
Gamita ang Iyang Kalig-on—Karon ug sa Kanunay
Kamo takos sa kalig-on ug tabang ni Jesukristo.
Mga paghulagway pinaagi ni Alex Nabaum
Hunahunaa nga nagsuroy-suroy sa lasang ug nakahinagbo og usa ka batang lalaki nga nabitik ug nasum-ok ngadto sa mga patayng mga sanga. Usa sa mga sanga bug-at kaayo nga maglisod siya og bangon nga siya ra.
Motabang ka ba? O molingkod usa ka ug motino kon angayan ba siya sa imong tabang?
Siyempre motabang ka! Ang ideya sa pagpugong sa inyong tabang hangtod ang batang lalaki angayang tabangan lagmit salikwaot para nimo. Ug gani kita maghunahuna niining paagiha mahitungod sa atong kaugalingon—gawas lang, niining kahimtang, kita ang bata nga nanginahanglan.
Kamo Angayan sa Pagluwas
Bisan unsa pa ang inyong edad, ikaw usa ka anak kon itandi ngadto sa Langitnong Amahan ug ni Jesukristo. (Ikaw, sa pagkatinuod, tinuod nga anak sa Langitnong Amahan.) Ug ang imong kalig-on—pisikal, emosyonal, espirituwal, o mental—baliwala kompara ngadto sa Ilaha. Kadaghanan kanato makasabot og maayo niana nga konsepto. Apan kon kita masipyat sa bisan unsa nga rason, labing kasagaran kita mobati nga kita dili makapangayo og tabang hangtod nga kita mahimong angayan niini. Dili kana tinuod.
Si President Dieter F. Uchtdorf, nga kanhi–Ikaduhang Magtatambag sa Unang Kapangulohan, sa makausa naghisgot mahitungod sa sambingay sa nawala nga karnero Lucas 15.
“Kinahanglan ba nga masayran sa karnero unsaon sa paggamit og instrumento aron mahibaw-an ang iyang nahimutangan?” nangutana siya. “Kinahanglan ba kining mogamit og GPS aron mahibaw-an kon asa kini? Kinahanglan ba kini nga ekspertong mohimo og app aron makapanawag og tabang? Ang karnero nagkinahanglan ba og iladong tawo nga moendorso sa dili pa ang Maayong Magbalantay moluwas?
“Dili. Dili gayod! Ang karnero takos sa balaan nga pagluwas tungod lamang kay kini gihigugma sa Maayong Magbalantay.
“Alang kanako, ang sambingay sa nawala nga karnero mao ang usa sa labing malaumon nga mga tudling sa tanang kasulatan.”1
Matag usa kanato mahimong mahisalaag sa daghang lain-laing mga rason. Ug alang sa matag usa kanato, ang balaan nga tabang mahimong nagpangita na kanato.
Ang Tabang Kanunayng Anaa
Ang tabang anaa alang kanato dili lang kon kita makasala, apan usab kon kita nagpakabuhi sa labing maayo kutob sa atong mahimo. Si Elder David A. Bednar sa Korum sa Napulog Duha ka Apostoles nagtudlo:
“Naghunahuna ako kon napakyas ba kita sa pag-ila sa hingpit niining makapalig-ong aspeto sa Pag-ula diha sa atong mga kinabuhi ug sa sayop nagtuo nga kita kinahanglan gayod nga modala sa atong palas-anon nga mag-inusara—pinaagi sa determinasyon, lig-on nga kabubut-on, ug disiplina ug uban sa atong limitado nga mga kapasidad.
“Kinahanglang makaila kita nga si Jesukristo mianhi sa yuta aron mamatay alang kanato. Apan kita nagkinahanglan usab nga mopasalamat nga ang Ginoo nagtinguha, pinaagi sa Iyang Pag-ula ug pinaagi sa gahom sa Espiritu Santo sa pagpabuhi kanato—dili lamang sa paggiya apan sa paglig-on ug pag-ayo usab kanato.”2
Kamo takos sa Iyang tabang! Bisan unsa pa ang dalan nga inyong gisubay sa kasamtangan, si Jesukristo nag-andam sa pag-unong kaninyo sa sunod nga latasonon.