“Kon ang Kasub-anan Mohasmag,” Alang sa Kalig-on sa mga Kabatan-onan, Mar. 2024.
Kalig-on sa mga Panahon sa Kasub-anan
Kon ang Kasub-anan Mohasmag
Kon ang kinabuhi nakahimo kaninyo nga mobati og kaguol, si Jesukristo makabayaw kaninyo uban sa paglaom.
Paghulagway pinaagi ni Dean MacAdam
Mahimong layo ang inyong maabtan sa kinabuhi pinaagi sa pagkugi ug determinasyon. Mahimo kamo nga matulog og sayo, momata og sayo (tan-awa sa Doktrina ug mga Pakigsaad 88:124), ug mopuno sa matag adlaw sa matarong nga mga pamatasan ug disiplina sa kaugalingon.
Apan gihapon, ang uban nga mga adlaw mahimong mas lisod kay sa uban.
Ug unya adunay uban nga piho nga mga adlaw … mura ba’g, hilabihan kini ka lisod nga lagmit magsugod mo sa paghunahuna nga nawala na sa kahangtoran ang maayo nga mga adlaw.
Unsa man ang inyong buhaton niadto nga mga adlaw? Unsa ang inyong buhaton kon ang inyong labing maayong mga paningkamot, lakip ang inyong labing maayong mga pagpaningkamot sa pagpakabuhi og matarong nga kinabuhi (pag-ampo, pagpuasa, pagtuon sa kasulatan, pagtambong sa simbahan ug templo, ug uban pa.), ingon og dili igo? Kon nakigbisog ka sa pagpadayon batok sa pagkawalay paglaom, apan kini ingon og mobalos sa pagduso og mas kusog pa?
Modangop ka ni Jesukristo, siyempre. Ang paglaom usa ka espirituwal nga gasa (tan-awa sa Moroni 8:26). Ang tanan nga espirituwal nga gasa naggikan ni Jesukristo (tan-awa sa Moroni 10:17).
Kon ang mga kalisdanan sa kinabuhi modat-og diha kaninyo daw usa ka bukid nga gihagbong gikan sa langit, ang espirituwal nga gasa sa paglaom mahimong mainyoha kon kamo mas motutok diha kang Jesukristo.
“Ang Ginoo Mipagaan sa Akong Palas-anon”
Ang kinabuhi mahagiton na alang sa daghang Taga-Venezuela sa wala pa damhang mitumaw ang COVID-19 nga pandemya niadtong 2020, apan bisan lang ang nag-unang pagpatunhay sa kinabuhi nahimong lisod. Alang sa 11 anyos nga si Sebastian ug ang iyang pamilya, ang kalig-on nga gikan ni Jesukristo gikinahanglan aron magpabilin nga madasigon ug malipayon atol sa mga panahon sa kasubo. “Maguol ko kon dili mi makapalit og mga mahinungdanon nga mga palaliton sama sa pagkaon, sinina, ug tambal,” miingon si Sebastian. “Apan ako adunay hugot nga pagtuo nga ang Ginoo mopadayon sa pagpanalangin kanamo. Gibati nako nga napanalanginan tungod kay ako nakadawat sa akong patriyarkal nga panalangin. Nagsulti kini kanako sa mga butang nga gisaad ngari kanako sa wala pa ako mianhi sa yuta.”
Ang pagtutok diha ni Jesukristo isip kabahin sa tema sa kabatan-onan sa miagi nga tuig (“May kalig-on ako sa pagsagubang sa tanan tungod sa gahom nga gihatag kanako ni Kristo.” [Mga Taga-Filipos 4:13]) namatud-an nga usa ka dakong tabang. “Tungod sa mga kalisdanan nga gisagubang sa akong nasod, ang tema sa kabatan-onan gikan sa miagi nga tuig nagpahinumdom kanako nga si Kristo motabang kanako nga makabuntog ug makabuhat sa tanang butang pinaagi Kaniya,” Sebastian says.
Lisod kini nga kaagi, apan si Sebastian ug ang iyang pamilya nakakita sa mga panalangin ug paglaom sa pagpadayon. “Ang Ginoo mipagaan sa akong mga palas-anon,” miingon siya. “Kon ako maguol, ako mag-ampo, magtuon sa mga kasulatan, ug mobasa sa akong patriyarkal nga panalangin. Salamat ngadto Kaniya, ang stationery nga negosyo sa pamilya nga among gisugdan tulo na katuig ang milabay nakabaton og dugang kalamposan karong tuiga. Gusto kong mosulti sa uban nga mga batan-ong katawhan nga sila kinahanglan kanunayng andam nga mosalig ni Jesukristo. Kon ako mobuhat niana, ako makabuntog sa akong mga hagit.”
Kalig-on pinaagi sa Mas Maayo nga Pagtutok
Si propeta Nephi, kinsa milahutay og grabeng kalisdanan sa tibuok niyang kinabuhi, nagtudlo niining matahom nga kamatuoran:
“Kinahanglan gayud mopadayon sa unahan uban ang pagkamakanunayon kang Kristo, magbaton sa usa ka hingpit nga kahayag sa paglaom, ug usa ka gugma sa Dios ug sa tanan nga mga tawo. Busa, kon kamo mopadayon sa unahan, magbusog sa pulong ni Kristo, ug molahutay hangtod sa kataposan, tan-awa, sa ingon miingon ang Amahan: Kamo makabaton ug kinabuhi nga dayon.” (2 Nephi 31:20).
Ang paglaom, usa ka gamhanan nga tinubdan sa kalig-on batok sa kasub-anan, nga moabot samtang kita nakatutok kang Jesukristo. Panahon na ba nga ibaling ang inyong pagtagad ngadto Kaniya og dugang pa?