“12 ka mga Kasulatan alang sa Higayon nga Kamo Mobati nga …,” Alang sa Kalig-on sa mga Kabatan-onan, Mar. 2024, pahina–pahina.
Kalig-on Gikan sa mga Kasulatan
12 ka Kasulatan alang sa Higayon nga kamo mobati nga …
Ang mga kasulatan puno sa pagdasig, dili igsapayan kon unsa ang inyong gibati.
Mga paghulagway pinaagi ni Toby Newsome
Pipila ka tuig ang milabay, si Elisabeth A., 17, gikan sa Arizona, USA, misugod sa pagbati og kabalaka, ug kini nag-anam ka grabe. “Nabati nako kini sa tibuok adlaw, matag adlaw,” miingon siya. “Lisod para nako ang paglahutay nianang adlawa.”
Sa pagpangita og kahupay, si Elisabeth midesisyon sa pagbasa sa mga kasulatan matag gabii. Paglabay sa panahon, misugod siya sa pagbati nga mas malipayon.
“Ako nasayod nga wala ko nag-inusara,” miingon siya. “Ako nasayod nga ang Dios nahigugma nako ug mipadala sa Iyang Anak, nga si Jesukristo, kinsa mibati sa atong kasakit, kahiubos sa kasingkasing, kaguol, ug kawalay paglaom. Pinaagi sa mga kasulatan, nakaangkon ko og usa ka lig-on nga relasyon uban ni Kristo ug ang ingon usa ka positibo nga panglantaw sa kinabuhi!”
Si Elisabeth nakakat-on nga ang mga kasulatan puno sa mga bersikulo ug mga istorya kon sa unsang paagi ang paglaom, kalinaw, ug kalig-on makit-an diha kang Jesukristo. Daghan sa atong paborito nga bayani sa kasulatan nagsagubang og mga lisod nga mga kahimtang. Ug sa matag kahimtang, sila nakakaplag og paglaom, kalinaw, ug kalig-on dihang sila midangop ngadto ni Jesukristo.
Ang pagbasa sa mga kasulatan mahimong dili makasulbad sa unsay inyong giagian, apan ang mga kamatuoran nga gitudlo diha sa mga kasulatan makahatag kaninyo og kalig-on ug kahupayan. Ania ang pipila ka mga kasulatan nga inyong mapangita kon kamo nagkinahanglan og pangdasig sa hunahuna alang sa inyong kaugalingon o sa usa ka higala. Makapangita ba kamo og pipila sa inyong kaugalingon?
Alang sa higayon nga kamo mobati nga …
Naguol: Doktrina ug mga Pakigsaad 68:6
Busa, paglipay, ug ayaw kahadlok, kay Ako ang Ginoo anaa uban kaninyo, ug mobarug diha kaninyo.
Dili Igo: Lucas 12:6–7
Apan bisan ang lugas sa mga buhok sa inyong buhok tanan giihap. Ayaw kahadlok: kay kamo labaw pa og bili kay sa daghang gagmayng mga langgam.
Naulaw: Isaias 54:8
Uban ang gugmang walay paglubad, kaluy-an ko ikaw.
Nasagmuyo: Alma 26:27
Antosa uban sa pailob ang inyong mga kasakit, ug Ako mohatag nganha kaninyo sa kalamposan.
Walay Paglaom: Moroni 7:41
Kamo magbaton og paglaom pinaagi sa pag-ula ni Kristo ug sa gahom sa iyang pagkabanhaw.
Huyang: Ether 12:27
Kay kon sila magpaubos sa ilang mga kaugalingon sa akong atubangan, ug magbaton og hugot nga pagtuo ngari kanako, niana Ako mohimo sa mahuyang nga mga butang nga mahimo nga malig-on ngadto kanila.
Nerbiyos: Doktrina ug mga Pakigsaad 84:88
Ako anaa sa inyong tuo nga kamot ug sa inyong walà, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libot kaninyo, aron sa pagtabang kaninyo.
Gisakitan: Mga Salmo 30:2
Nagpakitabang ako kanimo, O Ginoo nga akong Dios, ug imo akong giayo.
Nahadlok: Josue 1:9
Ayaw kahadlok o kaluya tungod … kay ako, ang Ginoo nga imong Dios, mag-uban kanimo bisan asa ka.
Nag-inusara: Juan 14:18
Dili ko kamo pagabiyaan nga daw mga ilo: ako mobalik ra kaninyo.
Nasuko: Moroni 7:48
Mag-ampo ngadto sa Amahan uban sa tibuok kusog sa kasingkasing, nga kita unta mapuno niini nga gugma.
Nawad-an og pasensiya: Doktrina ug mga Pakigsaad 100:15
Busa, himoa ang inyong mga kasingkasing nga mahupay; kay ang tanan nga mga butang molihok alang sa ilang kaayohan nga naglakaw sa katarong.