“Nganong Nagkinahanglan Ko ni Jesukristo,” Alang sa Kalig-on sa mga Kabatan-onan, Mar. 2024.

Kalig-on diha sa Inyong Relasyon ngadto Kaniya

Nganong Nagkinahanglan Ko ni Jesukristo

Ni Tracy Y. Browning

Ikaduhang Magtatambag sa Kinatibuk-ang Kapangulohan sa Primary

Mahinungdanon ang pagsabot sa atong relasyon sa Manluluwas.

Si Jesukristo nga nag-ayo sa usa ka tawo

“Nganong nagkinahanglan man ko ni Jesukristo?” Kini usa ka mahinungdanon nga pangutana nga ipangutana sa imong kaugalingon—dili ang hiniusang “tanan” o ang “kita” sa inyong pamilya. Apan, sa pagkatinuod, “ako.” Unsa ang akong tubag ngadto niana nga pangutana?

Ang tubag nga akong nakaplagan alang sa akong kaugalingon miabot pinaagi sa personal nga mga buhat sa hugot nga pagtuo, inadlaw nga pagpaningkamot sa pagsunod sa akong mga pakigsaad, lakip sa akong pakigsaad sa bunyag; ug pagkat-on sa pagpaminaw sa tingog sa Ginoo pinaagi sa Iyang Espiritu. Ug labing importante, kini misentro sa akong relasyon sa akong Manluluwas.

Usa ka Relasyon ngadto sa Manluluwas

Masaligon akong makalista sa mga rason nga akong gikinahanglan ang akong mga ginikanan o akong labing suod nga mga higala. Makanunayon nakong giamuma kadto nga mga relasyon. Ang ilang bili sa akong kinabuhi ingon ka tinuod ug mahikap sama sa panahon ug paningkamot nga akong gigahin sa pagkahimong suod ngadto kanila pinaagi sa yano nga mga butang sama sa makanunayon nga mga panag-istoryahanay, pag-ila-ila kanila, ug pagtugot sa ilang matarong nga kaalam sa pag-impluwensiya sa akong kinabuhi.

Ang atong relasyon ngadto ni Jesukristo mahimong mosunod og susama nga sundanan. Ang pag-ampo kada adlaw ngadto sa Langitnong Amahan pinaagi sa ngalan ni Jesukristo gikinahanglan. Mao usab ang pag-ila-ila sa Manluluwas pinaagi sa pagsiksik sa mga kasulatan, pagbasa sa mga pulong sa mga propeta ug apostoles, ug pagpaminaw sa Espiritu. Akong mapalawman kana nga relasyon samtang tugotan nako ang tanan nga akong nakat-onan sa pag-impluwensiya sa akong kinabuhi ug sa akong kinaiya.

Hunahunaa usab ang plano sa kaluwasan. Kana nga ulohan, “plano sa kaluwasan,” nagpasabot nga ikaw ug ako—tanang tawo—nagkinahanglan og pagluwas ug nga ang kaluwasan kabahin sa desinyo alang niini nga kinabuhi. Nagkinahanglan kita og tabang ug dili kita makaluwas sa atong kaugalingon.

Apan ang Dios mipadala kanato sa yuta uban sa usa ka walay kataposan nga saad nga Siya mohatag og usa ka Manluluwas, si Jesukristo, kinsa mobuntog sa mga babag nga nagbulag kanato gikan sa presensiya sa Dios.¹ Ug kon kita mohimo og usa ka pakigsaad sa Dios, Siya nagsaad nga buhaton ang tanan nga Iyang mahimo, nga dili kuhaon ang atong abilidad nga mopili, aron sa pagtabang kanato sa paghupot sa atong sagrado nga mga saad ngadto Kaniya.²

Gikinahanglan Nakong Masayod nga Siya Nakasabot

Nabunyagan ko sa dihang 16 anyos ko ug nagpuyo sa Dakbayan sa New York. Sa sinugdanan gibati nako nga naggahin ko og daghang panahon sa pagbalanse tali sa akong bag-ong nakaplagan nga pagtuo, uban sa pakigsaad nga relasyon sa Dios niini, ug sa akong mga relasyon sa mga higala.

Nabalaka ko nga wala kaayoy mga higala sa eskwelahan nga akong masuod. Apan ang akong mga higala naanad sa pagbuhat sa mga butang nga akong naamgohan nga makadaot sa akong espiritu ug wala nahiuyon sa akong pagdala sa akong kaugalingon sa ngalan ni Jesukristo. Nasayod ko nga gusto ni Jesukristo nga mohimo ko og mas maayo nga mga pagpili.

Unsay wala nako masayri mao nga kon ang Manluluwas nakasabot ba nga nagkasupak ang akong mga gibati. Nahimong mas lisod ang matag adlaw samtang gidapit ko sa pagbuhat sa mga butang nga nasayod ko nga dili maayo. Usahay nangatorangan ko nga kini dili makadaot, apan nasayod ko nga akong gikompromiso ang mga butang nga kinahanglang dili nako ikompromiso.

Gikinahanglan nakong masayod nga ang Manluluwas nakasabot kon unsa ang pag-inusara ug pagkasad-an ang akong gibati sa dihang gikonsiderar gani nako ang pagpaubos sa mga sumbanan sa ebanghelyo aron makabati ko og pagkahisakop sa akong mga higala. Gibati nako nga ingon og nalumos ko. Gikinahanglan nako og pagluwas. Gikinahanglan nako si Jesukristo.

Dihang ang Akong Relasyon Kaniya Milig-on

Ang akong relasyon kang Jesukristo milig-on sa dihang nakaplagan nako sa akong kaugalingon kon nganong gikinahanglan nako Siya. Mao kadto ang higayon sa dihang misugod ko sa pag-uswag gikan sa pagkahibalo lamang nga gikinahanglan nakong mosunod sa ebanghelyo ngadto sa pagsabot nganong gusto nako nga sundon ang ebanghelyo ug sa pagpangayo og tabang sa pagbuhat niini. Miluhod lang ko ug sinserong mipahayag sa akong halawom ug personal nga mga hunahuna ug mga pagbati ngadto sa Dios, uban sa paglaom nga Siya nagpakabana mahitungod kanako ug sa akong problema, nga ang plano sa kaluwasan gidesinyo aron sa pagtabang kanako, nga bisan ang akong kalipay kabahin niana nga plano.

Si Presidente Russell M. Nelson mitudlo, “Sa higayon nga kamo ug ako mohimo og usa ka pakigsaad uban sa Dios, ang atong relasyon uban Kaniya mamahimong ingon ka suod kay sa wala pa ang atong pakigsaad. … Tungod sa atong pakigsaad sa Dios, Siya dili gayod kapoyon sa Iyang mga paningkamot sa pagtabang kanato, ug kita dili gayod makabsan sa Iyang maluluy-on nga pailob ngari kanato.”³

Nakig-istorya ko sa Langitnong Amahan kon unsa ka sad-an ang akong gibati, kon sa unsang paagi nga ako wala mahibalo unsa ang buhaton aron maghupot sa akong mga sumbanan ug sa akong mga higala. Gisultihan nako Siya nga gibati nako nga dili malipayon ug nga ako nagkinahanglan gayod sa Iyang tabang.

Sa higayon kadto nga nagluhod ko nga misugod ko sa pagsinati og kalinaw. Kining malinawon nga pagbati mitabang kanako nga makasabot nga ang Manluluwas nasayod gayod kon unsa ang akong gibati ug nga Siya nagpakabana gayod—dako kaayo nga pakabana, sa pagkatinuod.

Samtang nagkahamtong ko ug nakaangkon og dugang nga panglantaw, akong nakita nga sa matag higayon nga moduol ko sa Dios nga nangamuyo alang sa tabang o kapasayloan, ako ingon og sa pasumbingay nga paagi gidala ngadto sa Tanaman sa Getsemani, ang dapit diin ang atong Manluluwas nangurog sa kasakit ug nagsugod sa pag-antos sa lawas ug sa espiritu alang sa mga kasaypanan ug mga sala nga nagbulag kanato gikan sa Dios.⁴ Kini usa ka pahinumdom nga Siya nakasabot sa unsay akong giagian—mas nakasabot kaayo kay ni bisan kinsa sukad.

Wala Mag-inusara

Sa dihang mibarog ko gikan nagluhod, ang Espiritu mitabang kanako sa pagsabot sa pipila ka butang ug midasig kanako sa pagbuhat sa ubang mga butang. Una, akong nahinumdoman nga usa sa akong mga higala usa ka Muslim ug wala gayod gihangyo sa pagkompromiso sa iyang mga sumbanan tungod kay gitahod namo ang iyang pagtuo ug nakasabot nga adunay piho nga mga butang nga dili niya buhaton. Gibati nako nga nadasig sa pagpakigbahin sa akong bag-o nga pagtuo ngadto sa akong mga higala aron nga sila usab mas makasabot mahitungod kanako ug ngano nga ang akong bag-o nga mga sumbanan importante kanako.

Misugod ko sa pagbuhat sa ginagmay nga mga butang. Gisultihan nako ang usa ka higala kon sa unsang paagi ako nanglimbasog. Mabination siya ug matinahoron. Gitabangan ko niya samtang nakig-istorya ko ngadto sa akong uban nga mga higala. Dili tanan nakasabot, apan sa paglabay sa panahon, akong nakita nga mihimo sila og mga plano nga ako makaapil nga dili molapas sa akong mga saad ngadto sa Dios.

Ako nasayod nga kitang tanan makagamit og dugang nga kusog sa pagbatok sa kanunay nga impluwensiya sa kalibotan. Ang pagtuman sa mga pakigsaad makatabang niana, ug si Jesukristo mao ang anaa sa sentro sa atong mga pakigsaad.⁵ Mao kini ang akong nakaplagan alang sa akong kaugalingon—nganong nagkinahanglan ko ni Jesukristo.

Ang pagpauli ngadto sa Dios dili usa ka butang nga mabuhat nako sa akong kaugalingon. Ug adunay daghang inadlaw nga gagmay nga mga lakang ug matag adlaw nga mga kasinatian nga himoon nako—ug natong tanan—niana nga panaw sa pagpauli. Apan pagkabulahan nato isip mga tighimo og pakigsaad ug mga tigtuman og pakigsaad nga ang Dios “dili gayod kapoyon sa Iyang mga paningkamot sa pagtabang kanato” hangtod nga kita maabot didto.