“Makaserbisyo Ba Ako Kon Ako Dili usa ka Mahigalaon?,” Alang sa Kalig-on sa Kabatan-onan, Mar. 2024.
Kalig-on sa Pagserbisyo
Makaserbisyo Ba Ako Kon Ako Dili usa ka Mahigalaon?
Ang Manluluwas makapalig-on kanato bisan kon kita adunay kalisod sa pagtabang sa mga tawo.
Sa dihang hayskul pa ko, nagtuo ko nga dili ko ingon ka bililhon nga usa ka disipulo ni Jesukristo tungod kay nanglimbasog ko sa pagpakig-istorya ngadto sa mga tawo. Dili lang kay mahilomon ko—ako hilabihan ka manggiulawon! Manggiulawon kaayo ko nga naglisod ko sa pagkighigala ug sa pagpakaako kon ikauban sa akong mga klasmeyt sa eskwelahan ug sa simbahan.
Tungod niana, molikay ko gikan sa mga calling sa Young Women ug mibati nga dili mahimong sama ka espirituhanon sama sa akong mga barkada kinsa mas tabian ug makisosyal kay sa nako.
Busa sa dihang migradwar ako gikan sa hayskul ug mihukom sa pagserbisyo og misyon, ako nahadlok!
Mibati ko nga daw ang Dios gusto nga ako moserbisyo, apan ang akong unang hunahuna mao nga, “Ngano man nga ang Dios gusto sa sama nako nga moserbisyo? Dili ko makamao nga makig-istorya sa mga tawo!”
Apan bisan sa kahadlok nako, ako mihukom nga mosalig sa Dios ug moserbisyo og misyon bahala na.
Nagsalig sa Kalig-on ni Kristo
Samtang ako nagserbisyo, ang mga butang lisod sa sinugdanan, apan samtang mipadayon sa pagpaningkamot (ug pagtugot sa akong kaugalingon nga mapakyas), akong nasuta nga ang Ginoo milig-on kanako sa pagbuhat sa Iyang gipahimo nga buhaton.
Diha sa Basahon ni Mormon ang Ginoo miingon, “Kon ang mga tawo moduol ngari kanako Ako mopakita ngadto kanila sa ilang kahuyang. Ako mohatag ngadto sa mga tawo og kahuyang nga sila mahimo nga magpaubos; ug ang akong grasya igo alang sa tanan nga mga tawo nga magpaubos sa ilang mga kaugalingon sa akong atubangan; kay kon sila magpaubos sa ilang mga kaugalingon sa akong atubangan, ug magbaton og hugot nga pagtuo ngari kanako, niana Ako mohimo sa mahuyang nga mga butang nga mahimo nga malig-on ngadto kanila” (Ether 12:27).
Sa akong misyon ako nakaamgo nga si Jesukristo makahimo og maanindot nga mga butang uban kanako dili tungod sa akong kalig-on apan tungod sa Iyaha. Ug Ako nakaamgo nga ang Iyang kalig-on wala moabot kanako tungod kay ako usa ka misyonaryo, apan butang usab kadto nga unta akong masaligan sa hayskul.
Ang maanindot kaayo nga butang mahitungod ni Jesukristo mao nga kita wala magkinahanglan og ang-ang o taas kaayo nga mga resume aron makaserbisyo sa Iyang gingharian ug mamahimong lig-ong disipulo! Kon kita mapainubsanon ug sinsero sa atong mga tinguha sa pagserbisyo, si Jesukristo eksaktong modala kanato sa atong pagkakita, ug mohatag kanato sa gikinahanglan nga tabang ug kalig-on aron makaserbisyo kaniya.