“Ang Positibo nga Kalainan nga Mahimo sa Grasya ni Kristo,” Alang sa Kalig-on sa mga Kabatan-onan, Mar. 2024.

Kalig-on sa Pagbuntog sa Sala

Ang Positibo nga Kalainan nga Mahimo sa Grasya ni Kristo

Ni Brother Bradley R. Wilcox

Unang Magtatambag sa Kinatibuk-ang Kapangulohan sa Young Men

Kon atoa nang masabtan nga ang grasya sa Manluluwas dili kinahanglang trabahoan ug nga kini kanunayng anaa, ang makapahingangha nga mga butang mahitabo sa atong mga kinabuhi.

batan-ong lalaki nga anaa sa makalibog nga mga agianan [maze]

Sa dihang miserbisyo ako isip usa ka bishop, makapahingangha kaayo nga makita ang kahupayan nga nabati sa batan-ong katawhan samtang sila makigkita nako ug mokompisal sa usa ka sala isip kabahin sa ilang paghinulsol. Sa gihapon, dili nako mapugngan ang pagbatyag sa pabalik-balik nga dagan sa panghitabo: ang batan-on mokompisal, mobati og mas maayo, ug dayon—bisan pa man sa ilang labing maayo nga tumong—masipyat na usab. Dayon mokompisal, mobati og mas maayo, ug masipyat na usab. Human sa tulo o upat ka higayon agi niana nga pagbalik-balik, sila sa kasagaran moundang.

Mapasalamaton ko nga kining batan-ong katawhan natudloan nga si Jesukristo, pinaagi sa Iyang Pag-ula, nagtanyag kanila og usa ka kahigayonan sa paghinulsol ug magsugod na usab. Hinoon, nabalaka ko nga basin og sila walay igong nasabtan mahitungod sa laing panalangin nga gitanyag sa Manluluwas: ang Iyang grasya—ang makapagahom¹, balaan nga tabang, ug “gasa sa kalig-on nga sa maong paagi kita motubo gikan sa masalaypon ug may kinutubang mga tawo nga mao kita karon ngadto sa nahimaya nga mga tawo.”²

Determinado ko nga motudlo og klaro sama sa gitudlo ni Presidente Russell M. Nelson, nga ang “paghinulsol … usa ka proseso”³ nga sa kasagaran magkinahanglan og panahon ug balik-balik nga paningkamot.⁴ Gusto nako nga ang mga miyembro sa akong ward nga masayod nga ang Dios makigtambayayong kanato ug motanyag og grasya sa pagtabang kanato sa tibuok proseso sa paghingpit, bisan unsa pa kini kadugay.

Sa Unsang paagi ang Pagsabot sa Grasya Motabang Kaninyo

Pipila ka tuig ang milabay, usa ka pagtuon nga kapin sa 600 ka mga young adult didto sa Brigham Young University mipakita nga kadtong nasayod ug nakasabot mahitungod sa grasya gikataho nga adunay mas ubos nga depresyon, kabalaka, o kaulaw, ug pagkaperpeksiyonista.⁵ Usa ka follow-up nga pagtuon mipakita nga ang pagtuo sa grasya nasumpay ngadto sa mas taas nga ang-ang sa pagpasalamat, pagtamod sa kaugalingon, kahulogan sa kinabuhi, katagbawan uban sa kinabuhi, ug pagkapositibo.⁶

Sa laing pagkasulti, ang mga tawo mobati og minos nga kaulaw, ug dugang nga pagtamod sa kaugalingon kon ilang masabtan nga ang grasya anaa ra dinhi ug karon mismo—dili human nga kita makaangkon o angayan niini. Kon kita masayod nga ang Dios motabang kanato dili igsapayan kon unsa ang atong nabuhat o kapila ka higayon kita mobati nga ato Siyang gipakyas, kita mobati nga nadasig sa pagpadayon og paningkamot.⁷

“Akong Gipakyas ang Langitnong Amahan”

Bag-ohay lang usa ka misyonaryo naangol atol sa dula sa sport sa adlaw sa preparasyon ug napauli aron magpaayo. Siya adunay taas nga mga tumong aron makakuha og tabang sa pisikal nga tabang nga iyang gikinahanglan ug dayon mobalik ngadto sa iyang misyon. Apan, ang hilabihan ka dako nga panahon sa pag-inusara sa wala madugay misangpot ngadto sa pagbalik sa karaan nga nabatasan.

Siya nalambigit diha sa sala nga sa iyang pagtuo iyang nahinulsolan ug gibiyaan na niya sa wala pa iyang misyon. Nawad-an siya sa kadasig ug naglagot mahitungod sa iyang kakulang sa pagpugong sa kaugalingon. Nagkadako ang iyang pagkaguol, mas nangita pa siya niadtong bati nga mga batasan. Usa kadto ka paubos nga pagliyok nga paspas nga midala kaniya sa negatibong direksiyon.

“Mibati ko nga akong gipakyas ang Langitnong Amahan,” ang batan-ong lalaki misulti sa iyang lider sa pagkapari. “Gihinulsolan na nako kini kaniadto, ug ang Dios mipasaylo kanako. Misaad ko nga dili na gayod mobuhat niini pag-usab, ug sanglit ania ako nga mura og wala gyod naghinulsol kaniadto. Dili ako angayan sa kapasayloan o tabang sa Dios. Dili karon. Dili gayod.”

Ang Iyang lider sa pagkapari miingon, “Nan wala ka ba malipay nga masayod nga ang grasya usa ka gasa? Dili na nimo kinahanglan trabahoan o mahimong angayan niini. Ikaw kinahanglan lang nga mopili sa pagdawat niini pinaagi sa pagkaandam nga maningkamot ug dili moundang.”⁸ Ang lider mipakigbahin dayon niining mga pulong ni Elder Neil L. Angersen sa Korum sa Napulog Duha ka Apostoles: “Kita lagmit makahimo og usab sa sayop usahay, apan mobalik kita dayon ug mapaniubsanong moluhod ug mouswag pag-usab sa hustong direksiyon.”⁹

batan-ong lalaki mibiya sa makalibog nga mga agianan [maze]

Sa makausa pa, ang batan-ong lalaki midangop og balik sa tabang sa langit, ug ang Manluluwas anaa aron sa pagtabang. Dili lang naayo ang kaangol sa batan-ong lalaki, apan ingon usab ang iyang kasingkasing. Usa ka tumong sa usa ka higayon, ug uban sa grasya nga gihimong posible pinaagi ni Jesukristo, siya milambo pag-usab. Wala madugay siya mibalik ngadto sa iyang misyon puno sa pagkamapasalamaton, katagbawan sa kinabuhi, ug kapositibo. Kana ang kausaban ang mahimo sa grasya ni Kristo.