“Ang Milagro nga Atong Gikinahanglan Matag Adlaw,” Alang sa Kalig-on sa mga Kabatan-onan, Mar. 2024.
Kalig-on sa Pagbuntog sa Sala
Ang Milagro nga Atong Gikinahanglan Matag Adlaw
Kon ang Dios nahigugma kanato, nganong gihangyo man kita Kaniya nga mag-usab ug maghinulsol? Ania ang pipila ka kamatuoran mahitungod sa sala ug sa maulaong sakripisyo ni Jesukristo.
Paghulagway pinaagi ni Adam Howling
Unsa kaha kon makasaksi kamo sa mga milagro nga gihimo ni Jesukristo atol sa Iyang kinabuhi dinhi sa yuta? Makakita Kaniya nga moayo sa masakiton ug mobuhi sa patay? Bisan og dili kita makabalik sa panahon aron makakita niadto nga mga milagro, adunay usa sa mga milagro ni Jesukristo nga atong makita matag adlaw. Ug kini mao ang usa sa labing importante sa tanan: Siya mibuntog sa sala.
Ang Kamatuoran mahitungod sa Sala
Ang uban tingali maghunahuna kon nganong importante kaayo kana. Sa kataposan, bisan kon kita makahimo og sayop matag karon ug unya, ang Dios nahigugma gihapon kanato, dili ba? Aw, o, ang Langitnong Amahan ug si Jesukristo nahigugma gayod og maayo kanato. Apan tungod kay gihigugma kita Nila og maayo, adunay dugang nga mga baroganan ug mga panabot nga hisgotan nga may kalabotan niini nga hilisgotan.
Sa dihang mibisita Siya sa mga Nephite, ang Manluluwas mitudlo kanato kon nganong importante kaayo ang pagbuntog sa sala: “Walay mahugaw nga butang nga makasulod didto sa … gingharian [sa Dios]” (3 Nephi 27:19).
Siya wala moingon “walay mahugaw nga butang gawas sa pipila ka gagmay nga mga sayop.” Siya mitudlo nga bisan unsa nga matang sa sala (tinuyo nga dili pagsunod sa mga sugo sa Dios) mopugong kanato sa pagpuyo uban Kaniya pag-usab.
Problema kana. Kita dili pa hingpit nga makasunod sa mga sugo sa Dios. Tinuod kini alang sa tanang tawo—sa labing matarong nga propeta, sa labing daotan nga makasasala, ug sa tanan nga anaa sa tunga-tunga. Tungod kita dili makapapas sa atong mga sala sa atong kaugalingon, ang sala mopugong kanato sa pagsulod sa gingharian sa Dios.
Ang Milagro sa Pag-ula ni Kristo
Salamat gayod, ang Langitnong Amahan ug si Jesukristo nasayod nga nagkinahanglan kita og tabang. Didto sa Tanaman sa Getsemani ug sa krus, si Jesukristo midala sa Iyang Kaugalingon sa tanan natong mga sakit, mga balatian, mga kasakit, mga kahuyang, ug mga sala (tan-awa sa Alma 7:11–13). Tungod kay Siya mao ang hingpit nga Anak sa Dios ug ang mortal nga anak nga lalaki ni Maria, Siya makabayad sa bugti sa sala nga walay laing tawo nga makabayad.
Mao kana ngano nga Siya makasulti ngadto sa mga Nephite, “Busa walay makasulod sa … kapahulayan [sa Dios] gawas niadto kinsa nakahugas sa ilang mga sapot sa akong dugo, tungod sa ilang hugot nga pagtuo, ug paghinulsol sa tanan nila nga mga sala, ug sa ilang pagkamatinud-anon hangtod sa kataposan.” (3 Nephi 27:19).
Pagkanindot nga milagro nga tungod ni Jesukristo, kita malimpyohan sa atong mga sala! Sa dihang atong mailhan nga gikinahanglan nato ang maulaon nga sakripisyo sa Manluluwas, kita makasalig sa Iyang kusog samtang magbaton kita og hugot nga pagtuo Kaniya, maghinulsol sa atong mga sala, ug mopadayon sa pagsunod Kaniya diha sa pagkamatinud-anon hangtod sa kataposan. Kana usa ka milagro nga mahimong mahitabo matag adlaw samtang kamo mosalig sa Iyang gahom ug molihok inubanan sa hugot nga pagtuo!