“Kanus-a man Ko Mohunong sa Pagbati nga Sad-an ug Kaulaw?,” Alang sa Kalig-on sa mga Kabatan-onan, Mar. 2024.
Kalig-on sa Pagbuntog sa Sala
Kanus-a Man Ko Mohunong sa Pagbati nga Sad-an ug Kaulaw?
Usahay ingon og mas sayon nga mobati nga walay paglaom mahitungod sa inyong kaugalingon kaysa mobati sa gugma sa Manluluwas alang kaninyo—apan sama sa nahibaloan ni Nephi, dili kana kinahanglan nga ingon niana.
Kon mobuhat kamo og butang nga sayop, tingali adunay mga hunahuna nga mosantop sa inyong isipan nga kamo napakyas. Nga unta mas nahibalo kamo sa husto nga buhaton. Nga kamo dili angayan nga higugmaon.
Sa kinahiladman, kamo nasayod nga walay tinuod niana nga mga butang. Nakakat-on kamo mahitungod sa inyong bili isip usa ka anak nga lalaki o anak nga babaye sa Dios, ug kamo nahibalo nga ang paghinulsol tinuod ug posible. Apan gihapon, human kamo nakasala o nakahimo og sayop, kamo mahimong matintal nga silotan ang inyong kaugalingon labaw pa kay sa buhaton ni bisan kinsa nga adunay mga hunahuna nga sad-an ug sa kaulaw.
Bisan gani ang pipila sa atong paborito nga mga karakter sa kasulatan adunay mga higayon nga mibati niini nga paagi.
Bisan si Nephi?
Human misulat mahitungod sa pagkamatay sa iyang amahan, si Nephi misulat, “Bisan pa niana, bisan pa sa kamahinungdanon nga kaayo sa Ginoo, sa pagpakita kanako sa walay kataposan ug dili matugkad nga mga buhat, ang akong kasingkasing nakasinggit: O pagkaalaot ko nga tawo! Oo, ang akong kasingkasing nagmasulub-on tungod sa akong pagkahuyang; ang akong kalag nagmagul-anon tungod sa akong kadaotan. Ako gilibotan, tungod sa mga pagtintal ug ang mga sala sayon nga mohasol kanako. Ug kon ako magtinguha sa pagmaya, ang akong kasingkasing mag-agulo tungod sa akong mga sala” (2 Nephi 4:17–19).
Kini mao si Nephi nga atong gihisgotan—ang sama nga tawo nga miluwas sa mga palid nga tumbaga gikan ni Laban, mihimo og gapasan gikan sa yano nga sanga sa kahoy didto sa kamingawan, ug mihimo og usa ka barko nga wala pa gayod nakahimo og barko sukad. Siya adunay pagpamatuod sa kaayo sa Ginoo; bisan pa man, mibati siya og pagkakulang tungod sa iyang mga sala ug mga kahuyang.
Mao nga unsa may atong buhaton? Kon ang atong bayani sa Basahon ni Mormon nanglimbasog sa mga pagbati sa pagkasad-an ug pagkakulang; unsa may atong mabuhat kon mobati kita sa samang paagi?
Ang Importante nga Paagi Mao ang Pagtutok kang Jesukristo
Ang istorya ni Nephi wala matapos didto. Ang importante nga paagi alang kang Nephi mao ang pag-usab sa iyang pagtutok gikan sa iyang kaugalingon ngadto kang Jesukristo.
Samtang nagbangotan si Nephi, siya miingon, “Bisan pa niana, ako nasayod kang kinsa ako mosalig. Ang akong Dios mao ang akong kaabag” (2 Nephi 4:19–20).
Human niini nga kausaban sa panghunahuna, ang atong bayani sa kasulatan wala na nakatutok sa kaguol nga iyang gibati gikan sa iyang mga sala. Hinuon, siya nagmaya sa iyang Manluluwas! Si Nephi nag-ingon, “Pagmaya, O akong kasingkasing, mangamuyo ka sa Ginoo, ug moingon: O Ginoo, ako magdayeg kanimo sa kahangtoran; oo, ang akong kalag magmaya diha kanimo, akong Dios, ug ang lig-on nga sukaranan sa akong kaluwasan.” (2 Nephi 4:30).
Sama ni Nephi, kamo makakaplag og kaluoy, kapasayloan, ug kalinaw pinaagi kang Jesukristo. Tingali dili ninyo mabati nga ingon og kamo makahatag sa inyong kaugalingon og grasya, apan adunay Usa kinsa mohatag. Si Elder Jeffrey R. Holland sa Korum sa Napulog Duha ka Apostoles miingon, “Ang grasya ni Kristo nagtanyag kanato dili lamang sa kaluwasan gikan sa kasubo ug sala ug kamatayon apan sa kaluwasan usab gikan sa atong kaugalingong makanunayon nga pagpanaway sa kaugalingon.”1
Mao nga kon gibati ninyo nga naguol gayod og maayo nga dili kamo makakita og paagi sa pagbuntog sa inyong mga sala ug mga sayop, hibaloi nga ang Langitnong Amahan ug si Jesukristo wala gayod mohunong sa paghigugma kaninyo. Ibutang ang inyong pagtutok sa inyong Manluluwas, ug Siya makatabang kaninyo sa pagbuntog sa inyong mga sala ug sa inyong pagbati nga sad-an.