“Sa Yano ug Gamhanang Paagi Nagtabang sa Uban nga Moduol ngadto kang Kristo,” Alang sa Kalig-on sa mga Kabatan-onan, Marso 2024.
Sa Yano ug Gamhanang Paagi Nagtabang sa Uban nga Moduol ngadto kang Kristo
Ikaw adunay dili maihap nga mga paagi sa pagpakita og gugma, pagpakigbahin sa imong mga tinuohan, ug pagdapit sa uban sa pagduol ngadto kang Jesukristo.
Usa ka adlaw atol sa akong junior nga tuig sa hayskol, ang akong higala nga si Nedra nangutana kanako, “Russ, nganong wala ka nagtambong sa seminary?”
Niadtong higayona, ang akong mga ginikanan wala magsimbahan. Nagtambongan ko panagsa lang uban sa akong mga higala, ug wala ko miapil sa seminary. Pagkasunod adlaw, mitambong ko sa seminary pagka-6:30 sa buntag. Human niadto, miadto ko matag adlaw—bisan sa mabugnaw, may niyebe sa tingtugnaw nga mga buntag.
Ang mga butang nga akong nakat-onan sa seminary mitandog sa akong kasingkasing. Mitubo ang akong pagpamatuod samtang nagkat-on ko mahitungod ni Jesukristo ug sa Iyang napahiuli nga ebanghelyo. Nakapaandam kini kanako sa pagserbisyo sa akong misyon sa England ug sa pagpadayon sa tibuok kinabuhi nga serbisyo ngadto sa Ginoo ug sa Iyang Simbahan.
Ang pagdapit ni Nedra kanako sa seminary nakatabang kanako nga makita, sa personal nga paagi, nga adunay dili maihap nga mga oportunidad alang kanimo sa pagtabang sa uban nga moduol ngadto ni Ginoong Jesukristo. Sa yano apan gamhanang mga paagi, makapakita ka sa imong gugma, makapakigbahin sa imong tinuohan, ug makadapit niadtong anaa sa imong palibot aron makasinati sa kalipay ug kalinaw nga gidala sa Manluluwas ug sa Iyang ebanghelyo.
Makaila sa Manluluwas
Aron tinud-anay nga makatabang sa uban nga moduol ngadto kang Kristo, ikaw kinahanglan una nga makasabot kon si kinsa Siya. Si Jesukristo mao ang Anak sa Dios ug ang mao ra gayod kinsa mahimong Manluluwas ug Manunubos sa kalibotan.
Siya lamang ang makapuyo og hingpit nga kinabuhi, makaula alang sa atong mga sala, makaantos sa tanan natong “mga sakit ug mga kasakit ug mga pagtintal” (Alma 7:11), ug unya mohatag sa Iyang kinabuhi ug mokuha niini pag-usab. Tungod ni Jesukristo, ang tanang anak sa Dios mabanhaw pag-usab ug makadawat sa Iyang labing sagrado ug mahimayaong mga panalangin.
Samtang ikaw makasabot kon kinsa ang Manluluwas—ug unsa ang imong mahangturong destinasyon nga mamahimo tungod Kaniya—gusto nimo nga puy-an ang imong kinabuhi sa paagi nga makapahimuot Kaniya. Ug kini makapahimuot gayod Kaniya kon imong isangyaw ang Iyang ebanghelyo, sa pulong ug buhat, ngadto niadtong imong makauban matag adlaw.
Pagkab-ot Uban sa Gugma
Samtang ikaw makaila ug mahigugma sa Manluluwas, magtinguha ka sa pagsunod Kaniya ug sa Iyang mga pagtulon-an nga mas mapaminawon, lakip na sa Iyang sugo nga “maghigugmaay kamo ang usa sa usa” (Juan 13:34).
Sa dihang miadto si Ammon ngadto sa mga Lamanita aron sa pagsangyaw sa ebanghelyo, mitanyag siya nga mahimong sulogoon ngadto ni Hari Lamoni. Si Ammon mipakita og tinuod nga gugma ug mapahinungoron sa dihang iyang gipanalipdan ang mga karnero sa hari. Ang mga aksiyon ni Ammon nakapahumok sa kasingkasing ni Hari Lamoni. Sa dihang mitudlo sa ebanghelyo si Ammon, nabuntog sa Espiritu si Hari Lamoni, ug siya nakabig (tan-awa sa Alma 17–19).
Ang pagkahimong tinuod nga disipulo ni Jesukristo nagpasabot og paghigugma sa imong mga silingan sama sa imong kaugalingon (tan-awa sa Mateo 22:36–40). Kon ilang bation nga imo silang gihigugma ug giamuma, mas motugot sila nga mopakigbahin ka sa mga butang nga ikaw nasayud nga tinuod.
Pagkaplag sa Kaisog sa Pagpakigbahin
Pinaagi ni Propeta Joseph Smith, ang Manluluwas mipahiuli sa pagkapari sa yuta uban sa tanang mga ordinansa ug mga pakigsaad nga gikinahanglan alang sa atong mahangturong pag-uswag. Sa higayon nga ang mahimayaong mensahe sa Pagpahiuli moimpluwensya sa imong kasingkasing, gustohon gyod nimo ang pagpahibalo niini ngadto sa tanan! Kinahanglan nga ikaw matinguhaon nga moapil sa pagpakigbahin sa bililhong kahibalo sa gipahiuli nga ebanghelyo ngadto sa tanan. Gusto nako na nga buhaton!
Ang pipila mabalaka nga ang uban dili magka-interes o mobalibad sa unsay ilang ipakigbahin. Oo, kana mahimong mahitabo. Human si Abish miadto sa matag balay nagsulti sa mga tawo nga ang gahom sa Dios miabot ngadto kang Hari Lamoni ug sa iyang panimalay, ang uban mituo, apan daghang mipili nga dili maminaw (tan-awa sa Alma 19:17–31).
Modawat man sila o dili, ang labing mahinungdanong gasa nga imong mahatag sa usa ka higala o sakop sa pamilya—o bisan sa usa ka kaaway—mao ang ebanghelyo ni Jesukristo. Pag-ampo alang sa kaisog, ug unya, kon angay na, ipakigbahin ang unsay imong nahibaloan nga tinuod.
Ihatag ang usa ka Sinsero nga Pagdapit
Samtang nagserbisyo isip presidente sa Canada Toronto Mission, mitabang ko og daghan sa akong mga misyonaryo sa pagtudlo sa usa ka prominente nga negosyanteng lalaki. Human sa among leksiyon, midapit ako kaniya sa pag-ampo ug sa pagpangutana sa Langitnong Amahan kon ang among mensahe tinuod ba.
“Dili ako kahibalo kon unsaon sa pag-ampo,” miingon siya.
Ako siyang giingnan nga ang gikinahanglang lang niyang buhaton mao ang pagluhod ug sa yano mohangyo sa Langitnong Amahan sa pagkumpirma sa kamatuoran ngadto kaniya.
“Ikaw makahimo niana!” Miawhag ako kaniya.
Nangluhod mi ug ang tawo misugod sa iyang pag-ampo. Sa dihang nahuman kami, miingon siya, “Unsay nahitabo? Wala pa ko sukad mobati og ingon niini.”
“Mao kana ang paagi sa Langitnong Amahan nga motubag sa mga pag-ampo,” ako miingon. “Ikaw nangutana, ug Siya mitubag.”
Kanunay akong nagtudlo sa mga misyonaryo ug sa mga miyembro sa tibuok kalibotan nga ang pagkakabig magsugod kon unsay gibati sa mga tawo. Kon modapit kamo sa uban sa pagpaminaw sa ebanghelyo, dapita usab sila sa pag-ampo ug sa pagpangutana aron mobati sa kamatuoran diha sa ilang mga kasingkasing. Kon sila mangutana sa Dios (tan-awa sa Santiago 1:5) uban sa sinsero nga kasingkasing, uban sa tinuod nga katuyoan ug hugot nga pagtuo diha kang Kristo, sila makadawat og kompirmasyon sa kamatuoran pinaagi sa gahom sa Espiritu Santo (tan-awa sa Moroni 10:4–5). Makapahinam ug makalipay ang pagtabang sa uban sa pagdiskobre sa kamatuoran sa ilang kaugalingon.
Hinumdomi Nga Ang Matag Kalag Bililhon
Dili ikaw mahibalo unsay mahitabo kon motabang ka sa uban sa pagduol ngadto kang Kristo pinaagi sa paghigugma, pagpakigbahin, ug pagdapit. Ang mga Lamanita, sama pananglit, daw mao ang katawhan nga labing dili modawat sa ebanghelyo, apan sila nahimong nakabig og maayo nga sila “wala gayod mobiya” (Alma 23:6–7).
Dili ka kinahanglang magpaabot niini nga resulta matag higayon mopakigbahin ka sa ebanghelyo. Apan sa yano ug gamhanang paagi, makapamatuod ka sa kamatuoran ug makatabang sa pagpaila sa gipahiuli nga ebanghelyo ngadto sa mga anak sa Langitnong Amahan.
Kon makaamgo ka kon unsa ka bililhon ang matag usa sa mga anak sa Langitnong Amahan ngadto Kaniya, gustohon nimo ang pagbuhat sa tanan nga imong mahimo sa pagtabang sa uban aron moduol ngadto kang Kristo ug motikang ngadto sa kahayag sa Iyang ebanghelyo ug ngadto sa agianan sa pagka-imortal ug kinabuhing dayon.
Unsang labaw nga kasinatian nga mahimo nimong maangkon sa kinabuhi?