“Naugtas Ko! Unsaon man ni Karon?,” Alang sa Kalig-on sa mga Kabatan-onan, Mar. 2024.
Kalig-on sa mga Panahon sa Kaugtas
Naugtas Ko! Unsaon man ni Karon?
Ania ang pipila ka ideya sa pagtabang kaninyo sa paggamit sa gahom sa Manluluwas nga makapawala sa kaugtas.
Mga paghulagway pinaagi ni Uran Duo
Kaugtas. Kahingawa. Kadaot. Kabug-at. Kasamok. Kabalaka.
Bisan unsa ang inyong itawag niini, kini kabahin sa mortalidad sukad gayod nga si Adan ug Eva mibiya sa Tanaman. Walay pormula alang sa usa ka “kinabuhi nga walay kaugtas.” Sa pagkatinuod, ang usa ka kinabuhi nga sama niana mopakyas sa katuyoan! (Tan-awa sa 2 Nephi 2:11–12.)
Tungod dili nato hingpit nga mawala ang kaugtas, kinahanglan tutokan nato unsaon sa pagdumala niini. Kadaghanan sa mga tinubdan sa kaugtas mabahin ngadto sa duha ka kategoriya:
-
Mga butang nga inyong makontrol.
-
Mga butang nga dili ninyo makontrol.
1. Mga Butang nga Inyong Makontrol
Sulod sa katuigan, daghang tawo sa ubang mga tinuohan nakakaplag og kahupayan sa pagsaysay sa unsay nailhan isip ang “Pag-ampo sa Kalinaw”: “Dios, hatagi ko sa kalinaw nga dawaton ang mga butang nga dili nako mausab, kaisog nga usbon ang mga butang nga akong mausab, ug kaalam nga mahibalo sa kalainan.”1
Si Propeta Joseph Smith mihatag sa nag-una nga mga Santos sa susama nga tambag sa pagdumala sa ilang daghan nga mga hagit: “Busa, minahal ug hinigugma nga mga kaigsoonan, kita magmalipayon sa pagbuhat sa tanan nga mga butang nga ubos sa atong gahom; ug unya kita magmalinawon, uban ang labing dako nga kasiguroan, nga makasaksi sa kaluwasan sa Dios, ug sa iyang mga bukton nga ipadayag” (Doktrina ug mga Pakigsaad 123:17).
Sa laing pagkasulti: Buhata ang tanan nga imong mahimo, ug tugoti ang Dios nga maoy motiwas. Tutoki ang unsay imong makontrol, sama sa:
Inyong kaugalingon nga mga pagpili
Tungod sa Pag-ula ni Jesukristo kita “nahimo nga gawasnon sa kahangtoran, nasayod sa maayo gikan sa daotan; sa pagbuhat alang sa [atong] mga kaugalingon ug nga dili pagaaghaton”(2 Nephi 2:26). Kita kinahanglan nga “matinguhaon [pasabot, mahinamon] nga moapil” sa pagbuhat sa maayo nga mga butang (Doktrina ug mga Pakigsaad 58:27).
Inyong kinaiya
Ang Amerikana nga magbabalak nga si Maya Angelou misulat, “Unsay kinahanglan ninyong buhaton kon dili kamo ganahan sa usa ka butang mao ang pag-usab niini. Kon dili ninyo kini mausab, usba ang paagi nga kamo maghunahuna mahitungod niini.”2 Pangitaa ang positibo nga kinaiya sa mga tawo ug mga sitwasyon. Himoang mga dula ang mga buluhaton. Ang pagsige og hunahuna sa kaugalingon nga mga kaguol kon unsa ninyo ka dili ganahan sa usa ka sitwasyon dili makapahimo niini nga maayo.
Inyong tubag ngadto sa mga butang nga dili ninyo makontrol
Dili kamo makapugong sa mga bagyo, apan makahatag kamo og panahon, kwarta, o serbisyo aron sa pagtabang niadtong naapektohan niini. Dili kamo makapugong sa usa ka higala nga mobiya sa Simbahan, apan makapadayon kamo sa paghigugma kanila ug magpakita og maayo nga ehemplo. Dili kamo makapugong kon ang usa ka tawo mosulti og usa ka butang nga dili mabination kaninyo, apan makapili kamo kon unsaon sa pagtubag niana.
Ug sa tibuok niining tanan, hinumdomi ang usa ka butang nga inyong mabuhat kanunay: mag-ampo. Hangyoa ang Dios sa pagbuhat sa mga butang nga dili ninyo mabuhat—sa pag-usab sa mga butang nga dili ninyo mausab. Bisan unsa man ang sangpotanan, ang Manluluwas makatabang kaninyo nga mobati og kalinaw.
2. Mga Butang nga Dili Ninyo Makontrol
Kini mao ang kinasayonan nga kategoriya nga tubagon tungod ang estratehiya yano:
Kon dili ninyo kini makontrol, ayaw og kabalaka mahitungod niini.
Hinuon, pagpakita og hugot nga pagtuo kang Jesukristo ug tutoki ang unsay inyong mahimong makontrol. Paningkamoti nga dili kamo mabuntog sa kabalaka.
Siyempre, mas sayon isulti kaysa buhaton. (Wala ba kamo nangandoy nga kamo adunay switch sa “kabalaka” nga inyo lang pasigahon ug palongon?)
Apan ang pagdawat nga ang usa ka problema lapas na sa inyong kontrol mao ang unang lakang nga dili kini tugotan sa pagpaugtas kaninyo. Kamo dayon mobutang sa inyong hugot nga pagtuo diha ni Jesukristo.
Ang mga butang nga dili nato makontrol kasagaran anaa ubos sa usa sa duha ka kategoriya:
Natural nga mga panghitabo
Mga kagutom, mga huwaw, natural nga mga kalamidad. Mga pandemya. Pipila ka pisikal nga mga limitasyon ug mga kondisyon sa panglawas. Ang kinaiya sa tawo makaapekto niini nga mga butang, ug kasagaran adunay mga lakang nga atong mahimo aron mahimong andam alang niini o pagamyan ang epekto niini. Apan dili nato kini makontrol sa adlaw-adlaw.
Mga pagpili sa ubang mga tawo
Giunsa sa mga tawo pagpakita sa ilang kinaiya sa online. Kon ang inyong mga higala magpabilin o dili magpabilin sa Simbahan. Unsay isulti sa mga tawo kon wala kamo. Mga desisyon nga gihimo sa mga korte ug mga gobyerno. Unsay gipasalida sa telebisyon. Pilay kantidad sa mga butang. Makahatag kamo sa inyong opinyon, apan sa kataposan, ang tanang mga pagpili nga gihimo sa mga tawo gawas sa inyong kaugalingon lapas na sa inyong kontrol.