“Inyong Magbalantay latas sa mga Walog sa Kahadlok,” Alang sa Kalig-on sa mga Kabatan-onan, Mar. 2024.

Kalig-on batok sa Kabalaka ug Kahadlok

Inyong Magbalantay latas sa mga Walog sa Kahadlok

Ni Marissa Widdison

Mga Magasin sa Simbahan

Sa mabalak-on nga mga higayon, kita mahimong maminaw sa tingog sa atong Magbalantay.

Si Jesukristo isip ang Maayong Magbalantay

Usa sa labing nailhan nga mga kapitulo sa kasulatan mao ang Salmo 23. Ang matinud-anon nga mga tawo sa tibuok kalibotan gikan sa daghang relihiyon padayon nga nakakaplag og kahupayan niini nga mga bersikulo nga gisulat sa daghang katuigan na kaayo nga milabay.

Ang Ginoo mao ang akong magbalantay; ug walay nakulang kanako.

Gipapahulay niya ako sa mga lunhawng sibsibanan ug gitultolan niya ako sa tin-aw nga katubigan.

Gilig-on niya ako. Gitultolan niya ako sa dalan nga angay kong subayon, tungod ug alang sa iyang ngalan.

Bisan pag maglakaw ako sa ngitngit nga walog sa kamatayon, dili ako mahadlok kay nag-uban ka man kanako; gipanalipdan mo ako pinaagi sa imong sungkod ug bunal.

Giandaman mo akog pagkaon atubangan sa akong mga kaaway. Gidihogan mog lana ang akong ulo ug gipaawas mo ang akong kupa.

Ang imong kaayo ug gugma mag-uban kanako sa tibuok kong kinabuhi; ug magpuyo ako sa balay sa Ginoo hangtod sa kahangtoran.

Nasulayan na ba ninyo sukad nga ikauban ang mga karnero? Nerbiyoso sila og gamay ug magsugod og dagan sa kusog nga kabanha o mga lihok. Wala gayod sila nailhan sa pagkawalay kahadlok! Ug tingali kana usa ka butang nga atong makat-onan gikan niini nga sumbingay—ang Ginoo nasayod nga ang matag usa kanato mobati og kahadlok usahay. Walay ikaulaw niana! Kabahin kini sa hagit sa mortalidad. Niana nga mabalak-on nga mga higayon, kita mahimong maminaw sa tingog sa atong Magbalantay. Siya naningkamot sa paggiya kanato ngadto sa “mga sibsiban nga malunhaw” sa mahinabo nga kalinaw ug kahilwasan. Ania ang pipila sa mga paagi nga Siya malumo nga nagdapit kanato sa pagsunod Kaniya.

Pagtuon sa mga pulong sa atong Magbalantay—sama sa Iyang mga pagtulon-an diha sa Bag-ong Tugon, 3 Nephi, o sa Doktrina ug mga Pakigsaad. Samtang buhaton nato, kita espirituhanon nga mapakaon ug mahimong mas makaila sa Iyang tingog sa umaabot.
Pag-ampo ngadto sa Langitnong Amahan sa ngalan ni Jesukristo sa bisan unsang panahon aron mangayo og kahupayan ug kalinaw sa inyong kinabuhi.
Dawata nga makita ang tabang sa Manluluwas sa daghang paagi, lakip sa mga ginikanan, mga lider sa Simbahan, mga higala, ug gani mga doktor ug ubang propesyonal nga mga kapanguhaan.
Pagpundok kuyog sa uban kinsa nahigugma sa Manluluwas, sama diha sa simbahan o seminary. Kini makakonektar kanato ngadto sa usa ka mahigugmaon nga komunidad sa mga Santos kinsa magtambayayong sa pagsunod sa Manluluwas ug pagbuntog sa makahadlok nga mga problema uban sa Iyang tabang.

Usahay ang pagbuntog og kahadlok usa ka panaw, sama sa pagbiyahe latas sa usa ka ngitngit nga walog, sama sa gisulti sa Salmo 23. Si Nicolas F., gikan sa Brazil, makapamatuod nga kon kamo magsige og padayon sa unahan, ang pagkaayo moabot. Nanglimbasog siya sa mga pagbati sa kapakyas ug kahadlok sulod sa taas nga panahon.

“Nag-ampo ako og maayo, naghangyo sa Dios sa pagkuha sa dili maayo nga mga hunahuna sa akong isipan, naghangyo Kaniya sa pagkuha sa dili maayo nga mga pagbati,” siya nag-ingon. Siya miagi sa mga panahon sa kalibog ug nagtutok sa mga sayop nga iyang nahimo.

“Misulay ko sa pagpangita sa gahom sa Dios, apan wala pa nako mabati ang Iyang pag-ayo,” nag-ingon si Nicolas. Siya misiksik sa mga kasulatan alang sa mga bersikulo mahitungod sa pagbuntog sa kahadlok ug nakakaplag og kalig-on niadto nga mga pulong. Nakakuha siya og suporta gikan sa iyang inahan ug sa uban.

Sa kataposan, usa ka hapon, siya piho nga mibati nga hingpit ug mapasalamaton. Nakaamgo siya kon unsa na kalayo ang iyang naabot.

“Kaniadto gibati nako nga ingon og anaa ako sa bilanggoan,” siya nag-ingon. “Apan karon gibati nako nga ingon og makadaog ako sa mga sangka. Samtang gitinguha nako ang tabang sa Ginoo, mibati ako og paglaom.”

Kon kini man nga panahon sa kinabuhi mabati nga ingon og usa ka mahayag nga kilid sa bungtod o usa ka ngiob nga walog, kamo adunay Maayong Magbalantay, ug Siya molakaw uban kaninyo. Nahigugma Siya kaninyo! Motabang Siya kaninyo aron makalahutay niini. Pabilin nga duol Kaniya, ug Siya mogiya kaninyo ngadto sa kalinaw.