“N̄an kōkajoorļo̧k Jodikdik ro: Enaan eo An Rilo̧o̧mo̧r eo n̄an Eok,” N̄an Kōkajoorļo̧k Jodikdik ro, M̧aaj. 2024.
Juon Unin Tōl n̄an Kajoor eo An
N̄an Kōkajoorļo̧k Jodikdik ro: Enaan eo An Rilo̧o̧mo̧r eo n̄an Eok
Unin tōl in enaaj jipan̄ eok ekkejelļo̧k wōt ippān Jisōs Kraist ilo kālet ko am̧ im katak ko An.
Ij Jutak ilo Kōjām eo im Kaļļaļļaļ, jān J. Kirk Richards
Pijaikļok am̧ mour tōre ko jem̧aan ilo Galili, 2,000 iiō remo̧o̧tļok. Kwe im ro m̧ōttam̧ em̧ōj kūr kom̧ n̄an juon kweilo̧k eļap an Jodikdik ro ilo iṃōn kweilọk eo itūrum̧, epād juon rikōnono aorōk ej lo tok: Jisōs Ri Nazeret. Im ilo juon tōre ilo kōnono eo An, Jisōs ekar karuwaineneik Jodikdik ro ijo bwe ren leļok kajjitōk n̄an E.
Kain kajjitōk rōt ko kwōj ļōmņak konej rōn̄?
Ij kōtmene ke jet iaan kajjitōk ko renej kwaļo̧k jōkjōk in m̧anit im mour tōre ko. Ak eļap aō tōmak ke elōn̄ iaer renej āinwōt kajjitōk kein ad rainin.
N̄an waanjon̄ak, ilo Kallim̧ur Ekāāl, armej rekar kajitūkin Jisōs kajjitōk rōt kein:
-
Ta eo inaaj kōṃṃan bwe in jolōt mour indeeo?1
-
Renej ke bōk eō? Ewōr ke jikū?2
-
N̄e jeiū ak jatū ej jerawiwi ņae eō, jete kōttan aō jeorļo̧k an bōd?3
-
Ta enej waļo̧k n̄an laļ in ilju im jekļaj? Enej ke pā ilo kōjparok?4
-
Komaron̄ ke kemour ro rejitōnbōro ippa?5
-
Ta eo ṃool?6
-
Ekōjkan aō jeļā eļan̄n̄e ij etal ilo iaļ eo ejim̧we?7
Jejjōb ke ļōmnake men in jān iien n̄an iien? Elōn̄ iiō remo̧o̧tļok, kajjitōk kein rejjan̄in lukkuun oktak. Im barāinwōt tūriam̧o eo An Rilo̧mo̧o̧r n̄an ro rej kajjitōki. E ejeļā jon̄an an mour in tūrabōḷ im pok. E ejeļā pidodo in ad peļok jān ad ial. E ejeļā ke jet iien jej inepata kōn ilju im jekļaj. Im Ej ba n̄an kwe im n̄a, āinwōt an kar ba n̄an ri-kaļoor ro an etto:
N̄e ewōr am̧ kālet ko raorōk n̄an kōm̧m̧ani, Jisōs Kraist im gospel eo An em̧ōj an jepļaaktok rej kālet eo em̧m̧antata. N̄e ewōr am̧ kajjitōk, Jisōs Kraist im gospel eo An em̧ōj an jepļaaktok rej uwaak eo em̧m̧antata.
En̄iin ej unin aō iakwe N̄an Kōkajoorļo̧k Jodikdik ro: Juon Unin Tōl n̄an Kōm̧m̧ani Kālet ko. Ej jitōñļok kōj n̄an Jisōs Kraist bwe jān maron̄ bōk kajoor eo An. Ij likūt juon aō kaape ilo bōjọ e aō aolep iien. Ilo aō ioon armej jān peļaakin laļ in ro im rekōnan jeļā etke kōj, membōr in Kabun̄ eo An Jisōs Kraist, jej kōm̧m̧ane ta ko jej kōm̧m̧ani, ij kwaļo̧k n̄an er tōl in.
N̄an Kōkajoorļo̧k Jodikdik ro ej katakin m̧ool ko indeoo kōn Rilo̧o̧mo̧r eo im An Iaļ. Ej Karuwainene kwe n̄an am̧ kōm̧m̧an kālet ko ekkar n̄an m̧ool kein. Im ej kwaļo̧k kōjeraam̧m̧an ko ke E ej leļo̧k n̄an ro rej ļoor E. Jouj im riiti, kejōkļo̧kjeņ kake, im kwaļo̧k unin tōl in!
Karuwaineneiktok E
Jisōs Kraist ekōņaan bwe En m̧ōttan mour eo am̧—aolep raan, kajjojo iien, ilo iien em̧m̧an im nana. E ejjōb jutak wōt ilo jem̧ļokin ial in, im kōttar am̧ tōpar E. E enej etetal ippam aolep bun̄tōn̄ ko. E ej Iaļ eo!
Ako eban booje An iaļ n̄an mour eo am̧. Kwōj karuwaineneiki E, ilo kālet ko am̧. En̄in ej etke juon unin tōl n̄an kōm̧m̧an kālet ko, āinwōt N̄an Kōkajoorļo̧k Jodikdik ro, elukkuun aorōk. Aolep iien kwōj kōm̧m̧ane kālet ko rejim̧we jān m̧ool ko an indeeo An Rilo̧o̧mo̧r eo, Kwōj kwaļok ke kōkņan bwe En ped lo mour eo am̧. Kālet kein rej kōpeļļok kōjem ko an lan̄, im ej lutōktok kajoor eo An n̄an mour eo am̧,11
Kōm̧m̧ane juōn jemjerā eo ekajoor.
Komaron̄ keememej bwe Rilo̧o̧mo̧r eo ej lale ro rej ron̄ im kōm̧m̧ane naan ko An n̄an armej eo e jeḷāḷọkjeṇ im ej “kalōk ṃweo iṃōn ioon bar.” Eaar ba:
“E bun̄ wōt, im ibwijleplep, im ḷap kōto, im iuun ṃweo; im e jab bun̄; bwe eṃōj kalōke ioon bar.”12
Juōn em̧ ejjōb jutak ilo iien ļan̄ kōnke ekajoor. Ejjōb barāinwōt jutak kōnke dōkā eo ekajoor. Em̧ in ej jutak ibūļōn ļan̄ kōnke em̧ōj kalōke ippān dōkā in ekajoor. Kajoor in ekkejelļo̧k n̄an dōkā eo eaorōk.
Ejjeļļok oktak, ilo ad kalek mour ko ad, e aorōk bwe jen kōm̧m̧an kālet ko rem̧m̧an. Im emenin aorōk bwe jen meļeļe m̧ool ko an indeeo An Rilo̧o̧mo̧r eo. Ak kajoor eo jenej aikuji n̄an deplo̧ke ļan̄ ko an mour in ej itok n̄e jej likūt kālet ko ad ippān Jisōs Kraist im katak ko An. En̄in ta eo N̄an Kōkajoorļo̧k Jodikdik ro ej jipan̄ kōj kōm̧m̧ane.
N̄an waanjon̄ak, ro m̧ōttam̧ remaron̄ jeļā ke kwoj kajjeon̄ jab kōjerbal naan eddo ak kōmmetak. Remaron̄ lo am̧ eļļo̧k ajri eo ilo jikin jikuul eļōn̄ armej rejjab eļļo̧k ako rekajoor kakure. Ak rejōļā ke kwōj kōm̧m̧ane kālet kein kōnke Jisōs Kraist ej katakin bwe “aolep armej rej am̧ būratōr im sister—ekoba … armej ro reoktak jān kwe”?13
Ro m̧ōttam̧ remaron̄ jeļā ke kwōj etal im jar aolep Jabōt. Remaron̄ loe am̧ kune jet al ako jab etal im alooje jet pija. Ak rejeļā ke kwōj kōm̧m̧ane kālet kein kōnke ewōr am̧ “bujen elem̧ōņōņō ippān Jemedwōj Ilan̄ im Jisōs Kraist,” im en̄iin ej ijo kwōj kwaļok am̧ tōmak n̄an ļoore Rilo̧o̧mo̧r eo, kwōj m̧ōņōņō “n̄an bōk Jetōb Kwojarjar āinwōt juon mōttam̧”?14
Armej remaron̄ jeļā ke kwojjab kadōk ak kōbaatat ak kōjerbal uno ko rekajoor. Ak rejeļā ke kwōj kōm̧m̧ane kālet kein kōnke Jisōs Kraist ej katakin bwe “ānbwinūm̧ ekwojarjar,” “juon menin letok aiboojoj jān Jemedwōj Ilan̄,” kōm̧anm̧an ilo nememein wōt E?15
Ro m̧ōttam̧ remaron̄ jeļā ke kwojjab ko̧o̧t ak riab im bwe kwōj m̧ool ilo am̧ pukot jeļāļokjen. Bōtaab rejeļā ke unin eo ej kōnke Jisōs Kraist ej katakin bwe “ṃool enaaj kōṃanṃan anemkwōjami”?16
Eļaptata, ro m̧ōttam̧ rejeļā ke kwoj kōm̧m̧an kāālet kein rejjab bun̄bun̄ jet iien n̄an am̧ jutak pen ilo jon̄ok ko an Kraist kōnke kwojeļā “Jisōs Kraist ej am̧ kajoor”?17
E ej Am̧ Kajoor.
Ij lewaj n̄an eok juōn kam̧ool epen ke Jisōs Kraist ej Iaļ eo n̄an juōn ilju im jakļaj eo em̧m̧an im aiboojoj—Ilju im jekļaj eo am̧. Im Ej barāinwōt Ial eo n̄an em̧m̧an im aiboojoj eo an rainin. Etetal ilo iaļ eo An, im Enej etetal ippam̧. Komaron̄ kōm̧m̧ane men in!
Jodikdik ro m̧ōtta rejitōnbōro, Jisōs Kraist ej am̧ kajoor. Etetal wōt Ippān, im Enej jipan̄ eok kālōn̄ļo̧k “kōn peir āinwōt igōl ko”18 n̄an m̧ōņōņō eo ejjeļok jem̧ļokin em̧ōj An kōpooje n̄an eok.