“Ļam Waan im Kajoor ilo Jipan̄ Ro Jet Itok n̄an Kraist,” N̄an Kōkajoorļo̧k Jodikdik Ro, M̧aaj 2024.
Ļam Waan im Kajoor ilo Jipan̄ Ro Jet Itok n̄an Kraist
Ewōr wāween ko kojjab maron̄ bwini n̄an kwaļo̧ke iakwe, jaketok jaketak tōmak ko am̧, im karuwaineneik ro jet n̄an itok n̄an Jisōs Kraist.
Juon raan ilo tōre ko ij pād ilo kūaaj jon̄oul juon ilo high school, Mōtta Nedra ekar kajjitōk ippa, Russ, etke kwojjab etal n̄an jemenere?”
Ilo tōre eo, jinō im jema rejjab etal im jar. Ij etal im jar ippa make jet iien wōt ippān ro m̧ōtta, im ikar jab bōk koņaaō ilo jemenere. Raan eo tok juon, ikar etal n̄an jemenere ilo 6:30 awa jibbon̄. Ālkin iien eo, ikar ļakkar etal aolep raan—men̄e em̧ōļo, snow ilo jibbon̄ in winter.
Men ko ikar ekkatak ilo jemenere rekar un̄n̄ūr būruwō. Naan in kam̧ool eo aō ekar ļapļo̧k ilo aō ekkatak eļapļo̧k kōn Jisōs Kraist im gospel eo an em̧ōj an jepļaaktok. Menin ekar kōpooje eō bwe in jerbale mijen eo aō ilo England im n̄an wōnm̧aanļo̧k wōt ilo juon mour ilo aolepān mour eō aō jerbal n̄an Irooj im Kabun̄ eo an.
Karuwainene eo an Nedra n̄an n̄a n̄an jemenere ej jipan̄ eō loe, ilo wāween eo aō make, bwe ewōr kōjeraam̧m̧an ko ban maron̄ bwini n̄an kom̧ n̄an ami jipan̄ ro jet itok n̄an Irooj Jisōs Kraist. Ilo wāween ko reļam waan im kajoor, kom̧ maron̄ kwaļo̧k ami iakwe, kwaļo̧ke tōmak ko ami, im karuwaineneik ro ipeļaakūm̧i n̄an en̄jake lan̄lōn̄ eo im aenōm̧m̧an eo Rilo̧mo̧o̧r eo im gospel eo An ej bōktok.
Itok n̄an Jeļā Rilo̧mo̧o̧r eo
N̄an m̧ool in jipan̄ ro jet itok n̄an Kraist, jinointata, kwoj aikuj in meļeļe wōn lukkuun E. Jisōs Kraist ej M̧aan eo Nejin Anij im E wōt juon emaron̄ in kar erom̧ Rilo̧mo̧o̧r im Ripinmuur an laļ in.
E wōt emaron̄ mour juon mour ewāppen, pinmuur kōn jerawiwi ko am̧, en̄taan kōn aolep metak am̧ “kaen̄tanaan ko im kapo ko otemjeļo̧k;” (Alma 7:11), innām likūt laļļo̧k mour eo An im bar bōk lōn̄tak jān mej. Kōn Jisōs Kraist, aolep ajri ro nejin Anij renaaj bar juon alen jerkak im maron̄ bōk kōjeraam̧m̧an ko An rekwojarjar tata im aiboojoj.
Ilo am̧ meļeļe wōn eo Rilo̧mo̧o̧r—im ta mejān kajjik eo an indeeo emaron̄ in erom̧ kōn E—kwonaaj kōņaan bwe mour eo am̧ en ilo juon wāween me ej kam̧ōņōņōik E. Im aaet kam̧ōņōņōik E n̄e kwoj kwaļo̧ke gospel eo An, ilo naan im kōm̧m̧an n̄an ro otemjej kwoj iiaio ippān kajjojo raan.
Pukotļo̧k kōn Iakwe
Ilo am̧ itok n̄an jeļā im iakwe Rilo̧mo̧o̧r eo, kwonaaj kōņaan in ļoor E im katak ko An eļapļo̧k, ekoba kien eo An n̄an “iakwe doon” (Jon 13:34).
Ke Ammon ekar etal n̄an RiLeman ro n̄an katakin gospel eo, ekar leļo̧k e n̄e emaron̄ rijerbal an Kiin̄ Lamonai. Ammon ekar kwaļo̧k iakwe eo ejouj im wūjlepeļo̧k n̄e ej kōjparoke siip ko nejin kiin̄ eo. Kōm̧m̧an ko an Ammon rekar kōmeraikļo̧k būruwōn Kiin̄ Lamonai. Ke Ammon ekar katakin gospel eo, Jetōb eo ekar itok ioon Kiin̄ Lamonai, im ekar oktaktok (lale Alma 17–19).
Erom̧ juon rikaļoor em̧ool an Jisōs Kraist meļeļein iakwe ro ritūrūm̧ āinwōt kwe make (lale Matu 22:36–40). Eļan̄n̄e er remaron̄ en̄jake bwe kwoj iakwe im kea kōn er, renaaj kōņaan erom̧ eļapļo̧k m̧ōņōņō bwe kwon kwaļo̧ke men otemjej kwojeļā bwe rem̧ool.
Pukot Peran eo n̄an Kwaļo̧k
Jān Rikanaan Josep Smith, Rilo̧mo̧o̧r eo ekar kōjepļaaktok priesthood eo n̄an laļ in ippān aolep kain̄i ko im bujen ko remennin aikuj n̄an eddōkļo̧k eo ad n̄an indeeo. N̄e ennaan eo eaiboojoj an Jepļaaktok eo ej un̄n̄ūr būruwōm̧, kwonej aikuj in ļam̧ōj ļo̧k kake n̄an ioon bōro̧o̧j ko! Kwoj aikuj in iruj bōk koņaam̧ ilo kwaļo̧ke jeļāļo̧kjeņ in eaiboojoj an gospel eo em̧ōj an jepļaaktok n̄an aolep. Em̧m̧an ippa kōm̧m̧ane menin!
Jet remaron̄ in inepata bwe ro jet reban itok limoier ak naaj jab kōņaan ta eo rej kwaļo̧ke. Aaet, bōlen emaron̄ waļo̧k. Ālkin an Abish kar ettōrļo̧k jān em̧ n̄an em̧ ba n̄an armej ro bwe kajoor eo an Anij ekar itok ioon Kiin̄ Lamonai im aolepān m̧weo im̧ōn, jet rekar tōmak, ak elōn̄ ro jet rekar kāālet n̄an jab ron̄jake (lale Alma 19:17–31).
Mekarta rej bōke ak jaab, mennin letok eo komaron̄ kar leļo̧k n̄an juon m̧ōttam̧ ak uwaan baam̧le eo am̧—ak men̄e juon am̧ rikōjdat—ej gospel eo an Jisōs Kraist. Jar kōn peran, innām, n̄e ekkar, kwaļo̧ke ta eo kwoj jeļā bwe em̧ool.
Leļo̧ke Juon Karuwainene in Bōro Em̧ool
Iien eo ij jerbal āinwōt būreejtōn eo an Canada Toronto Mission, ikar jipan̄ jejjo mijenede ro aō ilo katakin juon em̧m̧aan ewōr an pejnej eo ekajoor. Ālkin katak eo am, ikar karuwaineneiki n̄an jar im kajjitōk ippān Jemedwōj Ilan̄ eļan̄n̄e ennaan eo am ej m̧ool.
“Ijaje kilen jar,” ekar ba.
Ikar jiron̄ e bwe men eo ej aikuj in kōm̧m̧ane ekar būkwelōlō im baj kajjitōk ippān Jemedwōj Ilan̄ n̄an kapene m̧ool eo n̄an e.
“Komaron̄ kōm̧m̧ane men ņe!” Ikar rōjan̄ e.
Kōm̧ ar bukwelōlō ippān doon im em̧m̧aan eo ekar jino jar. Ke ekar m̧ōj an jar, ekar ba, “Ta in ej waļo̧k? Ij jan̄in kar en̄jake jabdewōt men āinwōt in m̧okta”
“En̄ņe ej wāween eo Jemedwōj Ilan̄ ej uwaake jar ko,” ikar ba. “Kwaar kajjitōk, im Ekar uwaak.”
Aolep iien ij katakin mijenede ro im membōr ro aolepān laļ in bwe oktaktok ej ijjino ippān ta eo armej eo ej en̄jake. N̄e kwoj karuwaineneik ro jet n̄an ron̄jake gospel eo, karuwaineneik er barāinwōt n̄an jar im kajjtōk n̄an en̄jake m̧ool eo ilo būruweer. Eļan̄n̄e renaaj kajjitōk ippān Anij (lale Jemes 1:5) kōn juon bōro em̧ool, kōn lukkuun in kōņaan im tōmak ilo Kraist, er remaron̄ bōk juon kapene kōn m̧ool eo jān kajoor eo an Jetōb Kwojarjar (lale Moronai 10:4–5). Ekam̧ōņōņō im lan̄lōn̄ n̄an jipan̄ ro jet loe m̧ool eo n̄an er make.
Keememej Bwe Aolep Jetōb Ej Aiboojoj
Kwoj jāmin jeļā ta enaaj waļo̧k n̄e kwoj jipan̄ ro jet itok n̄an Kraist jān iakwe, kwaļo̧ke, im karuwainene. Rileman ro, n̄an waanjon̄ak, āinwōt armej ro reban bōk gospel eo, ak er rekar erom̧ oktaktok bwe er “raar jamin raar bun̄.” (Alma 23:6–7).
Kwoj aikuj jab kōtmāne waļo̧k in aolep iien kwaļo̧k gospel eo. Ak eļam̧ waan im kajoor, komaron̄ in kam̧ool kake m̧ool eo im jipan̄ kwaļo̧k kadkadin eļapļo̧k n̄an ajri ro nejin Jemedwōj Ilan̄ n̄an gospel eo em̧ōj an jepļaaktok.
N̄e kwonej kile ewi jon̄an aiboojoj eo an aolep ajri ro nejin Jemedwōj Ilan̄ n̄an E, kwonaaj aikuj in kōm̧m̧ane aolep men komaron̄e n̄an jipan̄ ro jet itok n̄an Kraist im juurtok lowaan meram in gospel eo An im n̄an iaļ eo ļo̧k n̄an jab wabanban im mour indeeo.
Ta en̄jake eo eļapļo̧k komaron̄ bōke ilo mour in?