Dominggo sa Hapon nga Sesyon
Magmaya sa Gasa sa mga Yawe sa Pagkapari
Mga Kinutlo
Kon wala ang mga yawe sa pagkapari, walay usa nato ang adunay akses sa gikinahanglan nga mga ordinansa ug mga pakigsaad nga nagbugkos nato ngadto sa atong mga minahal sa kahangtoran ug motugot nato sa pagpuyo uban sa Dios sa kataposan. …
Ang mga yawe sa pagkapari naghatag nato sa awtoridad sa paghatag sa tanang panalangin nga gisaad ngadto ni Abraham ngadto sa matag lalaki ug babaye nga nagtuman sa pakigsaad. Ang buhat sa templo makapahimo niining talagsaong mga panalangin nga maanaa alang sa tanang anak sa Dios, bisan pa asa o kanus-a sila nabuhi, o nagpuyo karon. …
Ang mga yawe sa pagkapari nga gipahiuli pinaagi ni Propeta Joseph Smith nakapahimo niini nga posible alang sa matag lalaki ug babaye nga nagtuman sa pakigsaad nga makatagamtam sa talagsaon nga personal espirituwal nga mga pribilehiyo. …
Minahal kong mga kaigsoonan, ania ang akong saad. Walay laing mas dugang makatabang kaninyo sa paggunit sa gunitanan nga puthaw kaysa pagsimba sa templo kanunay kon gitugot sa inyong mga sirkumstansiya. Walay laing mas dugang makapanalipod kaninyo samtang inyong masugatan ang mga gabon sa kangitngit sa kalibotan. Walay laing makapalig-on sa inyong pagpamatuod alang ni Ginoong Jesukristo ug sa Iyang Pag-ula o makatabang kaninyo nga mas dugang makasabot sa talagsaong plano sa Dios. Walay laing mas dugang makahupay sa inyong espiritu atol sa mga panahon sa kasakit. Walay laing mas dugang moabli sa kalangitan. Wala!
Ang templo mao ang ganghaan sa daghang panalangin sa Dios alang sa matag usa kanato, kay ang templo mao lamang ang dapit sa yuta diin atong madawat ang tanan nga panalangin nga gisaad ngadto ni Abraham. …
Magmaya kita sa pagpahiuli sa mga yawe sa pagkapari, nga maoy nakapahimong posible kaninyo ug kanako nga makatagamtam sa matag espirituwal nga panalangin nga andam ug takos natong dawaton.