Sabado sa Buntag nga Sesyon
Maayo ra ang Tanan Tungod sa mga Pakigsaad sa Templo
Mga Kinutlo
Mga kaigsoonan, ako mapainubsanong mopamatuod nga kon kita motambong sa templo, kita mapahinumdoman sa mahangtoron nga kinaiyahan sa atong mga espiritu, sa atong relasyon sa Amahan ug sa Iyang balaan nga Anak, ug sa atong labing gitinguha nga makabalik sa atong langitnong panimalay. …
Pinaagi sa giya sa dinasig nga pagpangulo ni Presidente Nelson, gipaspasan sa Ginoo, ug mopadayon pa nga gipaspasan, ang pagtukod og mga templo sa tibuok kalibotan. Maghatag kini sa tanang anak sa Dios og oportunidad sa pagdawat sa mga ordinansa sa kaluwasan ug kahimayaan ug sa paghimo ug pagtuman sa sagrado nga mga pakigsaad. …
Ang kanunay nga pag-apil sa mga ordinansa sa templo makamugna og sundanan sa debosyon ngadto sa Ginoo. Kon kamo motuman sa inyong mga pakigsaad sa templo ug mohinumdom niini, kamo nagdapit sa pakig-uban sa Espiritu Santo aron sa paglig-on ug paglimpyo kaninyo. …
Pinaagi kini sa mga pakigsaad sa pagselyo diha sa templo nga atong madawat ang kasegurohan sa mahigugmaong mga koneksyon sa pamilya nga magpadayon human sa kamatayon ug molungtad sa kahangtoran. Ang pagtahod sa mga pakigsaad sa kaminyoon ug sa pamilya nga gihimo diha sa mga templo sa Dios mohatag og proteksiyon gikan sa kadaotan sa pagkahakog ug garbo. …
Ang mga pagsulay, mga hagit, ug mga kasakit seguradong moabot natong tanan. Walay usa nato nga luwas gikan sa “mga tunok sa unod” [tan-awa sa 2 Mga Taga-Corinto 12:7–10]. Apan, kon motambong kita sa templo ug mohinumdom sa atong mga pakigsaad, makaandam kita sa pagdawat og personal nga paggiya gikan sa Ginoo.
Minahal kong mga kaigsoonan, ako mohatag og pagsaksi nga walay mas importante pa kaysa pagtahod sa mga pakigsaad nga inyong gihimo o himoon diha sa templo.