Dominggo sa Buntag nga Sesyon
Ang Gamhanan, Balik-balik nga Pagkamahiyason sa Doktrina ni Kristo
Mga Kinutlo
Let Him In [Pasudla Siya], ni Malory Fiso
Ang kadasig sa espirituhanong paglambo mahitabo “sa tibuok kinabuhi samtang kita balik-balik nga modawat sa doktrina ni Kristo.” Ang pagbuhat niini, si Presidente Russell M. Nelson mitudlo, makahatag og “gamhanan, balik-balik nga pagkamahiyason.” [Buntoga ang Kalibotan ug Pangita og Kapahulayan,” Liahona, Nob. 2022, 97]. Gani, ang mga elemento sa doktrina ni Kristo—sama sa hugot nga pagtuo diha ni Ginoong Jesukristo, paghinulsol, pagsulod sa relasyon sa pakigsaad ngadto sa Ginoo pinaagi sa bunyag, pagdawat sa gasa sa Espiritu Santo, ug paglahutay ngadto sa kataposan wala gitumong nga masinati sa usa lamang ka higayon, tsekan kon nahuman na ug dili na hinumdoman pa. …
Ang atong hugot nga pagtuo diha ni Jesukristo kinahanglan nga maamumahan matag adlaw. Kini maamumahan kon kita mag-ampo matag adlaw, magtuon sa mga kasulatan matag adlaw, mamalandong sa kaayo sa Dios matag adlaw, maghinulsol matag adlaw, ug mosunod sa mga pag-aghat sa Espiritu Santo matag adlaw. …
… Ang kadasig sa paglambo sa samang paagi molig-on samtang maningkamot kita sa pagsunod sa mga sugo sa Dios ug maghinulsol. …
Ang sunod nga elemento sa doktrina ni Kristo mao ang bunyag, nga naglakip sa bunyag sa tubig ug, pinaagi sa pagkompirma, ang bunyag sa Espiritu Santo. Bisan kon ang bunyag kausa ra mahitabo, kita balik-balik nga magbag-o sa atong pakigsaad sa bunyag sa higayon nga kita moambit sa sakramento. …
Samtang ang Espiritu mohatag og mas dakong impluwensiya sa atong mga kinabuhi, kita sa mauswagon ug sa pabalik-balik nga paagi makapalambo og Kristohanon nga mga kinaiya. … Ug kita sa ingon makagamit sa langitnong gahom nga gikinahanglan aron makalahutay ngadto sa kataposan. …
Ako modapit ninyo nga mosunod sa doktrina ni Kristo sa balik-balik, pagbalik-balik, ug intensiyonal nga paagi ug motabang sa uban sa ilang pagpadayon.