Dominggo sa Buntag nga Sesyon

Ang Tuyo sa Dios Mao ang Pagdala Kaninyo Balik sa Panimalay

Mga Kinutlo

Ni Elder Patrick Kearon

Sa Korum sa Napulog Duha ka Apostoles

Ang tanang butang kabahin sa plano sa Amahan alang sa Iyang minahal nga mga anak gituyo aron sa pagdala sa tanan balik sa panimalay. …

Nagpasabot ba kini nga ang bisan unsang butang mahimo ra kon giunsa nato sa pagpakabuhi? … Wala, siyempre wala. … Sa sukaranan nga gipasabot sa tanan Niyang mga pagtulon-an nga magpuyo sa mas taas nga kahimtang sa moral nga pamatasan mao ang usa ka tawag sa personal nga kauswagan, sa makausab nga hugot nga pagtuo diha ni Kristo, ngadto sa usa ka dakong kausaban sa kasingkasing. …

Kon kita motuo sa tuyo sa plano sa Amahan alang sa tanan nga mao ang pagluwas kanato, pagtubos kanato, paglugway sa kaluoy ngari kanato, ug sa ingon modala kanato og kalipay, unsa man ang tuyo sa Anak kinsa mipahinabo niining dakong plano? …

Ang kabubut-on ni Jesus mao ang mabinationg kabubut-on sa Amahan! Gusto Siya nga mahimo kining posible alang sa tanang anak sa Iyang Amahan nga makadawat sa kinadak-ang tumong sa plano—kinabuhing dayon uban Kanila. Walay usa ka tawo nga dili apil gikan niining balaan nga potensiyal. …

Ang Manluluwas, ang Maayo nga Magbalantay, mangita sa Iyang nawala nga karnero hangtod nga kini Iyang makit-an. …

Dili, Siya wala magbutang og mga babag ug mga ali; gitangtang Niya kini. Siya wala magpugong kaninyo; Siya nag-abiabi kaninyo pasulod. …

Kini ang maayong balita! Dili igo ang akong pulong sa pagkamapasalamaton alang niining yano nga mga kamatuoran. Ang desinyo sa Amahan, ang Iyang plano, ang Iyang tuyo, ang Iyang tumong, ang Iyang gipangandoy, ug ang Iyang gilaoman ang tanan aron mamaayo kamo, ang tanan aron paghatag kaninyo og kalinaw, ang tanan aron pagdala kaninyo, ug kadtong inyong mga gihigugma, balik sa panimalay.

Ilailaha si Elder Patrick Kearon

Natawo niadtong Hulyo 18, 1961 sa Carlisle, Cumberland, England.
Nagpuyo sa Arabia sulod sa pipila ka tuig uban sa iyang pamilya.
Nagsugod sa pagpuyo sa eskwelahan sa England sa dihang 10 anyos pa siya. “Sayon ra kaayo ni Harry Potter nga didto sa Hogwarts kon itandi,” siya miingon bahin sa pagpuyo sa eskwelahan. “Lisod kadto.” Apan, sa Arabia ug sa England, siya miingon, “nakahimamat ko og daghang lainlain nga mga tawo” ug “nakakat-on ko pinaagi sa kasinatian nga kadaghanan sa mga panaglahi maayo, gani, talagsaon! Ang akong kinabuhi milambo sa hilabihan pinaagi sa pakig-interaksiyon sa mga tawo nga lainlain og mga kultura ug mga gituohan sa daghang bahin sa kalibotan.”
Napaakan og tanga [scorpion] ang iyang tiil sa dihang siyete anyos pa siya samtang nagkamping.
Isip usa ka nuybe anyos nga anaa sa disyerto sa Arabia, gitudloan siya sa iyang amahan kon unsaon pagdrayb.
Nabunyagan sa Bisperas sa Pasko niadtong 1987 sa edad nga 26.
Nahimamat ang iyang asawa, si Jennifer, samtang mibisita si Jennifer sa London aron moeskwela sa gawas sa nasod. Naminyo sila sa Oakland California Temple niadtong Enero 1991.
Adunay upat ka anak: si Sean (namatay nga masuso pa), si Elizabeth, si Susannah, ug si Emma.
Nagtrabaho sa United Kingdom, Saudi Arabia, ug sa Estados Unidos sa daghang industriya. Siya ug ang iyang asawa sa makausa nagpadagan sa ilang kaugalingong negosyo sa komunikasyon.
Gipaluyohan isip Kinatibuk-ang Awtoridad niadtong Abril 3, 2010.
Gitawag ngadto sa Korum sa Napulog Duha ka Apostoles pagka-Disyembre 7, 2023. “Kining sagrado nga tawag bug-at kaayo ug nakahimo nakong mapaubsanon,” siya miingon. “Kinahanglan nakong ibutang ang tanan nakong pagsalig diha sa Manluluwas samtang nagtinguha ko nga mahimong sa unsay gusto niya nga ako mamahimo ug mopakigbahin sa akong pagsaksi sa Iyang gugma ug kahayag. … Gihigugma nako Siya. Maningkamot ko nga moserbisyo Kaniya kutob sa akong mahimo.”