Dominggo sa Hapon nga Sesyon
Mga Templo, Mga Balay sa Ginoo Gitukod sa Nagkadaiyang Dapit sa Kalibotan
Mga Kinutlo
Naghunahuna ba kamo kon ngano nga ang Ginoo mosugo sa Iyang propeta sa pagtukod sa tibuok yuta karon og Iyang balaan nga mga balay, ang Iyang mga templo? …
… Usa ka rason mao nga taliwala sa kasamok ug mga tentasyon sa kalibotan, Siya misaad sa paglig-on ug pagpanalangin sa Iyang mga Santos sa pakigsaad, ug ang Iyang mga saad natuman! …
Diha sa Iyang balay, kita literal nga tugahan og langitnong gahom. Ang atong hugot nga pagtuo diha kang Jesukristo ug ang atong gugma alang Kaniya makompirmar ug mapalig-on. Kita makakat-on sa paghigugma Kaniya nga mas labaw pa. Kita espirituwal nga maseguro sa atong tinuod nga pagkatawo ug sa mga katuyoan sa kinabuhi. Kon kita magmatinud-anon, kita mapanalanginan og proteksiyon gikan sa mga tentasyon ug mga makabalda. Mabati nato ang gugma sa atong Manluluwas samtang Siya mobayaw kanato gikan sa atong mga kalisod ug mga kasub-anan. Kita gisangkapan sa gahom sa Dios. …
Akong hinigugma nga mga higala, kon kita makahimo ug wala pa midugang sa atong pagtambong sa templo, buhaton nato nga makanunayong mangita og dugang nga panahon sa pagsimba diha sa balay sa Ginoo. …
Ang templo mao gayod ang balay sa Ginoo. Ako mosaad kaninyo nga kon kamo takos ug mainampoon nga moadto sa Iyang balaan nga balay, kamo masangkapan sa Iyang gahom, ang Iyang ngalan maanaa diha kaninyo, ang Iyang mga anghel magbantay kaninyo, ug kamo molambo diha sa panalangin sa Espiritu Santo. …
Niini nga adlaw sa kalibog ug kasamok, ako mopamatuod nga ang templo mao ang Iyang balaan nga balay ug motabang sa pagpreserbar kanato, pagpanalipod kanato, ug pag-andam kanato alang sa mahimayaon nga adlaw sa dihang, uban sa Iyang tanan nga balaan nga mga anghel, ang atong Manluluwas mobalik sa kahalangdon, gahom, ug dakong himaya.