Sabado sa Buntag nga Sesyon
Himoa ang Ginoong Jesukristo nga Inyong Tigpanalipod
Mga Kinutlo
Ang atong Amahan gusto og mas lawom nga relasyon sa tanan Niyang mga anak nga lalaki ug babaye, apan kini atong pagpili. Kon kita mopili nga mas magpaduol ngadto Kaniya pinaagi sa usa ka relasyon sa pakigsaad, kini motugot Kaniya nga mas mopaduol nganhi kanato ug mas mopanalangin kanato.
… Si Jesukristo mao ang sentro sa tanang pakigsaad nga atong gihimo, ug ang mga panalangin sa pakigsaad nahimong posible tungod sa Iyang maulaong sakripisyo.
Ang bunyag pinaagi sa pagpaunlod mao ang simbolikanhong ganghaan diin kita mosulod ngadto sa usa ka relasyon sa pakigsaad uban sa Dios. Ang pagpaunlod sa tubig ug paghaw-as og usab usa ka simbolo sa kamatayon ug Pagkabanhaw sa Manluluwas alang sa bag-ong kinabuhi. … Sa Bag-ong Tugon atong mabasa, “Gibunyagan kamo aron mahiusa kang Kristo busa nakaambit kamo sa kinaiya ni Kristo” [Mga Taga-Galacia 3:27]. …
Ang ordinansa sa sakramento nagpunting usab ngadto sa Manluluwas. Ang pan ug tubig nagsimbolo sa lawas ug dugo ni Kristo nga gipaagas alang kanato. … Samtang kita mihimo sa aksiyon sa pagkaon ug pag-inom sa mga simbolo sa Iyang lawas ug dugo, si Kristo sa simbolikanhong paagi nahimong kabahin nato [tan-awa sa Juan 6:56]. …
Samtang kita naghimo og pakigsaad sa Dios diha sa balay sa Ginoo, mas gipalawman nato ang atong relasyon uban Kaniya. Tanan nga atong gibuhat diha sa templo nagpunting kanato ngadto sa plano sa atong Amahan alang kanato, diin ang sentro mao ang Manluluwas ug ang Iyang maulaong sakripisyo. …
… Ang atong garment sa templo nagpahinumdom kanato nga ang Manluluwas ug ang mga panalangin sa Iyang Pag-ula magtabon kanato sa tibuok natong kinabuhi. Samtang atong gisul-ob ang garment sa balaan nga pagkapari matag adlaw, kanang maanindot nga simbolo mahimong kabahin nato. …
… Ako mopamatuod nga ang dako nga mga panalangin niana nga relasyon sa pakigsaad tukma gayod kaayo sa kantidad sa pagkadisipulo.