M̧wen̄an eo an Ālkin Rālep in Jabōt
M̧ōņōņō kōn Menin Letok eo an Priesthood Kii ko
M̧eļeļe ko litok n̄an kōnono in
N̄e ejjeļo̧k priesthood kii, ejjeļo̧k iaad enaaj kar būki kain̄i im bujen ko raorōk im rej kapen kōj n̄an ro jej iakwe er indeeo im kōtļo̧k ad mour ippān Anij. …
Priesthood kii ko rej letok n̄an kōj mālim n̄an leļo̧k aolep kōjeraam̧m̧an ko kar kallim̧ur kaki n̄an Ebream n̄an aolep em̧m̧aan im kōrā ro rej kōjparok bujen ko. Jerbal ko an tampeļ ej kōm̧m̧an bwe kōjeraam̧m̧an kein ren pād n̄an aolep ajri ro nejin Anij, mekarta ia ak n̄āāt rekar mour ak rej mour kiiō. …
Priesthood kii ko kar kōjepļaaktok kōn Rikanaan Josep Smith ekōm̧m̧an bwe en pidodo n̄an aolep em̧m̧aan im kōrā eo ej kōjparok bujen n̄an bōk aiboojoj in kōjeraam̧m̧an ko aer make ilo jetōb. …
Ro jeiū im jatū rejitenbōro, en̄in ej aō kallim̧ur. Ejjeļo̧k juon men enaaj jipan̄ eok eļapļo̧k n̄an jirok likatōttōt ilo aen in dābdep eo eļapļo̧k jān kabun̄jar ilo tampeļ eo aolep iien ilo an jekjek ko am̧ kōtļo̧k. Ejjeļo̧k men enaaj kōjparok eok eļapļo̧k ilo am̧ ioon tarpok ko an laļin. Ejjeļo̧k men eļapļo̧k enaaj kakajoor naan in kam̧ool eo am̧ kōn Irooj Jisōs Kraist im Pinmuur eo An ak jipan̄ eok meļeļe karōk em̧m̧anm̧ōn eo an Anij. Ejjeļo̧k men enaaj kaenōm̧m̧an jetōb eo am̧ eļapļo̧k ilo iien ko reppen. Ejjeļo̧k men enaaj kōpeļļo̧k lan̄ ko eļapļo̧k. Ejjeļo̧k!
Tampeļ eo ej kōjam̧ eo n̄an kōjeraam̧m̧an ko reļļaptata Anij ekar kōjparoki n̄an kōj kajjojo, bwe tampeļ eo ej jikin eo wōt ilo laļ in ijo jemaron̄ bōke aolep kōjeraam̧m̧an ko kar kallim̧ur kaki n̄an Ebream̧. …
Jen m̧ōņōņō kōn jepļaaktok in priesthood kii ko,im rej kōm̧m̧an bwe en pidodo n̄an kwe im n̄a n̄an jeram̧m̧an kake aolep jetōbin kōjeraam̧m̧an ko jej m̧ōņōņō im erreeo n̄an bōke.