M̧wen̄an eo an Ālkin Rālep in Jabōt
Tampeļ ko, Ṃōko Im̧ōn Irooj rej Ekkal Peļaakin Laļin
Jidik in kōnono in
Kwonan̄in ke kar ļōmņak etke Irooj emaron̄ tōl rikanaan eo An kiiō n̄an kobrak laļin kōn m̧ōko Im̧ōn rekwojarjar, tampeļ ko An? …
… Juon wun ej bwe ilubwilijin jorrāān im kapo ko an laļ in, Ekar kallim̧ur n̄an kōkajoorļo̧k im kōjeraam̧m̧an armej in bujen ro An rekwojarjar, im kallim̧ur ko An rej kūrm̧ool! …
Ilo m̧iin Im̧ōn, jej lukkuun bōk kwojarjar in lan̄ ekajoor. Ad tōmak ilo Jisōs Kraist im ad iakwe n̄an E ej pen im kwojarjar. Jej ekkatak n̄an iakwe E eļapļo̧k. Em̧ōj jiron̄ kōj ilo jetōb kōn wōn eo kōj im wūnin mour in. Ilo ad tiljek, jej jeraam̧m̧an kōn kōjparok jān māllijon̄ ko im abwilōn̄lōn̄ ko. Jej en̄jaake iakwe eo an adwōj Rilo̧mo̧o̧r ilo an ļōn̄aj kōj jen men ko ad reppen im būrom̧ōj ko ad. Jenaaj pālpel kōn kajoor eo an Anij. …
Ro jera rejitōnbōro, n̄e jekar maron̄ im jan̄in pojak in kaļapļo̧k ad pād ilo tampeļ eo, jen kapukot elōn̄ ļo̧k iien n̄an kabun̄ jar ilo m̧weo im̧ōn Irooj. …
Tampeļ eo ej lukkuun im̧weo im̧ōn Irooj. Ij kallim̧ur kom̧ ilo ami itok ilo erreo im ilo eļap jar n̄an m̧wiin Im̧ōn ekwojarjar, kom̧ naaj maron̄ pālpel kōn kajoor eo An, Etan en pād ioomi, Enjeļ ro An en wōr aer eddo ioomi, im kom̧ naaj eddōkļo̧k ilo kōjeraam̧m̧an ko an Jetōb Kwojarjar eo. …
Ilo raan in tarpok im poktak, ij kam̧ool bwe tampeļ eo ej m̧weo Im̧ōn im naaj jipan̄ kojparok kōj, oņaake kōj, im kepooj kōj n̄an raan eo eaiboojoj n̄e, ippān aolep enjeļ ro An rekwojarjar, ad Rilo̧mo̧o̧r ej bar jepļaaktok ilo botata, kajoor, im eļap aiboojoj.