M̧wen̄an eo an Jibbon̄ in Jādede
Aolep Men Naaj Em̧m̧an Kōn Bujen ko an Tampeļ
Jidik in kōnono in
Ro jeiū im jatū, ij kam̧ool ilo ettā bwe ilo ad etal n̄an tampeļ eo, jemaron̄ keememej kōn piktokin jetōb ko ad indeeo, jem̧jerā eo ad ippān Jemād im Nejin Ekwojarjar, im ikdeleel eo ad eļap n̄an ro̧o̧lļo̧k n̄an m̧weo im̧ōd ilan̄. …
Iumm̧in tōl eo eim̧we an Būreejtōn Nelson, Irooj em̧ōj jino m̧ōkaj an em̧m̧akūt m̧aanļo̧k, im enaaj wōnm̧aanļo̧k wōt im m̧ōkaj an em̧m̧akūt m̧aanļo̧k, kōn ekkal ko an tampeļ ko ipeļaakin laļ in. Menin enaaj kōtļo̧k an aolep ajri ro nejin Anij bōk kain̄i in lo̧mo̧o̧r ko im mour ijo eutiejtata im kōm̧m̧an im kōjparok bujen ko rekwojarjar. …
Emakijkij in bōk koņaad ilo kain̄i ko an tampeļ eo emaron̄ ejaake juon jon̄ak in wūjlepļo̧k n̄an Irooj. N̄e kwoj kōjparok bujen ko an tampeļ im keememeji, kwoj karuwaineneik jitibōn jemjerā eo an Jetōb Kwojarjar n̄an jim̧or kōkajoorļo̧k im karreoik eok. …
Ej wōt ilo liāp in bujen ko ilo tampeļ eo im jemaron̄ bōk jeļā eo ewāppen kōn ekkejel ko an baam̧le im remaron̄ wōnm̧aanļo̧k ālkin mej im n̄an indeeo. Kautiej m̧are im bujen ko an baam̧le, kar kōm̧m̧ani ilo tampeļ ko an Anij enaaj bōktok kōjparok jān nana eo an ļōmņak kōn kōj make im utiej bōro. …
Mālijjon̄ ko, apan̄ ko im rub in bōro ko aaet renaaj itok n̄an kōj aolep. Ejjeļo̧k iaad rej kōjparok jān “kālōklōk ilo kanniōk” [lale 2 Korint 12:7–10]. Aaet, ilo ad etal n̄an tampeļ eo im kakeememej bujen ko ad, jemaron̄ m̧aanjabpopo n̄an ad bōk iaļen tōl ko ad make jān Irooj. …
Ro jeiū im jatū jitōn bōro, ij kwaļo̧k aō kam̧ool bwe ejjeļo̧k juon men eļapļo̧k an aorōkļo̧k jān kautiej bujen ko kwaar kōm̧m̧ani ak naaj kōm̧m̧ani ilo tampeļ eo.