“O le Mana o le Faauooga ma le Molimau,” Mo Le Malosi o le Autalavou, Iuni 2024.
O le Mana o le Faauooga ma le Molimau
Tatala atu lou loto i au uo ma faasoa atu mea ua e iloa e moni.
Ata na tusia e Andrew Roberts
I se tasi aso malulu i tausaga ua mavae, sa faaalu ai e ni faifeautalai se toalua ni itula e faafesootai ai tagata i magaala o Nagano, Iapani. Sa la talanoa i ni nai tagata, faia ni nai taimi faatulagaina e aoao atu ai, ma faamautinoa o na taimi faatulagaina uma sa faataunuuina.
I le faaiuga o lenei aso faigata, sa feiloai ai faifeautalai i se alii talavou, sa na o le 15 tausaga le matua, o lē sa fiafia e aoao e uiga i le Ekalesia.
O lena alii talavou o a’u.
Sailia o le Faauooga
Sa ou feiloai i se tasi o faifeautalai i lena aso a o ou agai atu i le fale mai le aoga. Sa ia aoaoina au e uiga i le Uluai Faaaliga ma molimau mai e moni. Ou te lei malamalama i mea uma i lena taimi, ae sa ou manao e aoao atili.
E lua vaiaso mulimuli ane, na valaaulia ai au e faifeautalai i se pati o le Kerisimasi i le lotu. Ina ua ou taunuu atu, sa faalia uiga faauo o tagata uma! Sa latou faafeiloaia au i le ataata ma faatalofa ma valaau mai ia te au o Uso Wada. Sa ou mafaufau pe na faapefea ona latou iloa lo’u igoa ma pe aisea na latou valaauina ai a’u iā uso. Na ou iloa mulimuli ane, na ta’u atu e faifeautalai i tagata uma o lea ou te sau. Sa ou lagonaina le taliaina ma le manaomiaina.
Ina ua amata ona usuina e tagata uma viiga o le Kerisimasi, sa latou fai mai ia te au ou te auai faatasi ma i latou. A o matou usuina le “Le Lalolagi ia Fiafia” (Viiga, nu. 113)—o se viiga fou mo au—sa faia e tagata o le Paranesi a Nagano ia ou lagona le avea o a’u ma ni ō. E lei umi ae ua avea i latou ma ni uo lelei.
A o e alu atu i le lalolagi, aapa atu i isi i le tele e mafai ai. O lenei mea e taitai atu ai i lagona o le auai lea e masani ona tuputupu ae i ni faauooga. O faauooga moni, e faavae i le faasoaina atu o le alofa o le Atua ma le taumafai e alofa atu i isi e pei ona Ia faia, o le a faamanuiaina ai lou olaga e faavavau.
O Le Iloaina o le Upumoni
Na aoaoina au e faifeautalai mo le silia ma se tausaga. Sa ou auai i le lotu ma faaauau pea ona fegalegaleai ma tagata o le ekalesia. Sa matou taaalo faatasi i taaloga ma talanoa e uiga i le tele o mea. Na uunaia au e mulimuli i le Faaola ma papatisoina, ae sa ou popole.
O o’u matua o ni tagata tu’uto o le faatuatuaga Puta ma sa la le ioeina lo’u aoao e uiga i le Ekalesia. I le manao ai e faafetaiaia faamoemoega o lo’u aiga, sa ou fai atu ai i faifeautalai e le mafai ona ou papatiso. Ae o upumoni o le talalelei toefuataiina a Iesu Keriso sa uunaia ai au ou te alu atu i se ala ese mai le auala e tasi na tulimatai atu e le toatele o tagata na siomia au. Sa tatau ona ou filifili mo a’u lava po o le fea ala e ui ai.
O le tele o lo’u mafaufau i ai, o le tele foi lea o lo’u lagona e tatau ona ou tatalo. Sa ou tootuli i autafa o lo’u moega ma tatalo leotele mo le taimi muamua o lo’u olaga. Ae ou te lei faamaeaina, sa faamanino mai e le Agaga Paia ia te a’u ua ou mauaina le upumoni. Ae mata o le a se manatu o ou matua?
Ina ua iloa e o’u matua lo’u manao e papatiso, sa la faate’ia a’u i le ioeina o le o mai o faifeautalai mo se asiasiga. Ina ua la taunuu mai i lo matou fale, sa maua e ou matua se lagona lelei. Ina ua uma ona talanoa mo sina taimi, sa valaaulia i matou e faifeautalai e usu se viiga, “A i ai i le Aiga le Alofa” (Viiga, nu. 181). A o matou pepese faatasi, sa maligi loimata o lo’u tina. Sa ootia tagata uma.
O lenei aafiaga na faamaluluina ai loto o o’u matua, ma i le tausaga ma le valu masina talu le matou feiloaiga muamua ma faifeautalai, na ou papatiso ai. Mulimuli ane sa ou auauna atu i se misiona i Iuta ma sa tele ni avanoa matagofie na ou maua i le Ekalesia.
Alofa ma le Faasoa Atu
Pe na e tu ea ma mafaufau pe na faapefea ona faamanuiaina lou olaga e le talalelei a Iesu Keriso? I le faia o lena mea, o le a faatumulia ai oe i le alofa mo le Atua ma malamalama atili ai e alofa tele o Ia ia te oe o lea na Ia auina mai ai Lona Alo Pele e Toatasi ma taua, o Iesu Keriso, i le lalolagi e faamalosia ma siitia oe a o e sau ia te Ia.
Pe a e lagonaina lenei alofa, ou te faamoemoe o le a e tali atu e ala i le tatalaina o lou loto i e pele ia te oe ma isi ma faasoa atu mea ua e iloa e moni. Ua faamanuiaina lo’u olaga ona o uo o e na aapa mai ia te a’u ma faasoa mai lo latou alolofa i le Faaola ma Lana talalelei ia te a’u. Ua faamanuiaina foi a’u a o faaauau pea ona ou faamalosia la’u molimau e ala i le tatalo, suesueina o le soifuaga ma aoaoga a Iesu Keriso, ma filifili e avea ma Ona soo. E mafai ona e faia lena lava mea e tasi!
A o e taumafai e manatua folafolaga na e faia ina ua e papatiso ma maua le meaalofa o le Agaga Paia, ua folafola mai e le Atua ia te oe o le Agaga Paia o le a “faaali mai ia te outou mea uma e tatau ona outou faia” (2 Nifae 32:5). Faamolemole ia faatuatua i Lana folafolaga. E mafai ona taialaina oe i le ala sao i mea uma e te faia ma tautala atu ai. E mafai ona e aapa atu i faauooga ma valaaulia isi e faalogo i lau molimau. Ou te iloa o lenei mea e mafai ai ona sili atu lou fiafia nai lo se isi lava mea e mafaia.