O Leo o le Autalavou

UaLava Lea mo A’u

tamaitai talavou

Ina ua ou siitia atu i Aialani, o o’u talitonuga na ou lagona ai le ese mai isi tagata uma. Sa ou iloaina e tatau ona ou fuafuaina pe aisea na ou faia ai mea sa ou faia. I le mae’a ai o ni nai suesuega, sa ou filifili ai o lea ou te fiafia i le ola ai i poloaiga.

Ae o le tausaga na te’a nei, sa ou oo ai i lea lava mea e tasi. Sa amata ona ou mafaufau e uiga i le mea ou te manao e fai pe a ou faau’u i le aoga, e pei o le pe ou te alu i se misiona. Sa ou iloa afai ou te auauna atu i se misiona, e manaomia ona ou talitonu i mea o le a ou aoaoina atu i tagata.

Sa amata ona loloto a’u suesuega o mataupu faalelotu. O le mea e sili ona taua, sa ou amataina se suesuega loloto o le Tusi a Mamona. O le taimi muamua lea ua ou faitauina lemu ai ma le agaga tatalo le Tusi a Mamona. Sa ou mafaufau e faafuasei ona ou iloa e moni le tusi, e pei ona sa faia e lo’u tamā ina ua ia auai i le Ekalesia. Sa ou iloaina ina ua ou faitauina, sa ou lagona le fiafia ma le latalata atili i le Atua. Ae ou te lei mauaina lena lava lagona ootia e tasi.

Sa ou sefeina le mataupu mulimuli e faitau faatasi ma faifeautalai i la matou eria. E aunoa ma le iloaina o o’u lagona, sa amata ona talanoa mai se tasi o i laua e uiga i le auala na ia maua ai se aafiaga faapena. Fai mai a ia, mo nisi tagata, o le mauaina o se molimau e pei lava o se ki o le moli ua faaola. Ae mo isi, e pei lava o le la o lo’o oso a’e. “Ma ua lava lena mo a’u,” na fai mai ai o ia.

Ou te lē atoatoa. E misi ona ou faitau i isi aso, ona ua galo ia te au, po o nisi taimi ona ou te faia ni alofaga e aua ai nei faitau. O loo tuputupu ae pea la’u molimau i le Tusi a Mamona. Ae ou te talitonu e moni lava. E i ai ia te a’u se alofa loloto mo le Tusi a Mamona. O le tele o lo’u faitauina, o le faateleina foi lea o le tuputupu ae o lena alofa, ma taliina ai a’u fesili.

Ma i le taimi nei, ua lava lena mo a’u.

Meka S., 17 tausaga, Dublin, Aialani

Fiafia i faatufugaga, tolosē, ma le taina o le kitara.