Fesili ma Tali

“E le’i leva atu talu ona maliu lo’u tamā. E faapefea ona ou toe lagonaina le fiafia? O ia o la’u uo mamae.”

“Faafetai i le Togiola a le Alii, o le toetu o se mea moni, ma o le ola faavavau o se mea e mafai ona maua e tagata ola uma. … Mo e pele faanoanoa ua tuua … e faanaina le tiga o le oti e ala i se faatuatua mausali ia Keriso, o se susulu atoatoa o le faamoemoe, o le alofa o le Atua ma tagata uma, ma se naunautaiga loloto e auauna atu ia te i latou.”

Peresitene Russell M. Nelson, “O Le Taimi Lenei e Sauniuni Ai,” konafesi aoao ia Ape. 2005. (Ensign po o le Liahona, Me 2005, 18).

“O le a tatou toetutu uma lava, e aofia ai ma lou tamā. O le a matagofie lena aso. O le tatalo i le Alii mo se fesoasoani e fesoasoani foi i lenei faigata.”

Laura L., 11, Rio Grande do Sul, Pasila

“Na maliu lou tamā a o ou laitiiti. O le fiafia e mafai ona pei o se mea e le mafai ona oo mai. Ae peitai, e mafai ona ou molimau atu e le o se mea e le mafai ona ausia. O le iloaina, e ala i le fuafuaga a le Tama Faalelagi, o le oti e le o le mutaaga lea, ua aumaia ai ia te a’u le fiafia sili atu nai lo le mea e mafai ona maua i se isi lava mea. Ia maua le mafanafana i le iloaina o le a e toe faatasi ma lou tamā.”

Christina V., 18, Texas, ISA

“Ua ou iloa e mafai ona ou tumau i le fiafia e ala i le vaavaai mo vavega. Manatua ma mafaufau i auala na saunia ai oe e le Alii mo lou tofotofoga. Ou te iloa a ou alu i le malumalu, ou te lagonaina le malosi o le latalata mai o lo’u tamā iina. Tatalo ina ia e lagonaina lou tamā faatasi ma oe ma lagona le mafanafana o le Alii.”

Madison R., 13, Iuta, ISA

“Ona sa maliu Iesu mo i tatou, ua tatou maua ai le avanoa e toe ola ai. Vaai atu ia i latou e te alofa i ai o siomia oe, ma o le a faamafanafanaina oe e le Agaga i ou tofotofoga. Ia manatua na lagona ma e silafia e Iesu mea o loo feagai ma oe, ma e le tuua lava na o oe.”

Brinlee F., 13, Texas, ISA

“Talu ona maliu lo’u tamā, ua ou iloa ai o le alu atu e faia sui papatisoga i le malumalu e fesoasoani ou te fiafia ai. E le faigofie i taimi uma ona manatua manatuaga lelei pe a e faanoanoa. Peitai, e mafai ona e fiafia teisi atu i aso taitasi e ala i le faia o auaunaga mo isi e pei o galuega faalemalumalu ma talafaasolopito o aiga.”

Ivory M., 13, Iowa, ISA

O tali ua faamoemoe mo se fesoasoani ma se vaaiga, ae e lē o ni faalauiloaga aloaia o aoaoga faavae o le Ekalesia.

O Le A Sou Manatu?

“Ou te le o mautinoa tele e uiga i nisi mea na tutupu mai le Talafaasolopito o le Ekalesia. O le a se mea e tatau ona ou faia i a’u fesili?”

Auina mai lau tali ma lou ata ae le‘i oo i le aso 15 o Iulai, 2024.

Imeli mai ia i matou i le [e-mail]. Pe alu i le ftsoy.ChurchofJesusChrist.org ma kiliki le “Auina Atu Lau Galuega.” Saini e alu i totonu i lau Faitotoa a le Ekalesia ona filifili lea o le “Mo Le Malosi o le Autalavou” i lalo o le “Filifili le Mekasini.” Kiliki le “Faaopoopo le Faila” e filifili ai lau faila ma ata, ona kiliki lea o le “Auina Atu” e utaina ai ma auina mai ai ia i matou lau faila.

E ono sui ia tali mo le uumi po o le manino.