“O Se Molimau E Pei …,” Mo Le Malosi o le Autalavou, Iuni 2024.
O Se Molimau E Pei…
Ata na tusia e Uran Duo
I le taimi o Lona soifuaga, sa aoao atu ai e le Faaola tagata e ala i le faaaogaina o faataoto ma tala. O nisi taimi sa Ia faaaogaina ai ni tala se tele e aoao atu ai le mea lava e tasi (e pei o iai i le Luka 15).
E mafai ona fesoasoani le tilotilo i se mataupu faavae o le talalelei mai le tele o itu eseese. O ni nai auala nei e vaai ai i se molimau o le talalelei a Iesu Keriso, e aofia ai ma nisi auala mai tusitusiga paia.
O se molimau e pei …
O Se Fatu
A e totoina ma le loto i ai se fatu, po o le afioga a le Atua, i lou loto, e mafai ona e vaai i ai o tuputupu a’e ma fua mai ni fua lelei. I se isi faaupuga, o nisi taimi e sili atu ai le tuputupu ae o se molimau pe a e naunau e taumafai e ola i le ala ua poloaiina ai oe e le Atua, e tusa lava pe itiiti lava se manao ia te oe e talitonu. Ona mafai lea e le Atua ona faaali atu ia te oe fua, po o faamanuiaga, lea e oo mai pe a e mulimuli ia te Ia. O le a tuputupu ae lau molimau a o faaauau pea ona e faafaileleina. (Tagai i le Alema 32:28–43.)
Pe ua ou iloa ea ni fua lelei ua oo mai mai le faafaileleina o la’u molimau?
O Se Pa Maa
A fausia e se tagata se puipui mai maa, e le o maa uma e tutusa le telē po o foliga. O nisi taimi atonu e le fetaui se maa, ae e le faapea ai la e tatau ona e aveesea lena maa! I se tulaga tutusa lelei, atonu e i ai ni mea e uiga i le talalelei e te le’i malamalama i ai. Faaauau pea ona fausia lau molimau, tasi le maa i le taimi, ma mulimuli ane, o le a malosi mo oe.
O a ni maa e mafai ona ou onosai ai a o ou fausia la’u puipui o le molimau?
Suauu i le Lamepa
I le faataoto i taupou e toasefulu, e toalima tamaitai sa leai ni a latou lava suauu. Sa le mafai ona latou nonoina mai se suauu mai isi, ina ua oo mai le taimi sa feiloai ai ma le faatoafaiava, o le ua faatusa ia Iesu Keriso. O i latou sa i ai a latou lava suauu sa mafai ona mulimuli i le faatoafaiava. Pe a oo mai i molimau, e iai le taimi, e te manaomia sa ai oe lava molimau! E mafai ona e faatumuina lau molimau i le faaputu o lea matāua i lea matāua, e pei o le suauu i se lamepa. Ma a oo mai ai ni faaiuga tetele, e mafai e lau molimau ona faamalamalamaina le ala mo oe. (Tagai i le Mataio 25:1-13.)
O le a la’u mea o fai e faateleina ai la’u molimau i le faaputu o lea matāua i lea matāua? O le a se mea e mafai ona amata ona ou faia?
O Se Fagafao
Afai e te le fafagaina ma tausia se fagafao o manaomia oe, atonu o le a fiaai, ma’i, ma vaivai. Afai e te le fafagaina lau molimau i aafiaga faaleagaga ma le gauai atu i ai, atonu o le a vaivai foi.
O a ni mea faaleagaga e mafai ona ou “fafagaina” ai la’u molimau ina ia faamalosia ai?
Laau i se Togalaau
Afai o le laau e tasi i totonu o se togalaau o loo tauivi e ola, e le faapea ai o le togalaau atoa ua le lelei. Afai la e malosi atu se vaega se tasi vaega o lau molimau nai lo le isi, e le afaina! Ia tausi pea i laau o loo maloloina ma lauusiusi, ma a e saunia loa, ona mafai loa lea ona e taulai atu i laau e manaomia se fesoasoani sili atu.
O a vaega o la’u molimau o loo malolosi ma lauusiusi? O a vaega e mafai ona ou tuuina atu i ai le alofa ma le gauai atu i ai pe a ou saunia?
O Se Fale
O le nofoaga e te fausia ai lou fale, e tāua. E moni foi lena lava mea e tasi mo lau molimau. Afai e te fausiaina i luga o se faavae oneone, atonu e le umi tele i se tau leaga. Ae afai e te fauina i luga o se papa, po o Iesu Keriso, e mafai ona tu mausali lou fale e oo lava i afa aupito sili ona malolosi. (Tagai i le Mataio 7:24–27; Helamana 5:12.)
O a upumoni o loo ou fausia ai luga la’u molimau?
O Se Paso
E tofu i tatou uma ma vaega tutusa o upumoni o le talalelei e galulue ai, ae o le faatulagaga e tuufaatasia ai e tagata taitoatasi, atonu e eseese. Aua le tiai esea se vaega ona e le mafai ona e iloa le auala e fesootai ai i le taimi nei. Ia onosai a o faasolosolo le fesoasoani a le Atua ia te oe e vaai i le ata tele.
O le a se foliga o le ata o la’u molimau i le taimi nei?
O Se Pakete
Mai lea matāua i lea matāua, o aafiaga faaleagaga ua ia te oe, e faatumuina ai. Ae ia faaeteete! O nisi taimi e te le iloa ai o loo faatumuina lemu ane lava a outou pakete. Afai e te le onosai ma sasaa atoa au pakete ona e te lagona e le o i ai sau molimau i se mea se tasi, ua e le amanaiaina aafiaga o loo fesoasoani lemu i lau molimau ia tuputupu ae. Tuu ia faatumu lau pakete molimau.
O le a se mea ua ou talitonu i ai e le tatau ona ou tiai ese?