“Pe a Tutupu Mea Leaga i Tagata Lelei,” Mo Le Malosi o le Autalavou, Iuni 2024.
Sau, Mulimuli Mai ia te A’u
Pe a Tutupu Mea Leaga i Tagata Lelei.
Pe o i ai se mea faigata o tupu talu ai nei i lou olaga? Afai o lea, o loo e i ai i se mafutaga lelei.
Ata na tusia e Camila Grey
E toalua pagota i le Tusi a Mamona sa matua leaga le faiga o i laua lea atonu e te faapea ai—e faavae i lenei faiga—o i la’ua o ni tagata solitulafono sili ona leaga.
Sa saisaia nei pagota. Sa sasaina i la’ua i aso taitasi e o la leoleo falepuipui. Afai e le lava lena mea, na oo lava i le aveesea o o laua lavalava ma lē tuuina atu iai ni meaai po o vai. O le a le la solitulafono?
O Alema ma Amoleka sa na ona la taumafai lava e talai atu le talalelei (lea o le a e aoao ai i lenei masina i le Sau, Mulimuli Mai ia te A’u, i le suesueina o le Alema 8–14).
Faalagolago i le Atua
Ua tumu tusitusiga paia i faataitaiga o mea leaga e tutupu i tagata lelei. Ioe, e faapena foi le olaga i aso nei. Atonu tou te iloa ma alolofa i tagata o ē e fetaui lelei i ai lena lava faamatalaga e tasi.
O Elder Jeffrey R. Holland o le Korama a Aposetolo e Toasefululua sa ia saunoa i lea tulaga e faapea:
“Mo tagata mama’i uma na vave faamaloloina i lena lava taimi a o faatalitali o ia e tofu i le Vai i Petesa, o se isi tagata o le a faaaluina le 40 tausaga i le toafa e faatalitali ai e ulufale atu i le nuu folafolaina. Mo Nifae ma Liae uma na puipuia faalelagi e se afi mumu faataali’oli’o ona o lo la faatuatua, sa i ai foi se Apinati na susunuina i le oti i se afi musaesae ona o lona faatuatua. …
“O le manatu? O le manatu e faapea, o le faatuatua o le faalagolago lea i le Atua i taimi lelei ma taimi leaga, e tusa lava pe aofia i lena mea nai puapuaga se’ia oo ina tatou vaaia Lona aao [laveai] o faaalia mo tatou.”
O nisi taimi e manaomia ona tatou onosa’i umi teisi ai lava iina!
Faapaleniina o Fua
I lenei tala patino faatusipaia, na iu ai ina galuea’ina faavavega ni mea mo Alema ma Amoleka. Sa faamalosia i la’ua e motusiaina o la noataga ma sosola ese mai ma faasaoina o la ola a o pa’u ifo le falepuipui i le eleele ma faatama’ia ai e na faafalepuipuiina i laua (tagai i le Alema 14:26–29).
Ae i ni nai mataupu na muamua atu sa tatou faitau ai e uiga i se taitai amiotonu, o Kitiona, o lē sa osofaia ma fasiotia mo le puipuiga o le faatuatuaga (tagai i le Alema 1:7–9). Aisea e eseese ai na iuga? Ia, i le tulaga moni lava, tatou te le iloa.
Na aoao mai Elder Dale G. Renlund o le Korama a Aposetolo e Toasefululua e faapea “O nisi faapito’au e le mafai ona faamatalaina; o faapito’au e aunoa ma ni mafuaaga e faaosolilivau.” E ui i lea, e i ai pea lava le faamoemoe! Na faaopoopo mai Elder Renlund e faapea, “na manumalo Iesu Keriso i le lalolagi ma ‘miti’ia’ ai faiga faapito’au uma. Ona o Ia, ua mafai ai ona tatou maua le filemu i lenei lalolagi ma ia loto tetele. Afai tatou te faatagaina o Ia, o le a faapaiaina e Iesu Keriso faiga faapito’au mo lo tatou lelei.”
Po o le a lava le tulaga tatou te oo i ai, o Iesu Keriso o le malosi—ma le puna o le filemu—mo i tatou uma.