O Lē Fea Le Nuu E te Nofo Ai?

Saunia e David A. Edwards

O Mekasini a le Ekalesia

Ua faaali mai e Alema ia i tatou, po o fea lava o tatou i ai faaleagaga, e tuuina mai e le Alii ia i tatou savali tatou te manaomia.

Mo le silia ai ma le valu tausaga, sa i ai ni galuega se lua a le perofeta o Alema: o le faitaulaga sili ma le faamasino sili. Ae ina ua ia vaaia le toatele o tagata o le Ekalesia ua amioleaga, sa ia lafoai lona tulaga o se faamasino sili ina ia mafai ai ona ia faaaluina le tele o le taimi e talai atu ai i tagata.

O le aai muamua sa ia talai atu ai o Saraemila (tagai i le Alema 5). O le lona lua o Kitiona (tagai i le Alema 7).

O ana savali i nei aai e lua sa i ai ni vaega na tutusa ai, ae sa i ai foi ni o la eseesega tetele.

Sa manaomia e tagata o Saraemila ona feala i luga i le mamao ua latou pau’ū ai faaleagaga ma le tulaga manaomia tele o le tatau ai ona latou salamo. Ae o tagata o Kitiona sa saunia faaleagaga mo se isi ituaiga o savali.

E mafai ona tatou aoao mai savali eseese na aoao atu e Alema i tagata o nei aai e lua. O ni nai autu nei sa tutusa ai nei savali ma auala eseese na ia aoaoina ai i latou.

Manatua

Saraemila: Na uunaia e Alema ia tagata e toe tepa i tua ma manatua “le faatagataotauaina o o outou tamā… o lona [le Atua] alofa mutimutivale ma lona tali-tigā ia te i latou (Alema 5:6). I se tulaga patino lava, sa ia talanoa ai e uiga i faatosinaga amioleaga a le Tupu o Noa ia i latou, le ala na taitai atu ai i lo latou nofopologa, ma le ala na laveaiina faavavega ai i latou e le Alii ina ua latou salamo. E le gata i lea, sa ia fai atu ia i latou e mafaufau i mea na o latou o’o iai faaleagaga i le tuanai, ma mafaufau pe mafai ona latou lagonaina lena lava ala e tasi i le taimi nei (tagai i le Alema 5:26). Faatasi ai ma lenei manatuaga, sa ia fai atu ia i latou e tepa taulai atu i luma ma mafaufau i le taimi o le a o latou tutu ai ina ia faamasinoina e le Alii (tagai i le Alema 5:15–24).

Kitiona: Na uunaia e Alema ia tagata e tulimatai atu i luma ma manatua le folafolaga o le ola e faavavau ia i latou o e salamo, papatisoina, ulu atu i se feagaiga ma le Atua, ma tausi i poloaiga a le Atua (tagai i le Alema 7:16).

Salamo

Saraemila: Na maua e tagata ni lauga faigata mai ia Alema e uiga i lo latou manaomia ona salamo. Mo se faataitaiga: “Ioe, e oo ia te outou uma o e ua faia amioletonu oi talofa; ia salamo, ia salamo, ona ua fetalai mai ai le Alii le Atua!” (Alema 5:32). Sa ia talai atu ia i latou i se taimi umi e uiga i a latou agasala patino ma taunuuga o na agasala.

Kitiona: Latou te lei i ai i le tulaga leaga o le agasala e pei o le nuu o Saraemila. Na aoaoina i latou e Alema ia salamo, o se auala e faaali atu ai le faatuatua i le Faaola, maua Lona mana, saunia mo Lona afio mai, ma saunia e osia feagaiga (tagai i le Alema 7:9–16).

Liliu atu i le Faaola

Saraemila: Na aoao atu Alema e uiga ia Iesu Keriso o “le leoleo mamoe lelei … ma o lona lava suafa ua ia valaauina ai outou” (Alema 5:38). Sa ia aoao foi e uiga i le afio mai o Iesu Keriso e “aveesea agasala a le lalolagi, ioe, agasala a tagata uma taitoatasi, o e e tutumau i le talitonu i lona suafa” (Alema 5:48).

Kitiona: Sa taulai atu Alema i le “mea e tasi ua sili atu ona taua” nai lo se isi lava mea: o le Faaola o Iesu Keriso ma Lana misiona e togiolaina tagata (Alema 7:7).

Na aoao mai Alema e uiga i le tele o mea o le a puapuagatia ai le Faaola mo i tatou: “tiga ma puapuaga ma faaosoosoga,” “ma’i,” “oti,” “vaivaiga” (Alema 7:11–12). Ma sa aoao atu e Alema le mafuaaga o le a puapuagatia ai le Faaola i nei mea: “ina ia mafai ona faatumuina ona loto i le alofa mutimutivale, e tusa ai ma la le tino, ina ia mafai ona ia silafia e tusa ai ma la le tino, le ala e fesoasoani ai [pe tuu atu ai le toomaga i] ona tagata e tusa ma o latou vaivaiga,” ma “ina ia mafai ona ia ave i ona luga agasala a ona tagata, ina ia mafai ona ia soloi ese a latou solitulafono” (Alema 7:12–13).

O se aoaoga taua tele lenei. Sa puapuagatia le Faaola i le tele o mea ina ia mafai ai ona Ia maua le agaalofa atoatoa mo i tatou ma iloa ai le auala e fesoasoani ai ia i tatou.

E Mafai Ona Tatou Maua Le Olioli.

E mafai ona tatou faatatauina le talaiga a Alema i Saraemila ma Kitiona ia i tatou lava. Mo se faataitaiga:

Atonu e manaomia ona tatou faalogo i savali eseese i tulaga eseese i o tatou olaga.
Po o fea lava o tatou i ai faaleagaga i le asō, e mafai lava ona tatou faalatalata atili atu i le Faaola, salamo, ma maua le olioli.
Afai tatou te saunia faaleagaga, e mafai ona tatou maua le tele o le afioga a le Atua, e aofia ai upumoni taua e fesoasoani tatou te latalata atili atu ai i le Faaola.

I le iuga, sa maua e Alema le olioli i aai uma nei e lua. I Saraemila, “ina ua mavae ona asaina aafiaga e tele o puapuaga ma le faanoanoa” (Alema 7:5), sa ia maua le olioli ona sa latou salamo. I Kitiona, sa ia maua le olioli aua sa ia iloa ua uma ona latou maua le faatuatua tele i upu na ia aoaoina ai i latou e uiga i le Faaola (tagai i le Alema 7:17) ma tuuina atu le “filigā tele ma le gauai” i ana upu (Alema 7:26).

O le isi taimi o le a talanoa atu ai auauna a le Alii ia te oe, atonu e te mafaufau po o le a le ituaiga savali e te manaomia ma ua saunia e maua.

O Fesili a Alema

O fesili e mafai ona avea ma se meafaigaluega maoae faafaiaoga.

Pe tusa ma le 30 fesili na tuuina atu e Alema i tagata o Saraemila, e latou te tali patino i ai ina ia mafai ona latou iloa pe o le a le mamao na latou se ese ai faaleagaga, salamo, ma liliu atu i le Faaola.

Mo se faataitaiga:

“Ua fanauina ea outou faaleagaga i la le Atua?” Alema 5:14).
“Ua tafi ese ea le faamaualuga mai ia te outou?” Alema 5:28).
“O i ai ea se tasi i totonu o outou ua faatauemu i lona uso?” Alema 5:30).
“Afai e lē o outou o ni mamoe a le leoleo mamoe lelei, o le lafu a ai outou? Alema 5:39).

I Kitiona, sa na o le tasi lava le fesili na fesili ai Alema, ma sa toe taliina lava e ia:

“Tou te talitonu ea i nei mea?… Ua ou iloa ua outou talitonu i ai” (Alema 7:17).

Mo fesili e fesili ifo ai ia te oe lava, tagai i le Mo Le Malosi o le Autalavou: O Se Taiala mo le Faia o Filifiliga (2022), aemaise lava fesili o pepa faataga o le malumalu.