“Tau Lava o le Agalelei,” Mo Le Malosi o le Autalavou, Iuni 2024.
Tau Lava o le Agalelei
Ua faasalalauina e Raegan (14) ma Rylyn (12) le agalelei i lo latou nuu—e tasi le faailoga vali i le taimi.
Ata na pueina e Cody Bell
O Raegan ma Rylyn mai Kentucky, ISA, sa le fiafia, fiaaai, ma vaivai. Sa o se aso umi o le faia o auaunaga ma lo latou aiga. Ae i le malaga agai atu i le fale, sa la vaaia ai se faailoga i autafa o le auala lea na suia ai o la uiga faaalia. Na faapea mai, “Tau Lava o le Agalelei.”
“Sa faaitiitia ai lo ma le fiafia—ma sa ma faafetai sa mafai ona ma auauna atu,” o le tala lea a Raegan. “Sa amata ona ma mafaufau pe mafai ona ma faia ni faailoga faapena,” o le tala lea a Rylyn.
O Le Fesootaiga Faaleaiga
Ina ua uma ona vaai i le faailoga o le ‘Tau Lava o le Agalelei’, sa faia se latou talanoaga i le afiafi faaleaiga ma lo latou aiga e uiga i le agalelei atu i lo la uso matua o Kendall, o lē sa iai le faaletonu tumau o le mafaufau ma sa amata ona ma’i. Sa tonu ia Raegan ma Rylyn e fai a laua lava faailoga Ia Agalelei. “Sa ma manatu e mafai ona fesoasoani e taofia ai le faasauā,” o le tala lea a Raegan.
Sa la mafaufau foi e uiga i isi o la tei, o e e tofu foi i latou ma faaletonu tumau o le mafaufau. Na maliu lo la tuagane matua o Kallen o se pepe, ma e toalua o la tei na vaetama mai—o Leena ma Liam. “Sa ma mananao e siitia le tulaga faataua o le agalelei mo i latou,” o le tala lea a Rylyn.
O tei o Reagan ma Rylyn o se vaega o lo la faaosofiaga mo le faasalalauina atu o le agalelei. O Leena ma Liam e faaletonu tumau o la mafaufau, ma sa faapena foi o la tei o Kendall ma Kallen, ua maliliu.
Faailoga e Faasoa Atu
Sa amata ona vali e Raegan ma Rylyn le “Ia Agalelei” i luga o faailoga lea e le lē pe i le vai. Sa la o atu i faleoloa ma maketi a faifaatoaga e faatau atu faailoga, ma sa la tuuina atu le tupe na la mauaina i auaunaga alofa i le lotoifale, e aofia ai ‘Blessings in a Backpack’, o le ‘Humane Society’, le Koluse Mumu a Amerika, ‘Down Syndrome of Louisville’, ma polokalama i le lotoifale e fesoasoani ia i latou e i ai tomai faapitoa, po o manaoga faapitoa.
I le tolu tausaga mulimuli ane, o loo faaauau pea e Raegan ma Rylyn ona vali (faailoga). Ua la faia le silia ma le 5,400 faailoga ‘Ia Agalelei’ ma mauaina le silia ma le $50,000 mo auaunaga agaalofa. “O nisi taimi e i ai a matou vaega o le ekalesia, uo, po o faifeautalai e o mai e vali pe a ma le 100 faailoga i le taimi e tasi,” o le tala lea a Raegan. I se tasi taimi, sa talosagaina ai e se lotu Papatiso ni faailoga se 40 mo lo latou lumāfale. Ua vaaia e Raegan ma Rylyn faailoga i lotoa o tagata, ma o nisi o faailoga na iu lava ina oo atu i isi atunuu! E talanoa foi teineiti e uiga i le agalelei i sauniga po o aso faamanatu i aoga ma le nu’u.
Ua faia ma faatau atu e Reagan ma Rylyn faailoga “Ia Agalelei” i se taumafaiga e faateleina ai le agalelei i lo latou nuu ma saili ai tupe mo auaunaga alofa.
Auaunaga ma le Faamafanafanaga
O le valiina o faailoga na fesoasoani ia Raegan ma Rylyn i o la luitau. “Ina ua ma’i Kendall, sa i ai taimi ma te lei mananao moni lava e i ai i totonu o le fale aua sa faigata ia i maua ona vaai i ai. O lea na ma filifili ai e o ma vali, ma na matua faamāmāina tele ai lena avega,” o le tala lea a Raegan.
Na iu lava ina maliu Kendall i le 16 o ona tausaga. Fai mai Raegan, “Sa faigata, ae sa ma iloa e faavavau aiga. Sa ma iloa e tusa lava pe le’i tele se taimi sa matou faatasi ai, afai ma te faia la ma vaega, o le a fesoasoani ia i ma’ua e latalata atili ai i le toe faatasi ai ma Kendall ma Kallen.
Avea Atili Faapei o Keriso
I nei mea uma, o loo taumafai pea nei teineiti ia avea e faapei o le Faaola ma toe foi atu i le aiga i lo la Tama Faalelagi.
“I le aoga, e i ai nisi tagata e lagona e le fetaui [lona] i ai iina. O lea ua ou faia ai se sini e fai atu se tala ia i latou e faalelei ai o latou aso,” o le tala lea a Raegan. “Ou te lagona e pei o ni nai faatinoga laiti o le agalelei e mafai ona fesoasoani e suia atili ai le olaga o se tasi nai lo le mea ua e iloaina. Ou te mafaufau i le ala na afio ese ai le Faaola mai Lona ala e faatino le alofa atu i isi na siomia o Ia. Ou te mafaufau ia te Ia o faamaloloina e tauaso pe faatutuina mai e ua oti. Ma ou te mafaufau i le auala lea e i ai ni mea faigofie e mafai ona ou faia e faaali atu ai lo’u alofa ma agalelei atu ai i isi.”
Fai mai Rylyn, “Nai lo le mafaufau i mea e le mafai ona e suia, mafaufau i mea e te mafaia. Ua na o ni mea faigofie e mafai ona e faia, e pei o le uuina o le faitotoa mo se tasi po o le ataata. Pe a e faia mea iti, e te latalata atili i le toe feiloai ma le Atua.”