“Faauooga i le Tusi a Mamona,” Mo Le Malosi o le Autalavou, Iulai 2024.
Faauooga i le Tusi a Mamona
O nei faataitaiga e fa i le Tusi a Mamona e mafai ona aoao ai i tatou i nisi o lesona mananaia.
E mafai ona suia ai olaga, faamuta ai taua, ma tuufaatasia ai le lalolagi i le filemu. O le a le mea o lo’o tatou talanoaina nei? Faauooga! O nei paaga i le Tusi a Mamona na faalatalata atili atu ia Iesu Keriso a o faalatalata atili atu le tasi i le isi. O le a se mea e mafai ona tatou aoaoina mai ia i latou?
Ata na tusia e Alex Nabaum
Opogiina o mea e le i Faamoemoeina: Nifae ma Sorama (Faitau le la tala i le 1 Nifae 4)
Ina ua alu ese atu Nifae ma le faamaoni e aumai papatusi apamemea, sa lei mafaufau o ia e toe foi atu ma Sorama, o lē o le a avea ma se uo i le olaga atoa (tagai i le 2 Nifae 1:30). Talu ai sa la naunau uma e mulimuli i le Agaga e tusa lava pe na aveina atu ai i laua i ni nofoaga sa le’i mafaufauina, sa mafai ona la atiina ae se faigauo lea na faamanuiaina ai augatupulaga.
-
O se manatu ia manatua: E mafai ona oo mai mafutaga ma mou atu i le aluga o le olaga. A o tatou tumau faamaoni i le Atua, ia faaaofia isi, ma faataitai ni mea fou, tatou te le iloa lava po o afea o le a o’o mai ai le isi a tatou uo.
Faafesoota’ia o Eseesega: Amona ma le Tupu o Lamonae (Faitau le la tala i le Alema 18)
O nei alii na o mai mai ni aganuu ma ni talitonuga faalelotu matuā eseese lava. O le mea moni, sa masani ona fetaua’i o la tagata! Ae na sau Amona i le nuu o Lamonae e taumafai e faasoa atu le talalelei a Iesu Keriso ia i latou. Sa latou faia le mea na uunaia i tatou e le perofeta e fai i lauga o konafesi talu ai nei—sa latou faia se taumafaiga e vaai i tua atu o eseesega ma faamasani le tasi i le isi o ni fanau a le Atua. Sa la mauaina ni talitonuga tutusa ma iu ai ina avea ma ni uo lelei lea sa latou naunau ai e ofo atu o la ola mo le tasi ma le isi.
-
O se manatu ia manatua: E mafai ona maua uo i tagata o aganuu ma faatuatuaga uma. E mafai ona tatou filifili e taulimaina isi ma le faaaloalo ma vaavaai mo se tulaga tutusa o faatuatuaga, amioga mama, ma le agalelei.
Siitiaina o Isi: Apiso ma le Masiofo (Faitau le la tala i le Alema 19)
Tatou te le iloa pe na avea nei tamaitai ma ni uo, ae sa la faaalia uiga auaumama o se uo moni. Sa la maua uma se aafiaga faaleagaga faavavega ma sa faamanuiaina e le tasi le isi i a la molimau. E ui lava sa la omai mai ni li’o o faapotopotoga faaleagafesootai ma tamaoaiga eseese—o le tasi o se auauna ae o le isi o se tagata taualoa—la te lei taulai atu i na eseesega. Sa la siitiaina tagata, i le faaletino ma le faaleagaga, ma fesoasoani ai e suia se malo atoa.
-
O se manatu ia manatua: A o tatou vaavaai i tala atu o mea faalelalolagi lea e ono tuueseeseina ai i tatou, e mafai e i tatou ma isi tagata faamaoni ona aapa atu ma suia le lalolagi.
Talanoa ma Faamagalo atu: O Paorana ma Kapeteni Moronae (Faitau le la tala i le Alema 61)
Sa taumafai uma Paorana ma Kapeteni Moronae e laveai o la malo mai le taua. Ona o tusi feaveai i se va mamao sa na o le pau lea o le auala e fesootai ai, sa la le iloa ai i taimi uma le mea sa tupu i le olaga o le isi tagata. O lenei mea na oo ai i ni tulaga le femalamalamaa’i tele! Ae nai lo le nofo ma le loto tiga ma le ita, sa la mulimuli i aoaoga a le Faaola ma faamagalo atu ma le lotomaualalo le tasi i le isi. Na iu lava ina la fesoasoani i le tasi ma le isi—ma o la malo atoa—e agai i luma.
-
O se manatu ia manatua: E mafai ona tatou foia faafitauli i le faamagalo atu ma taulai atu i le mea sili i le tasi ma le isi, e tusa lava pe tatou te le malamalama pe aisea e faatino ai e isi le ala latou te faia ai.