“Fai Mea Lelei ma Tu Atu mo le Upumoni ma le Mea Sa’o,” Mo Le Malosi o le Autalavou, Iuni 2024.
Fai Mea Lelei ma Tu Atu mo le Upumoni ma le Mea Sa’o
E le mafaitaulia ou avanoa e fesoasoani ai e fausia le malo o le Atua—e tusa lava po o fea o e i ai.
Sa iloa e le taitai faamaoni o sa Nifae o Kitiona, ia aoaoga faavae sese ina ua ia faalogo i ai. Sa ia faalogo i ai mai le tupu o Noa ma ana faitaulaga amioleaga o e “sa faafefeteina i le faamaualuluga o o latou loto,” ma “lagolagoina i latou i lo latou paie” e ala i le faamalosia o tagata e tuu atu ia i latou mea uma latou te manaomia e ola ai (Mosaea 11:5–6). Sa latou aoaoina foi tagata ia agasala.
Ina ua uma ona fasiotia e le Tupu o Noa ia Apinati ma saili e faaumatia Alema ma ana tagata liliu mai, sa tauto Kitiona e na te taofi i le tupu ma faamutaina lena amioleaga. Na pau le mea na ia faasaoina ai Noa ona o se osofaiga a sa Lamana. Mulimuli ane, sa iloa e Kitiona ua faapologaina tagata e sa Lamana ona sa latou mumusu e liliu ese mai a latou amioletonu. Ina ua uma ona salamo tagata, ona ia fesoasoani lea ia i latou e sosola ese.
I le avea ai ma se toeaina matua, sa toe fetaiai foi Kitiona ma le faamaualuga ma le amioleaga a o ia tu i luma o Neoa, o le sa taumafai e “taitai ese tagata o le ekalesia” (Alema 1:7). I le faaaogaina na o le afioga a le Atua e fai ma ana au’upega, na faafetaiaia ai e Kitiona lototoa ia Neoa ma lana amioleaga. Sa tali atu Neoa ma le ita e ala i le osofaia o Kitiona i lana pelu ma, i se tulaga faanoanoa, na fasiotia ai le “tagata amiotonu” o lē na “faia mea lelei e tele i totonu o [lona] nuu” (Alema 1:9, 13).
I aso nei, e pei o Kitiona, ua e maua avanoa e le mafaitaulia e avea ai “o se auupega i aao o le Atua” (Alema 1:8) e ala i le auauna atu i isi, tu atu mo le amiotonu, ma puipuia le saolotoga e tapuai ai. A o e mulimuli i le faataitaiga faamaoni a Kitiona, e mafai ona e faia “mea lelei e tele” mo i latou o siomia oe.
Aufaatasi i Auaunaga
I le avea ai ma se soo o le Alii o Iesu Keriso, e mafai ona e faaalia lou alofa mo le Atua ma ou tuaoi e ala i le saili e faamanuia isi ma fesoasoani ia i latou o manaomia le fesoasoani. Ou te faafetai mo auaunaga ma le auauna atu le manatu faapito ua ofoina atu e outou ma isi tagata o le Ekalesia i uarota, paranesi, siteki, ma malumalu i le lalolagi atoa.
Ua ia te outou foi avanoa e le mafaitaulia e auai ai i auaunaga i o outou lava nuu ma saofagā ai i faalapotopotoga faaleaoaoga ma agaalofa o loo saili e siitia ma fesoasoani i tagata. E tele faamanuiaga e oo mai a o tatou aufaatasi i auaunaga i isi. “Pe a tuufaatasi lima e auauna atu i tagata e le tagolima,” na saunoa ai Peresitene Henry B. Eyring, Fesoasoani Lua i le Au Peresitene Sili, “e tuufaatasia e le Alii o tatou loto.”
“Ia Tuu i Luga Lo Outou Malamalama”
O se tasi o auala taua e te faia ai mea lelei o le tausia lea o au feagaiga ma taitai se olaga faaKeriso—e tusa lava po o fea o e i ai. Sa fetalai mai le Faaola, “Ia tuu i luga lo outou malamalama ina ia susulu atu i le lalolagi.” “Faauta, o A’u o le malamalama lea e tatau ona outou tuu i luga—mea ia na outou vaai ua ou faia” (3 Nifae 18:24; tagai foi i le Mataio 5:14).
Pe o le aoga, galuega, taaloga, pe i se tafaoga, o se tafaoga faamasani, po o luga o le initoneti, aua le “mama e ave i [ou] luga le suafa o Keriso” (Alema 46:21). Ia faalogoina lou leo i le puipuiga o le amiotonu e ala i le faasoa atu o lou faatuatuaga ma talitonuga.
E ala i au upu ma au galuega, e mafai ai ona e molimau atu i fanau a le Tama Faalelagi o loo e mulimuli i Lona Alo. A o e tu atu mo le upumoni ma le mea sa’o e ala i le tuuina i luga o le malamalama o le Faaola, o le a iloa oe e tagata o siomiaina oe ma o le a ‘au le lagi mo oe.
Tu Atu mo le Saolotoga o Tapuaiga
I le tele o auala, e le ese o tatou aso mai le taimi na taumafai ai Neoa e taitai ese tagata mai le Ekalesia. O le saolotoga o tapuaiga ua osofaia i le lalolagi atoa, ma o leo o i latou o e tetee i le matafaioi taua a tapuaiga i malo ua faatupulaia le leotele.
O le a manuia osofaiga i le saolotoga o tapuaiga pe afai tatou te le tutu atu mo a tatou aia tatau faalelotu. “I le avea ai o se ekalesia,” na ou aoao atu ai talu ai nei, “tatou te aufaatasi ai ma isi tapuaiga i le puipuia o tagata o faatuatuaga ma faatauanauga uma ma a latou aia tatau e talanoa mai ai i o latou talitonuga maumaututu.”
E le tatau lava ona e faatoese atu mo lou faatuatuaga. O faatuatuaga faalelotu malolosi e faamalosia ma puipuia ai aiga, nuu, ma malo. E uunaia ai le usiusitai i tulafono, faaaloalo mo le ola ma meatotino, ma aoao atu ai le ola mama, alofa mama, agaalofa, amiosa’o, ma le faamaoni—o uiga mama taua e manaomia mo se sosaiete amiotonu, saoloto e ola lauusiusi.
E pei o Kitiona, e mafai ona e faia “mea lelei e tele” ma fausia le malo o le Atua a o e auauna atu ma le filiga, tuu i luga lou malamalama, ma tu atu mo le saolotoga o tapuaiga. Ia faamanuia outou e le Alii i a outou taumafaiga e faia “mea lelei e tele” i totonu o lou aiga, nuu, ma le atunuu.