Fesootai i le Manao Keriso
O nisi nei o mataupu faavae autu e mafaufau i ai ma tatalo ai e fesootai ma le mana o le Faaola e faamalolosia ai.
Mai le faasalalauga i le Aso o le Molimau i le Lalolagi Atoa: E Mafai Ona Ou Faia Mea Uma e ala ia Keriso, 22 Oke., 2023.
A’u uo talavou pele, ou te manao ia outou iloa o Iesu Keriso ma Lana talalelei toefuataiina o punavai silisili ia o le upumoni ma le malosi i le lalolagi. O le mana o le Faaola e faamalolosia ai, e fesoasoani i tagata uma o le a o mai ia te Ia. Ua faatumulia Lana talalelei i le mana e faamalolosia ai aua o loo i ai upumoni e faavavau ua faateleina e ala i le pule o Lana perisitua. A tatou usiusitai i Ana poloaiga, e mafai ona faamanuiaina i tatou taitoatasi i le mana o Lana perisitua. E leai se isi mea e sili atu ona taua mo outou e malamalama ai i le taimi lenei o o outou olaga.
E tusa ai ma lenei malamalama, sei ou ta’ua nisi o mataupu faavae autu mo outou e mafaufau i ai ma tatalo ai.
O le mea muamua ma le sili, e tatau ona e iloa po o ai moni lava oe. O oe o se atalii po o se afafine o le Atua. I le avea ai ma se tagata o lenei Ekalesia, o oe foi o se atalii po o se afafine o le feagaiga. Ma o outou taitoatasi o se so’o o Iesu Keriso. O nei faailo e tolu (atalii po o le afafine o le Atua, atalii po o le afafine o le feagaiga, ma soo o Keriso) e sili atu ona taua nai lo se isi lava faailo. Toe iloilo pea lava pea nei upumoni e uiga ia te oe i lou mafaufau. Fai leotele.
O le mea e sili ai, o outou foi o le lumanai o le Ekalesia ma le lalolagi. E le gata ou te talitonu ia te outou, ae e talitonu foi lo outou Tama Faalelagi ma Iesu Keriso ia te outou. Na auina mai nei oe i le lalolagi ona sa silafia e le Atua e mafai ona e malosi ma lototele. Ma e manaomia e le Atua atalii ma afafine malolosi ma le lototetele i le lalolagi i le taimi nei.
E lei auina mai oe iinei ia toilalo. Na auina mai outou i le lalolagi ina ia manuia—ma fesoasoani i isi ia manuia. A o e mulimuli ia Iesu Keriso, o le a e maua le malosi ma le lototele uma e te manaomia e fetaiai ai ma mea faafeagai i lenei lalolagi matautia. Ou te folafola atu lena mea ia te outou.
Aoao pe faapefea ona maua faaaliga patino. E leai lava se isi meaalofa i le lalolagi e pei o le meaalofa o le Agaga Paia. Taumafai e faaleleia teisi oe lava i aso taitasi. E mafai ona fesoasoani le Agaga Paia ia te oe. O le a e lelei atili ma lelei atili i le iloaina o Ana uunaiga. O le a fesoasoani o Ia ia te oe ia iloa le mea e fai ma le mea e le faia, le mea e te alu i ai ma le mea e te le alu i ai. O le a fesoasoani o Ia ia te oe e iloa ai po o ai au uo moni ma po o ai e le o ni uo moni. O le a tuuina atu e le Agaga Paia ia te oe le malosi ma faasaogalemu oe.
Usitaia atoatoa i le Upu o le Poto ma le tulafono o le ola mama. O le faia o lena mea o le a e maua ai le malosi faaletino ma le faaleagaga lea e le o maua e i latou e le usiusitai i nei poloaiga. E ala i lou faatuatua ma le usiusitai faifai pea, o le a faateleina ai e le Alii lou gafatia e fesiitai mauga i lou olaga.
Ia ōle atu ma le agaga tatalo i le Atua e fesoasoani mai ia te oe ia faatino le faatuatua malosi atu. O le faatuatua i lo tatou Tama Faalelagi ma Lona Alo Pele, tuufaatasi ma le salamo i aso taitasi, o le a faateleina ai lou mauaina o le mana faale-Atua.
Afai e te lagona ua mamao tele pe ua umi tele foi lou se ese mai le ala o feagaiga, sei ou faamautinoa atu ia te oe e le moni lena mea. E ala i le Togiola a Iesu Keriso, e mafai ai ona manuia lou lumanai, oo lava i le matuā faamanuiaina. Talanoa i ou matua ma lou epikopo po o le peresitene o le paranesi. O le a latou fesoasoani ia te oe ia e toe oo atu i le ala o le alualu i luma. Faamolemole toe foi mai i le olioli ma le saogalemu o le ala o feagaiga. Matou te manaomia oe tatou te faatasi.
O lou manuia silisili o le a oo mai pe a e faa’auamoina oe lava i le Tama Faalelagi ma Iesu Keriso. Ou te iloa o se olaga e aunoa ma le Atua o se olaga e tumu i le fefe. Ou te iloa foi o le olaga faatasi ma le Atua o se olaga e tumu i le filemu, olioli, ma le mana. Fai se faaiuga e ola i lou olaga faatasi ma le Atua.
O’u tagata talavou pele, ua saunia lo tatou Tama Faalelagi ma Lona Alo Pele, o Iesu Keriso, e faamanuia outou. O le a La le tuulafoa’ia lava outou.