“Ko e Vā Fakakaungāmeʻa ʻi he Tohi ʻa Molomoná,” Ki Hono Fakamālohia ʻo e Toʻu Tupú, Sune 2024.
Ko e Vā Fakakaungāmeʻa ʻi he Tohi ʻa Molomoná
ʻE lava ʻe he ngaahi sīpinga ʻe fā ko ʻeni ʻi he Tohi ʻa Molomoná ʻo akoʻi mai ha ngaahi lēsoni mālie.
Te ne lava ʻo liliu ʻa e moʻuí, fakangata ʻa e taú, mo fakatahaʻi ʻa māmani ʻi he melino. Ko e hā ʻa e meʻa ʻoku mau talanoa ki aí? Ko e vā fakakaungāmeʻá! Naʻe fakaʻau ʻo ofi ange ʻa e ngaahi kaungāmeʻa ko ʻení kia Sīsū Kalaisiʻi he lolotonga pē ʻenau vāofi ʻiate kinautolú. Ko e hā ʻa e meʻa ʻe lava ke tau ako meiate kinautolú?
ʻŪ tā fakatātā ʻa Alex Nabaum
Tali Lelei ʻa e Meʻa Taʻeʻamanekiná: Nīfai mo Sōlami (Lau hona talanoá ʻi he 1 Nīfai 4)
Ko e taimi naʻe mavahe ai ʻa Nīfai ke ʻomai ʻa e ʻū lauʻi peleti palasá, naʻe ʻikai ke ne ʻamanaki ʻe foki mai mo Sōlami, ʻa ia ʻe hoko ko ha kaumeʻa mamae ʻi he moʻuí (vakai, 2 Nīfai 1:30). Koeʻuhí naʻá na fakatou loto-fiemālie ke muimui ʻi he Laumālié ʻo aʻu ki he taimi naʻá ne ʻave ai kinaua ki ha ngaahi feituʻu taʻeʻamanekiná, naʻá na lava pē ʻo fokotuʻu ha vā fakakaungāmeʻa naʻá ne tāpuekina ha ngaahi toʻu tangata.
-
Fakamatala nounou: ʻE lava ke taimi nounou pē ʻa e ngaahi vā fetuʻutakí ʻi he moʻuí kotoa. ʻI heʻetau tauhi faivelenga ki he ʻOtuá, kau ai mo e niʻihi kehé, pea ʻahiʻahiʻi ha ngaahi meʻa foʻoú, ʻoku ʻikai ke tau laveʻiloa ʻa e taimi te tau fetaulaki ai mo hotau kaumeʻa hokó.
Ko e Ikunaʻi ʻo e Faikehekehé: ʻĀmoni mo e Tuʻi ko Lamōnaí (Lau hona talanoá ʻi he ʻAlamā 18)
Naʻe ōmai ʻa e ongo tangatá ni mei ha ngaahi tukufakaholo mo e puipuituʻa fakalotu kehekehe ʻaupito. Ko hono moʻoní, naʻe faʻa fetauʻaki hona kakaí! Ka naʻe haʻu ʻa ʻĀmoni ki he kakai ʻo Lamōnaí ke feinga ke vahevahe mo kinautolu ʻa e ongoongolelei ʻo Sīsū Kalaisí. Naʻá na fai ʻa e meʻa kuo poupouʻi kitautolu ʻe he palōfitá ke tau fakahoko ʻi he ngaahi malanga konifelenisi fakamuimuitahá—naʻá na feinga ke tukunoaʻi ʻa e ngaahi fetōkehekeheʻakí kae feinga ke na maheni ko e fānau ʻa e ʻOtuá. Naʻá na ʻiloʻi ha ngaahi meʻa naʻá na tui tatau ai pea fāifai ʻo na hoko ko ha ongo kaungāmeʻa lelei ʻo na loto-fiemālie ai ke na femaluʻiʻaki ʻena moʻuí.
-
Fakamatala nounou: ʻE lava ke maʻu ʻa e ngaahi kaumeʻá ʻi he kakai ʻo e anga fakafonua mo e tui fakalotu kotoa pē. Te tau lava ʻo fili ke fakaʻapaʻapaʻi e niʻihi kehé mo kumi ha meʻa ʻoku tau tatau ai ʻi he tuí, ʻulungāngá, mo e leleí.
Ko e Tokoniʻi ʻo e Niʻihi Kehé: ʻĀpisi mo e Kuiní (Lau hona talanoá ʻi he ʻAlamā 19)
ʻOku ʻikai ke tau ʻilo pe naʻe kaungāmeʻa ʻa e ongo fefine ko ʻení, ka naʻá na fakafōtunga ʻa e ngaahi ʻulungaanga ʻo ha kaumeʻa moʻoni. Naʻá na fakatou maʻu ha aʻusia fakalaumālie fakaofo tatau peá na takitaha tāpuekina ha niʻihi kehe ʻaki ʻena fakamoʻoní. Neongo naʻá na kau ki ha ngaahi tuʻunga fakasōsiale kehekehe—ko e taha ko ha kaunanga pea ko e taha ko ha houʻeiki—ka naʻe ʻikai ke na tokanga ki he ngaahi faikehekehe ko iá. Naʻá na hiki ʻa e kakaí, fakatuʻasino mo fakalaumālie fakatouʻosi, pea tokoni ke liliu ha puleʻanga kakato.
-
Fakamatala nounou: ʻI heʻetau sio fakalaka ʻi he ngaahi meʻa fakamāmani te ne ala vahevaheʻi kitautolú, te tau lava mo e kakai tui faivelenga kehé ʻo ala atu ke lilliu ʻa e māmaní.
Ko e Leá mo e Faʻa Fakamolemolé: Peiholani mo e ʻEikitau ko Molonaí (Lau hona talanoá ʻi he ʻAlamā 61)
Naʻe fakatou feinga ʻa Peiholani mo e ʻEikitau ko Molonaí ke fakahaofi hona fonuá mei he taú. Koeʻuhí ko ʻenau founga fetuʻutakí pē ʻa e faitohi vāmamaʻó, naʻe ʻikai ke na ʻiloʻi maʻu pē ʻa e meʻa naʻe hoko ʻi he moʻui ʻa e taha ko eé. Naʻe iku ʻeni ki ha ngaahi taʻe-femahinoʻaki lalahi! Ka naʻe ʻikai ke na nofo loto-mamahi ai pē mo ʻita, naʻa na muimui ʻi he ngaahi akonaki ʻa e Fakamoʻuí mo fefakamolemoleʻaki ʻi he loto-fakatōkilalo. Ne fāifai peá na fetokoniʻaki peá na laka ki muʻa—mo hona fonuá kotoa.
-
Fakamatala nounou: Te tau lava ʻo fakaleleiʻi ʻa e ngaahi palopalemá ʻaki ʻa e faʻa fakamolemolé pea tokanga pē ki he meʻa ʻe lelei maʻá e niʻihi kehé, ʻo aʻu ki he taimi ʻoku ʻikai mahino ai kiate kitautolu ʻa e ʻuhinga ʻoku tōʻonga kehe ai ʻa e niʻihi kehé.