“Ko e Fakamoʻoní ʻOku Hangē …,” Ki Hono Fakamālohia ʻo e Toʻu Tupú, Sune 2024.
Ko e Fakamoʻoní ʻOku Hangē …
ʻŪ tā fakatātā ʻa Uran Duo
ʻI he lolotonga ʻo e moʻui ʻa e Fakamoʻuí, naʻá Ne akoʻi ʻa e kakaí ʻaki ha ngaahi tala-fakatātā mo ha ngaahi talanoa. Naʻá Ne fakaʻaongaʻi he taimi ʻe niʻihi ha ngaahi talanoa kehekehe ke akoʻi ʻa e meʻa tatau (hangē ko ia ʻi he Luke 15).
ʻE ala tokoni ke vakai ki ha tefitoʻi moʻoni ʻo e ongoongoleleí mei ha ngaahi tafaʻaki kehekehe. Ko ha ngaahi founga ʻeni ʻe niʻihi ke vakai ai ki ha fakamoʻoni ki he ongoongolelei ʻo Sīsū Kalaisí, kau ai ha niʻihi mei he ngaahi folofolá.
Ko e fakamoʻoní ʻoku hangē …
Ha Tengaʻi ʻAkaú
Ko e taimi ʻokú ke tō fiefia ai ha tengaʻi ʻakau, pe ko e folofola ʻa e ʻOtuá, ʻi ho lotó, te ke lava ʻo sio ki heʻene tupu mo ʻomi ha fua leleí. Ko hono fakalea ʻe tahá, ko e taimi ʻe niʻihi ʻoku tupu lelei taha ha fakamoʻoni ʻi he taimi ʻokú ke loto-fiemālie ai ke ʻahiʻahiʻi ʻa e founga kuo kole mai ʻe he ʻOtuá, ʻo tatau ai pē kapau ʻokú ke maʻu pē ha kihiʻi holi ke tui. Pea ʻe toki lava leva ke fakahaaʻi atu ʻe he ʻOtuá ʻa e ngaahi fua, pe ngaahi tāpuaki, ʻoku maʻu ʻi he taimi ʻokú ke muimui ai kiate Iá. ʻE tupulaki hoʻo fakamoʻoní ʻi hoʻo hokohoko atu ke tanumaki iá. (Vakai, ʻAlamā 32:28–43.)
Kuó u fakatokangaʻi nai ha faʻahinga fua lelei kuo maʻu mei hono tanumaki ʻeku fakamoʻoní?
Ha ʻĀ Maká
Ko e taimi ʻoku langa ai ʻe ha taha ha ʻā ʻaki ʻa e maká, ʻoku ʻikai lahi tatau mo fuo tatau ʻa e foʻi maka kotoa. Ko e taimi ʻe niʻihi he ʻikai feʻunga ha foʻi maka he taimi ko iá, ka ʻoku ʻikai ʻuhinga ia ke ke liʻaki ia! Ko e meʻa tatau pē, ʻe ala ʻi ai ha ngaahi meʻa fekauʻaki mo e ongoongoleleí ʻoku teʻeki mahino kiate koe. Hokohoko atu pē hono tanumaki hoʻo fakamoʻoní ʻaki ha foʻi maka ʻe taha ʻi he taimí, pea ʻe fāifai pē pea ʻe mālohi ia kiate koe.
Ko e hā ha ngaahi foʻi maka te u lava ʻo kātakiʻi ʻi heʻeku langa ʻeku ʻā ʻo e fakamoʻoní?
Ha Lolo ʻi ha Maama
ʻI he tala-fakatātā ʻo e kau tāupoʻou ʻe toko hongofulú, naʻe ʻi ai ha kau fefine ʻe toko nima naʻe ʻikai haʻanau lolo. Naʻe ʻikai ke nau lava ʻo kole ha lolo mei he toengá he kuo hokosia ʻa e taimi ke nau feʻiloaki ai mo e tangata taʻané, ʻa ia ʻokú ne fakafofongaʻi ʻa Sīsū Kalaisi. Naʻe lava ʻe kinautolu naʻe ʻi ai ʻenau loló ʻo muimui ʻi he tangata taʻané. ʻI heʻene fekauʻaki mo e fakamoʻoní, ʻe ʻi ai pē taimi te ke fiemaʻu ai hoʻo fakamoʻoni pē ʻaʻau! Te ke lava ʻo fakafonu hoʻo fakamoʻoní ʻaki ʻa e tulutā ki he tulutā, hangē ha lolo ʻi ha māmá. Pea ko e taimi leva ʻe hoko mai ai ʻa e ngaahi fili mahuʻingá, ʻe lava ke fakamaama ʻe hoʻo fakamoʻoní ʻa e halá maʻau. (Vakai, Mātiu 25:1–13.)
Ko e hā ʻoku ou fai ke fakatupulaki ʻeku fakamoʻoní ʻi he foʻi tulutā ki he foʻi tulutaá? Ko e hā ha meʻa te u lava ʻo kamata fakahokó?
Ha Kiʻi Monumanu Pusiakí
Kapau he ʻikai ke ke fafanga mo tokangaʻi ha monumanu ʻokú ne fiemaʻu koe, ʻe ala fiekaia, puke, mo vaivai. Kapau he ʻikai ke ke fafanga hoʻo fakamoʻoní ʻaki ha ngaahi aʻusia mo e tokanga fakalaumālie, ʻe ala ngāvaivai ange mo ia.
Ko e hā ha ngaahi meʻa fakalaumālie te u lava ʻo “fafanga” ʻaki ʻeku fakamoʻoní ke kei mālohi?
Ha Fuʻu ʻAkau ʻi ha Ngoué
Kapau ʻoku polililili ha fuʻu ʻakau ʻi ha ngoue, ʻoku ʻikai ʻuhinga ia ʻoku ʻikai moʻui lelei ʻa e ngoué kotoa. Ko ia, kapau ʻoku mālohi ange ha konga ʻe taha ʻo hoʻo fakamoʻoní ʻi he konga ʻe tahá, ʻoku sai pē ia! Tokanga pē ki he fanga kiʻi ʻakau ʻoku moʻui lelei mo maʻuiʻuí, pea ko e taimi pē ʻokú ke mateuteu aí, te ke lava leva ʻo tokanga ki he fanga kiʻi ʻakau ʻoku fiemaʻu ha tokoni lahi angé.
Ko e fē ʻa e ngaahi konga ʻo ʻeku fakamoʻoní ʻoku mālohi mo maʻuiʻuí? Ko e fē ʻa e ngaahi konga te u lava ʻo ʻofa mo tokanga ki ai ʻi he taimi ʻoku ou mateuteu aí?
Ha Falé
ʻOku mahuʻinga ʻa e feituʻu ʻokú ke langa ai ho falé. Ko e meʻa tatau pē ʻoku hoko moʻoni ʻi hoʻo fakamoʻoní. Kapau te ke langa ia ʻi ha fakavaʻe ʻoneʻone, mahalo he ʻikai tolonga fuoloa ia ʻi ha kovi ʻa e ʻeá. Ka ʻo kapau te ke langa ia ʻi ha funga maka, pe ko Sīsū Kalaisi, ʻe lava ke tuʻu maʻu ho falé ʻo aʻu pē ki he ngaahi matangi mālohi tahá. (Vakai, Mātiu 7:24–47; Hilamani 5:12.)
Ko e hā ha ngaahi moʻoni ʻoku ou langa ai ʻeku fakamoʻoní?
Ha Pāsoló
ʻOku tau maʻu kotoa ʻa e ngaahi kongokonga tatau ʻo e ngaahi moʻoni ʻo e ongoongoleleí ke ngāueʻi, ka ko e fakahokohoko ʻoku fokotuʻutuʻu ai ʻe he tokotaha takitaha ʻa e ngaahi meʻá ʻe kehekehe pē ia. ʻOua naʻá ke liʻaki ha konga koeʻuhí pē ʻoku ʻikai ke ke ʻilo ʻa e founga ʻe fehokotaki lelei ai ʻi he taimi ní. Faʻa kātaki he ʻe faitokonia koe ʻe he ʻOtuá ke ke sio kakato ki he fakatātaá.
ʻOku fōtunga fēfē ʻa e fakatātā ʻo ʻeku fakamoʻoní he taimí ni?
Ha Kané
ʻI he tulutā takitaha, ʻe fakafonu ia ʻe he ngaahi aʻusia fakalaumālie ʻokú ke maʻú. Ka ke tokanga! Ko e taimi ʻe niʻihi ʻoku ʻikai ke ke fakatokangaʻi ʻoku fonu māmālie pē hoʻo kané. Kapau he ʻikai ke ke faʻa kātaki peá ke huaʻi kotoa hoʻo kané ke maha he ʻokú ke ongoʻi ʻoku ʻikai ke ʻi ai haʻo fakamoʻoni ki ha meʻa ʻe taha, ʻokú ke tukunoaʻi ai ʻa e ngaahi aʻusia ʻoku nau tokoniʻi māmālie hoʻo fakamoʻoní ke tupulakí. Tuku ke fakafonu hoʻo kane fakamoʻoní.
Ko e hā ha meʻa kuó u ʻosi tui ki ai ʻoku ʻikai totonu ke u liʻaki?