Ngaahi Lea ke Moʻui ʻAkí

“ʻOku ʻIkai ha Meʻa ʻe Fakaʻofoʻofa mo Lelei Pehē ʻo Tatau mo ʻEku Fiefiá”

Fai ʻe ʻEletā Craig C. Christensen

ʻO e Kau Fitungofulú

Toʻo mei ha lea ʻi he konifelenisi lahi ʻo ʻEpeleli 2023.

Ko e fiefiá ko ha ʻulungaanga faka-ʻOtua ia. ʻOku loloto, langaki moʻui, tolonga mo liliu-moʻui lahi ange ia ʻi ha faʻahinga fakatōliʻa pe fiemālie ʻe lava ke maʻu ʻi he māmani ko ení.

ʻOku malava ke maʻu ʻa e fiefiá ʻi he huhuʻi ʻoku fakafou ʻi he Fakamoʻui ko Sīsū Kalaisí.

ʻŪ tā fakatātā ʻa Katy Dockrill

ʻOku Hoko Mai ʻa e Fiefiá ʻi he Fakatomala Moʻoní

ʻOku ʻomi ʻe he fakatomalá ʻa e fiefiá he ʻokú ne teuteuʻi hotau lotó ke maʻu ʻa e ivi tākiekina ʻo e Laumālie Māʻoniʻoní. ʻOku ʻuhinga ʻa e fakafonu ʻaki ʻa e Laumālie Māʻoniʻoní ke fonu ʻi he fiefia. Pea ʻoku ʻuhinga ʻa e fakafonu ʻaki ʻa e fiefiá ke fakafonu ʻaki ʻa e Laumālie Māʻoniʻoní.

ʻOku Hoko Mai ʻa e Fiefiá ʻi he Tokoniʻi e Niʻihi Kehé ke Fakatomalá

ʻI he hili ʻetau ongoʻi ʻa e fiefia ʻoku maʻu mei he fakatomala moʻoní, ʻoku fakanatula pē ʻetau fakaʻamu ke vahevahe ʻa e fiefia ko iá mo e niʻihi kehé. ʻI heʻetau fai iá, ʻe tupulaki ʻetau fiefiá.

ʻOku Hoko Mai ʻa e Fiefiá ʻi he Haʻu kia Kalaisí

Ko e tefitoʻi taumuʻa pē ʻa Sīsū Kalaisí, ʻa ʻEne “ngāué mo [ʻEne] nāunaú” (Mōsese 1:39) ke tokoniʻi kitautolu ke tau maʻu ʻa e fiefia kakató ʻiate Ia.

Ko e fakatomala fakaʻahó mo e haʻu kia Sīsū Kalaisí ko e founga ia ke aʻusia ai ʻa e fiefiá—ko ha fiefia ʻoku mahulu hake ʻi he meʻa ʻoku tau mafakakaukauá. Ko e ʻuhinga ia ʻoku tau ʻi he māmaní aí.

Ko e fē ha taimi naʻá ke ongoʻi ai ʻa e fiefiá? Talanoa mai fekauʻaki mo hoʻo ʻausiá ʻi he [e-mail].