“Naʻe ʻikai fuoloa ʻa e mālōlō ʻa ʻeku tangataʻeikí. Te u lava fēfē ke toe ongoʻi fiefia? Ko hoku kaumeʻa lelei tahá ia.,” Ki Hono Fakamālohia ʻo e Toʻu Tupú, Sune 2024.
Ngaahi Fehuʻí mo e Talí
“Naʻe ʻikai fuoloa ʻa e mālōlō ʻa ʻeku tangataʻeikí. Te u lava fēfē ke toe ongoʻi fiefia? Ko hoku kaumeʻa lelei tahá ia.”
“Te tau toetuʻu kotoa pē, kau ai hoʻo tamaí. Ko e ʻaho ko iá ʻe fakaʻofoʻofa. ʻOku toe tokoni foki ʻa e lotu ke tokoni ʻa e ʻEikí ʻi he faingataʻa ko ʻení.”
Lola L., 11, Lio Kuleni to Sula, Palāsila
“Naʻe mālōlō siʻeku tangataʻeikí ʻoku ou kei siʻi. Ko e fiefiá ʻe lava ke ongo taʻemalava ʻaupito. Neongo ia, ka te u lava ʻo fakamoʻoni ʻoku ʻikai ke taʻemalava ke aʻusia ia. Tuʻunga ʻi he palani ʻa e Tamai Hēvaní, ko e ʻilo ko ia ʻoku ʻikai ko e ngataʻangá ʻa e maté kuó ne ʻomi ai kiate au ha fiefia lahi ange ʻe lava ke maʻu ʻi ha toe feituʻu. Fiemālie ʻi hoʻo ʻilo te ke toe fakataha mo hoʻo tamaí.”
Kilisitina V,. 18, Tekisisi, USA
“Kuó u ʻiloʻi te u lava pē ʻo kei fiefia ʻaki haʻaku fekumi ki he ngaahi maná. Manatuʻi pea fakakaukau ki ha ngaahi founga naʻe teuteuʻi ai koe ʻe he ʻEikí ki ho faingataʻaʻiá. ʻOku ou fakatokangaʻi ko e taimi ʻoku ou ʻalu ai ki he temipalé, ʻoku ou ongoʻi mālohi ange ai ʻeku tamaí ʻi ai. Lotu ke ke ongoʻi ʻokú ke ʻi ai mo hoʻo tamaí pea mo ongoʻi ʻa e fakafiemālie ʻa e ʻEikí.”
Matiseni R., 13, ʻIutā, USA
“Koeʻuhí naʻe pekia ʻa Sīsū maʻatautolu, ʻoku tau maʻu ai ʻa e faingamālie ke toe moʻui. Falala kiate kinautolu ʻokú ke ʻofa ai ʻoku mou feohí, pea ʻe fakafiemālieʻi koe ʻe he Laumālié ʻi ho ngaahi faingataʻá. Manatuʻi naʻe ongoʻi mo ʻafioʻi ʻe Sīsū ʻa e meʻa ʻokú ke fouá, pea he ʻikai ke ke teitei tuēnoa.”
Pilinilī F., 13, Tekisisi, USA
“Talu ʻa e siʻi mālōlō ʻeku tangataʻeikí, mo ʻeku ʻilo ʻoku tokoni ʻeku ʻalu ke fakahoko ʻa e papitaiso fakafofonga ʻi he temipalé ke u fiefia. ʻOku ʻikai faingofua maʻu pē ke manatuʻi ʻa e ngaahi manatu melié ʻi he taimi ʻokú ke loto-mamahi aí. Neongo ia, ka te ke lava ʻo kiʻi fiefia ange ʻi he ʻaho takitaha ʻaki haʻo tokoni ki ha niʻihi kehe hangē ko e ngāue fakatemipalé mo e hisitōlia fakafāmilí.”
ʻAivolī M., taʻu 13, ʻAiouā, USA