“Feʻunga Ia kiate Au,” Ki Hono Fakamālohia ʻo e Toʻu Tupú, Sune 2024.
Ngaahi Leʻo ʻo e Toʻu Tupú
Feʻunga Ia Kiate Au
Ko e taimi naʻá ku hiki ai ki ʻAilaní, naʻe hoko ʻeku tuí ke u ongoʻi kehe ai mei he taha kotoa. Naʻá ku fakatokangaʻi naʻe fiemaʻu ke u fakakaukauʻi ʻa e ʻuhinga naʻá ku fai ai ʻa e meʻa naʻá ku faí. Hili haʻaku fakatotolo, naʻá ku pehē leva naʻá ku fiefia ʻi he moʻui ʻaki ʻa e ngaahi fekaú.
Ka ʻi he taʻu kuo ʻosí, naʻá ku foua ʻa e meʻa tatau. Naʻá ku kamata fakakaukau ki he meʻa naʻá ku fakaʻamu ke fai ʻi he taimi te u ʻosi ai mei he akó, hangē ko e ʻalu ʻo ngāue fakafaifekaú. Naʻá ku ʻiloʻi kapau te u ngāue fakafaifekau, naʻe fiemaʻu ke u tui ki he ngaahi meʻa te u akoʻi ki he kakaí.
Naʻe kamata ke u ako lahi ange ʻa ʻeku tui fakalotú. Kae mahuʻinga tahá, naʻe kamata ke u ako fakamātoato ʻa e Tohi ʻa Molomoná. Ko e fuofua taimi ia ke u lau māmālie ai ʻa e Tohi ʻa Molomoná mo faʻa lotu. Naʻá ku ʻamanaki au ke u ʻiloʻi fakafokifā pē ʻoku moʻoni ʻa e tohí, hangē ko e meʻa naʻe aʻusia heʻeku tangataʻeikí ʻi heʻene kau ki he Siasí. Naʻá ku ʻiloʻi ʻi heʻeku lau iá, naʻá ku ongoʻi fiefia mo ofi ange ki he ʻOtuá. Ka naʻe ʻikai ke u maʻu ʻa e ongoʻi māfana tatau ko iá.
Naʻá ku tuku ʻa e vahe fakaʻosí ke u lau fakataha ia mo e ongo faifekau ʻi homau feituʻú. Naʻe kamata ha taha ʻiate kinaua ke talanoa ki he founga naʻá ne maʻu ai ha aʻusia tatau, ka naʻe ʻikai ke ne ʻilo ʻa e meʻa naʻá ku ongoʻí. Naʻá ne pehē ko ha kakai ʻe niʻihi, ko e maʻu ha fakamoʻoní ʻoku hangē ia ko ha kamosi ʻo ha ʻuhila ke moʻuí. Ka ki ha niʻihi kehe, ʻoku hangē ia ko e hopo hake ʻa e laʻaá. Naʻá ne pehē, “Pea ʻoku feʻunga pē ia kiate au.”
ʻOku ʻikai ke u haohaoa. ʻOku ʻi ai e ngaahi ʻaho ʻe niʻihi ʻoku ʻikai ke u lautohi ai, koeʻuhí pē ko haʻane ngalo, pe ko e taimi ʻe niʻihi koeʻuhí pē ko haʻaku kumi ʻuhinga ke ʻoua naʻá ku lautohi. ʻOku kei tupulaki pē ʻeku fakamoʻoni ki he Tohi ʻa Molomoná. Ka ʻoku ou tui ʻoku moʻoni ia. ʻOku ou saiʻia moʻoni ʻi he Tohi ʻa Molomoná. Ko e lahi ange ʻeku lau iá, ko e lahi ange ia ʻeku saiʻia aí, pea tali ai mo ʻeku ngaahi fehuʻí.
Pea ko e taimi ní, ʻoku feʻunga pē ia kiate au.
Meka S., taʻu 17, Tupilini, ʻAilani
ʻOku saiʻia ʻi he ʻātí, nití, mo e tā kītaá.