Fakafehokotaki ki he Mālohi ʻo Kalaisí
Ko ha ngaahi tefitoʻi moʻoni ʻeni ʻe niʻihi ke fakakaukau ki ai mo lotu ki ai ʻo fekauʻaki mo e mālohi fakaivia ʻo e Fakamoʻuí.
Mei he fakamafola ʻo e ʻAho Fakaemāmāni Lahi ʻo e Fakamoʻoní: ʻOku ou Faʻa Fai ʻa e Meʻa Kotoa Pē ʻia Kalaisi, 22 ʻOkatopa 2023.
Siʻoku ngaahi kaungāmeʻa kei talavou, ʻoku ou fakaʻamu ke mou ʻiloʻi ko Sīsū Kalaisi mo ʻEne ongoongolelei kuo fakafoki maí ʻa e ongo maʻuʻanga tokoni lahi taha ʻo e moʻoní mo e mālohí ʻi he māmaní. ʻOku tokoniʻi ʻe he mālohi fakaivia ʻo e Fakamoʻuí ʻa e tokotaha kotoa pē ʻoku haʻu kiate Iá. ʻOku fonu ʻa ʻEne ongoongoleleí ʻi he mālohi fakaiviá koeʻuhí he ʻoku ʻi ai ʻa e ngaahi moʻoni taʻengata ʻoku fakalahi ʻaki ʻa e mafai ʻo Hono lakanga fakataulaʻeikí. ʻI he taimi ʻoku tau talangofua ai ki Heʻene ngaahi fekaú, ʻe lava ke faitāpuekina kitautolu takitaha ʻe Hono mālohi ʻo elakanga fakataulaʻeikí. ʻOku ʻikai ke u lava ʻo fakakaukau ki ha meʻa ʻe mahuʻinga ange ke mahino kiate kimoutolu ʻi he tuʻunga ko ʻeni ʻo hoʻomou moʻuí.
ʻI he fekauʻaki mo e ʻilo ko ʻení, te u lave ki ha niʻihi ʻo e ngaahi tefitoʻi moʻoni ke mou fakakaukau mo lotu ki ai.
ʻUluaki mo mahuʻinga tahá, ʻoku fiemaʻu ke ke ʻiloʻi ko hai moʻoni koe. Ko ha foha pe ʻofefine koe ʻo e ʻOtuá. ʻI hoʻo hoko ko e mēmipa ʻo e Siasí ni, ʻokú ke hoko foki ko ha foha pe ʻofefine ʻo e fuakavá. Pea ko ha ākonga takitaha kimoutolu ʻo Sīsū Kalaisi. Ko e ngaahi meʻa ʻe tolu ko ʻeni ʻoku ʻiloʻi ʻaki koé (fānau ʻa e ʻOtuá, fānau ʻo e fuakavá, mo e ākonga ʻo Kalaisí) ʻoku mahuʻinga ange ia ʻi ha toe meʻa kehe ʻoku ʻiloʻi ʻaki koe. Toutou fakamanatu ʻa e ngaahi moʻoni ko ʻeni fekauʻaki mo koé ʻi ho ʻatamaí. Lea leʻolahi ʻaki ia.
ʻIkai ko ia pē, ka ko e kahaʻu foki kimoutolu ʻo e Siasí mo e māmaní. ʻOku ʻikai ngata pē ʻi heʻeku falala kiate kimoutolú, ka ʻoku falala foki mo hoʻomou Tamai Hēvaní mo Sīsū Kalaisi kiate kimoutolu. Naʻe ʻomi kimoutolu ki he māmāní ʻi he taimí ni koeʻuhí he naʻe ʻafioʻi ʻe he ʻOtuá te mou lava ʻo mālohi mo loto-toʻa. Pea ʻoku fiemaʻu ʻe he ʻOtuá ha ngaahi foha mo ha ngaahi ʻofefine mālohi mo loto-toʻa ʻi he māmāní ʻi he taimí ni.
Naʻe ʻikai ʻomi koe ki hení ke ke tō. Naʻe ʻomi koe ki he māmāní ke ke lavameʻa—pea mo tokoniʻi ʻa e niʻihi kehé ke nau lavameʻa. ʻI hoʻo muimui kia Sīsū Kalaisí, te ke maʻu ʻa e mālohi mo e loto-toʻa kotoa te ke fiemaʻú ke ke fehangahangai ai mo e fakafepakí ʻi he māmani fakatuʻutāmaki ko ʻení. ʻOku ou palōmesi atu ia kiate koe.
Ako ʻa e founga ke maʻu ai ʻa e fakahā fakatāutahá. ʻOku ʻikai ha toe meʻafoaki ʻi he māmaní ʻo hangē ko e meʻafoaki ʻo e Laumālie Māʻoniʻoní. Feinga ke ke kiʻi fakalakalaka ʻi he ʻaho taki taha. ʻE lava ke tokoniʻi koe ʻe he Laumālie Māʻoniʻoní. ʻE fakautuutu hoʻo ʻiloʻi lelei ange ʻa ʻEne ngaahi ueʻí. Te Ne tokoniʻi koe ke ke ʻilo ʻa e meʻa ke faí mo e meʻa ke ʻoua naʻá ke faí, feituʻu ke ke alu ki ai mo e feituʻu ke ʻoua naʻá ke ʻalu ki aí. Te Ne tokoniʻi koe ke ke ʻiloʻi ho ngaahi kaungāmeʻa moʻoní mo kinautolu ʻoku ʻikaí. ʻE ʻoatu ʻe he Laumālie Māʻoniʻoní ʻa e mālohi pea tauhi koe ke ke malu.
Talangofua fakapapau ki he Lea ʻo e Potó mo e fono ʻo e angamaʻá. ʻI hoʻo fakahoko iá te ke maʻu ʻa e mālohi fakatuʻasino mo fakalaumālie ʻa ia ʻoku ʻikai maʻu ʻe kinautolu ʻoku ʻikai ke nau talangofua ki he ngaahi fekau ko ʻení. ʻI hoʻo hokohoko atu ʻi he tuí mo e talangofuá, ʻe fakalahi ʻe he ʻEikí ho ivi malava ke ke ikunaʻi ʻa e ngaahi faingataʻa ʻi hoʻo moʻuí.
Kole ʻi he faʻa lotu ki he ʻOtuá ke Ne tokoniʻi koe ke ke fakamālohia ha tui ʻoku mālohi angé. Ko e tui ki heʻetau Tamai Hēvaní mo Hono ʻAlo ʻOfaʻangá, fakataha mo e fakatomala fakaʻahó, ʻe fakalahi ai ʻa hoʻo maʻu ʻa e mālohi faka-ʻOtuá.
Kapau ʻokú ke ongoʻi kuo tāumamaʻo pe fuʻu fuoloa ho mavahe mei he hala ʻo e fuakavá, tuku ke u fakapapauʻi atu ʻoku ʻikai moʻoni ia. ʻOku fakafou ʻi he Fakalelei ʻa Sīsū Kalaisí, ʻa e malava ke maamangia mo fakatuʻamelie ho kahaʻú. Talanoa mo hoʻo mātuʻá pea mo hoʻo pīsopé pe palesiteni fakakoló. Te nau tokoniʻi koe ke ke toe foki ki he hala ʻo e fakalakalaká. Kātaki muʻa ʻo foki mai ki he fiefia mo e malu ʻo e hala ʻo e fuakavá. ʻOku mau fiemaʻu koe ke tau kau fakataha.
ʻE hoko mai ʻa e tumutumu hoʻo lavameʻá ʻi hoʻo haʻi koe ki he Tamai Hēvaní mo Sīsū Kalaisí. ʻOku ou ʻilo ko e moʻui ʻoku ʻikai kau ai ʻa e ʻOtuá ko ha moʻui mohu tailiili ia. ʻOku ou ʻilo foki ko e moʻui ʻoku kau ai ʻa e ʻOtuá ko ha moʻui ia ʻoku mahu ʻi he melino, fiefia mo e mālohi. Fakapapauʻi ke ke moʻui mo e ʻOtuá.
Siʻoku kāinga kei talavou, ʻoku mateuteu ʻetau Tamai Hēvaní mo Hono ʻAlo ʻOfaʻanga ko Sīsū Kalaisí, ke tāpuakiʻi kimoutolu. He ʻikai ke Na liʻaki kimoutolu.