ចាប់យក សម័យរបស់ប្អូន

ដោយ ដេវីឌ អេ អេដវើដស៍

ទស្សនាវដ្ដីសាសនាចក្រ

តើប្អូនប្រាថ្នាចង់រស់នៅក្នុងអតីតកាលដែរឬទេ ? មែនហើយ មិនបាច់ទេ ។

រូបភាព

ដៃកាន់បាល់ដែលមានពន្លឺ

រចនារូបភាពដោយ អាលីស្សា ភីធើរសិន

តើប្អូនធ្លាប់គិតថាជីវិតរបស់ប្អូននឹងកាន់តែងាយស្រួល ឬប្រសើរជាងនេះ ប្រសិនបើប្អូនបានកើតនៅសម័យមុននេះឬទេ ? អ្នកដទៃធ្លាប់មានអារម្មណ៍បែបនេះពីមុន សូម្បីតែព្យាការីធ្លាប់មានម្តងម្កាលដែរ ។

ព្យាការី នីហ្វៃ ( នៅក្នងគម្ពីរហេលេមិន ) បានមើលឃើញប្រជាជនរបស់លោកមានភាពរឹងរូស ទុច្ចរិតហើយបានអំពាវនាវថា ៖ « ឱ ប្រសិនបើខ្ញុំរស់នៅក្នុងសម័យដែលអយ្យកោនីហ្វៃរបស់ខ្ញុំ បានចេញមកជាមុនដំបូងពីដែនដីយេរូសាឡិម … — … នោះព្រលឹងរបស់ខ្ញុំ ច្បាស់ជាមានសេចក្ដីអំណរ » ( ហេលេមិន ៧:៧–៨ ) ។

លោកមានការលំបាកក្នុងការរស់នៅក្នុងសម័យរបស់លោក ។ ពិតមែនហើយនៅទីបញ្ចប់ លោកត្រូវប្រឈមមុខនឹងការពិត ៖ « ប៉ុន្តែ … ខ្ញុំត្រូវរស់ក្នុងសម័យនេះ » ( ហេលេមិន ៧:៩ ) ។

សម័យរបស់ប្អូន

នេះគឺជាសម័យ របស់ប្អូន ។ សម័យទាំងនោះអាចមាននូវឧបសគ្គ ប៉ុន្តែសម័យទាំងនោះក៏ផ្តល់ជាឱកាសផងដែរ ។ ឧទាហរណ៍ ៖ នៅក្នុងសម័យ របស់ប្អូន នោះប្អូនអាច ៖

ប្រមូលផ្ដុំវង្សអ៊ីស្រាអែលនៅសងខាងនៃវាំងនន ការប្រមូលផ្ដុំនោះ « គឺជាកិច្ចការដ៏សំខាន់បំផុតនៅលើផែនដីសព្វថ្ងៃនេះ » ។ ប្អូនមានវិធីជាច្រើនដើម្បីចែកចាយដំណឹងល្អ ហើយអញ្ជើញអ្នកដទៃឲ្យខិតទៅជិតព្រះយេស៊ូវគ្រីស្ទ និងសាសនាចក្ររបស់ទ្រង់ ។ ប្អូនអាចជួយស្វែងរកបុព្វការីជនតាមរបៀបដ៏អស្ចារ្យ និងជួយដល់អ្នកទាំងឡាយដែលបានទទួលមរណភាពទៅហើយ ឲ្យទទួលពិធីបរិសុទ្ធនៅក្នុងព្រះវិហារបរិសុទ្ធ ។
សូមប្រើបច្ចេកវិទ្យាតាមវិធីវិជ្ជមាននានា ។ ប្អូនត្រូវបានបំពាក់នូវបច្ចេកវិទ្យាយ៉ាងពិសេសដើម្បីបង្ហាញពិភពលោកអំពីរបៀបដែលបច្ចេកវិទ្យាទំនើបនេះអាចត្រូវបានប្រើសម្រាប់ការណ៍ល្អ ។
ទប់ទល់នឹងការស្អប់ ការមើលងាយ និងការបែកបាក់ ។ ពេលសេចក្ដីអាក្រក់ទាំងនេះញាំញីពិភពលោករបស់យើង ប្អូនក៏អាចបង្ហាញផ្លូវមួយដ៏ល្អប្រសើរជាងមុន—គឺផ្លូវនៃសេចក្តីសប្បុរស ចិត្តអាណិតអាសូរ ការបង្កើតភាពសុខសាន្ត និងសេចក្តីស្រឡាញ់របស់ព្រះអង្គសង្រ្គោះ ។
សូមមានភាពខ្ជាប់ខ្ជួនក្នុងពិភពដ៏ផ្លាស់ប្ដូរមួយនេះ ។ ពេលប្អូនមានចិត្តស្មោះត្រង់ចំពោះព្រះយេស៊ូវគ្រីស្ទ ដំណឹងល្អរបស់ទ្រង់ និងសាសនាចក្ររបស់ទ្រង់ នោះព្រះអម្ចាស់នឹងប្រទានពរដល់ប្អូន ហើយអ្នកដទៃនឹងសម្លឹងមើលគំរូរបស់ប្អូននៅក្នុងខ្យល់ព្យុះនៃជីវិត ។

អព្ភូតហេតុរបស់ប្អូន

វាមិនមែនជាការងាយស្រួលជានិច្ចសម្រាប់ នីហ្វៃ ទេ ប៉ុន្តែលោកនៅកន្លែង ( និងនៅពេល ) ដែល ព្រះអម្ចាស់ត្រូវការឲ្យលោកនៅ ។ លោកស្មោះត្រង់ ។ ជាលទ្ធផល លោកបានមើលឃើញអព្ភូតហេតុ និងភាពអស្ចារ្យនានានៅក្នុងជំនាន់របស់លោក ហើយត្រូវបានគាំទ្រដោយព្រះអម្ចាស់ ។ ( សូមមើល ហេលេមិន ៧–១៦ ) ។

ប្អូនអាចមើលឃើញអព្ភូតហេតុ និងភាពអស្ចារ្យនានារបស់ប្អូនផ្ទាល់នៅពេល ប្អូន ស្មោះត្រង់នៅក្នុងជំនាន់ របស់ប្អូន ។