ចូរមកតាមខ្ញុំ
តើ ប្អូន នឹងស្តាប់ឬទេ ?
ការណែនាំរបស់ព្យាការីអាចការពារ ប្រទានពរ និងជួយយើងបាន—ប្រសិនបើយើងអនុញ្ញាតឲ្យរឿងនោះកើតឡើង ។
រចនារូបភាពដោយ អាលីហ្សា ថាលិនថ៍
« ការបំផ្លិចបំផ្លាញមកដល់ហើយ !»
នោះគឺជាសារលិខិតដ៏សោកសៅមួយដើម្បីទទួលយក ។ តែសូមស្រមៃមើលថាប្អូនគឺជាអ្នកដែលត្រូវ ប្រគល់ សារលិខិតនោះ !
សាំយូអែលសាសន៍លេមិនត្រូវបានហៅដោយព្រះអម្ចាស់ឲ្យព្រមានពួកសាសន៍នីហ្វៃអំពីអំពើអាក្រក់របស់ពួកគេ ។ ដោយឈរលើកំផែង សាំយូអែល បានប្រកាសថាថ្ងៃមួយនោះ « ការបំផ្លិចបំផ្លាញទាំងស្រុង … នឹងកើតឡើងជាប្រាកដ លើកលែងតែអ្នកប្រែចិត្ត » ( ហេលេមិន ១៣:១០ ) ។
សាំយូអែលក៏បានបញ្ជាក់ថាក្នុងរយៈពេលប្រាំឆ្នាំនឹងមានយប់មួយដែលគ្មានភាពងងឹត និងមានផ្កាយថ្មីនៅលើមេឃដើម្បីសម្គាល់កំណើតរបស់ព្រះអង្គសង្រ្គោះ ( សូមមើល ហេលេមិន ១៤:២–៥ ) ។
តើពួកសាសន៍នីហ្វៃបានតបតយ៉ាងណាចំពោះសាររបស់សាំយូអែល ?
ពួកគេបដិសេធមិនព្រមស្តាប់ទេ ។ ពួកគេ « ចោលដុំថ្មទៅលើ [ សាំយូអែល ] … និង … បានបាញ់ព្រួញទៅលើលោកនៅពេលលោកឈរលើកំផែង » ( ហេលេមិន ១៦:២ ) ។ ជាសំណាងល្អដែលមនុស្សមិនបានចោលថ្ម ឬបាញ់ព្រួញទៅលើព្យាការីសព្វថ្ងៃនេះ ប៉ុន្តែមនុស្សជាច្រើននៅតែបដិសេធ និងសើចចំអកចំពោះពាក្យសម្តីរបស់លោកនៅពេលដែលលោកបង្រៀនសេចក្ដីពិតដ៏អស់កល្បជានិច្ចនៃដំណឹងល្អរបស់ព្រះអង្គសង្គ្រោះ ។
នៅពេលព្យាការីមានប្រសាសន៍ តើ ប្អូន នឹងឆ្លើយតបដោយរបៀបណា ? តើប្អូននឹងស្តាប់ឬទេ ?
នេះគឺជាការរំឭកបីយ៉ាងអំពីពរជ័យដែលបានមកពីការមានព្យាការីនៅលើផែនដី ហើយស្តាប់តាមលោក ។
ព្យាការីស្រឡាញ់យើង ហើយអធិស្ឋានសម្រាប់យើង
នៅក្នុងសុន្ទរកថាសន្និសីទទូទៅជាច្រើន ប្រធាន រ័សុល អិម ណិលសុន បានប្រាប់យើង ៖
« ខ្ញុំស្រឡាញ់បងប្អូន ! » « ខ្ញុំគិតដល់បងប្អូន និងអធិស្ឋានសម្រាប់បងប្អូនឥតឈប់ឈរ » ។
នេះជាពរជ័យដ៏អស្ចារ្យដែលដឹងថាព្យាការីស្រឡាញ់យើង ហើយអធិស្ឋានសម្រាប់យើង !
ជិត ៥ ឆ្នាំ ក្រោយពីសាំយូអែលសាសន៍លេមិនបានព្យាករ នោះពួកសាសន៍នីហ្វៃមួយចំនួនបាននិយាយថាពេលវេលាបានកន្លងផុតទៅហើយដើម្បីឲ្យពាក្យសម្ដីរបស់លោកបានបំពេញ ។ ពួកគេបានសើចចំអកដល់អស់អ្នកដែលជឿ ហើយថែមទាំងបានជ្រើសរើសថ្ងៃមួយដើម្បីសម្លាប់ពួកអ្នកជឿ ប្រសិនបើសញ្ញានៃកំណើតរបស់ព្រះអង្គសង្រ្គោះមិនបានកើតឡើង ( សូមមើល នីហ្វៃទី៣ ១:៦–៩ ) ។ ក្នុងអំឡុងពេលដ៏គួរឲ្យភ័យខ្លាចនេះព្យាការីនីហ្វៃបានអធិស្ឋានពេញមួយថ្ងៃ « ជំនួសប្រជាជនរបស់លោក … ដែលជិតនឹងត្រូវបំផ្លាញចោល ដោយសារតែសេចក្ដីជំនឿរបស់គេ » ( នីហ្វៃទី៣ ១:១១ ) ។
សព្វថ្ងៃនេះការអធិស្ឋានរបស់ព្យាការីជួយយើងតាមវិធីជាច្រើនដែលយើងមិនបានដឹង ។ ការណែនាំខាងវិញ្ញាណដែលលោកទទួលតាមរយៈការអធិស្ឋានប្រទានពរដល់លោកិយទាំងអស់ ។
ព្យាការីណែនាំយើងឲ្យទៅកាន់ព្រះអង្គសង្គ្រោះ
ព្រះអម្ចាស់បានមានបន្ទូលទៅកាន់ពួកសាសន៍នីហ្វៃថា « ចូរងើបឡើង ហើយមានសេចក្ដីសង្ឃឹមចុះ » ។ « ពេលនោះជិតមកដល់ហើយ ហើយនៅក្នុងយប់នេះ ទីសម្គាល់នឹងលេចមក ហើយថ្ងៃស្អែកឡើង យើងនឹងចុះមកឯលោកិយ » ( នីហ្វៃទី៣ ១:១៣ ) ។
ពេលព្រះអាទិត្យលិចចុះវាមិនបានងងឹតទេ ។ ទីសម្គាល់បានមកដល់ហើយ ! ( សូមមើល នីហ្វៃទី៣ ១:១៥ ) ។ នៅព្រឹកស្អែកឡើងមនុស្សគ្រប់គ្នាបានដឹងថាវាជាថ្ងៃដែលព្រះអង្គសង្គ្រោះត្រូវប្រសូត្រមក ហើយផ្កាយថ្មីមួយបានរះឡើង ( សូមមើល នីហ្វៃទី៣ ១:១៩, ២១ ) ។ អ្វីៗទាំងអស់ ដែលព្រះអម្ចាស់បានសន្យាតាមរយៈសាំយូអែលអំពីកំណើតរបស់ព្រះអង្គសង្រ្គោះត្រូវបានបំពេញដូចដែលព្រះអម្ចាស់បានមានបន្ទូល ។
ការយាងមករបស់ព្រះអង្គសង្រ្គោះក្នុងលោកិយ ភ្លាមៗនោះបានសង្រ្គោះអ្នកជឿទាំងនោះពីសេចក្ដីស្លាប់ ។ ប៉ុន្តែវាមិនបានសង្គ្រោះត្រឹមតែពួកគេប៉ុណ្ណោះទេ ។ ព្រះយេស៊ូវគ្រីស្ទបានយាងមកជួយសង្គ្រោះ យើងទាំងអស់គ្នា ពីអំពើបាប និងសេចក្ដីស្លាប់ ផ្ដល់កម្លាំងដល់យើងក្នុងពេលដែលត្រូវការ ហើយនាំឲ្យយើងមានសេចក្ដីសង្ឃឹមនិងអំណរតាមរយៈដង្វាយធួនរបស់ទ្រង់ ។ នេះជាសារដ៏ចម្បងរបស់ព្យាការីគ្រប់រូប « ដែល [ បាន ] ព្យាករចាប់តាំងពីកំណើតលោកិយមកម្ល៉េះ » ( ម៉ូសាយ ១៣:៣៣ ) ។ ព្យាការីណែនាំយើងឲ្យទៅកាន់ព្រះអង្គសង្រ្គោះដែលទ្រង់គឺជា « ផ្លូវ សេចក្ដីពិត និងជីវិត » ( យ៉ូហាន ១៤:៦ ) ។
ព្យាការីប្រកាសសេចក្ដីពិត
លើកដំបូងដែលខ្ញុំបានអានព្រះគម្ពីរមរមននៅវិទ្យាល័យ ការបង្រៀនមកពីសាំយូអែលសាសន៍លេមិនបានធ្វើឲ្យខ្ញុំចាប់អារម្មណ៍ ។ លោកបានប្រាប់ពួកសាសន៍នីហ្វៃថា ប្រសិនបើពួកគេបន្តពន្យារពេលនៃការប្រែចិត្តរបស់ពួកគេនោះនៅពេលមកដល់ វានឹង « ហួសពេលជាអស់កល្បជានិច្ច » ។ លោកបានមានប្រសាសន៍ថា « អ្នករាល់គ្នាបានស្វែងរកនៅក្នុងថ្ងៃទាំងអស់នៃជីវិតរបស់អ្នក នូវអ្វីៗដែលអ្នករាល់គ្នាពុំអាចយកបាន … អ្នករាល់គ្នាបានស្វែងរកសុភមង្គល ដោយធ្វើអំពើទុច្ចរិត » ដែលផ្ទុយពីនិស្ស័យនៃព្រះវរបិតាសួគ៌របស់យើង ( ហេលេមិន ១៣:៣៨ ) ។
នៅក្នុងសម័យរបស់យើង ប្រធាន ណិលសុន បានបង្រៀនស្រដៀងគ្នានេះថា ៖
« ខណៈដែលពិភពលោកនេះទទូចចង់បាន អំណាច ទ្រព្យសម្បត្តិ ប្រជាប្រិយភាព និងតម្រេកខាងសាច់ឈាមនាំឲ្យមានសុភមង្គល នោះវាពុំមែនជាការពិតទេ ! វាពុំអាចទេ !
សេចក្តីពិតគឺថាវា កាន់តែនឿយហត់ខ្លាំង ឡើងដើម្បីស្វែងរកសុភមង្គលនៅកន្លែងដែលបងប្អូន មិន អាចរកវាឃើញ ! … ព្រះយេស៊ូវគ្រីស្ទ … ហើយមានតែទ្រង់ប៉ុណ្ណោះ [ មាន ] ព្រះចេស្តា លើកបងប្អូនឡើងចេញពីឥទ្ធិពលនៃពិភពលោកនេះ » ។
ពួកសាសន៍នីហ្វៃមួយចំនួនបានជ្រើសរើសស្ដាប់ ហើយជឿពាក្យរបស់សាំយូអែល មនុស្សជាច្រើនផ្សេងទៀតមិនបានជឿពាក្យរបស់សាំយូអែលទេ ( សូមមើល ហេលេមិន ១៦:១–៨ ) ។ តាមវិធីជាច្រើនសព្វថ្ងៃនេះវាមិនខុសគ្នាពីសម័យនោះប៉ុន្មានទេ ។
តើ អ្នក នឹងជ្រើសរើសអ្វី ? តើប្អូននឹងស្តាប់តាមព្យាការីដែរឬទេ ?
ប្រធាន ណិលសុនបានបង្រៀន ៖
« [ ព្យាការី អ្នកមើលឆុត និង អ្នកទទួលវិវរណៈ ] អាចមិននិយាយប្រាប់មនុស្សទាំងឡាយនូវអ្វីដែលពួកគេចង់ស្ដាប់ជានិច្ចនោះទេ ។ ព្យាការីកម្រនឹងល្បីល្បាញណាស់ ។ ប៉ុន្ដែយើងនឹងបង្រៀនសេចក្ដីពិត ជានិច្ច ! »
ពេលប្អូនស្តាប់ព្យាការី ហើយធ្វើសកម្មភាពតាមពាក្យសម្តីរបស់លោក នោះប្អូននឹងរកឃើញថាការណែនាំរបស់ព្យាការីនឹងការពារ ប្រទានពរ និងជួយប្អូនពេញមួយជីវិតរបស់ប្អូន ។