Għeruq u Friegħi
Mill-Presbiteru Quentin L. Cook
Tal-Kworum tat-Tnax-il Appostlu
Fi żmienna huwa ferm essenzjali li nħaffu l-ħidma tal-istorja tal-familja u tat-tempju għas-salvazzjoni u l-eżaltazzjoni tal-familji.
Qabel il-mewt tiegħu mill-marda tal-kanċer fl-1981, il-kittieb kontroversjali William Saroyan qal lill-membri tal-istampa, “Kulħadd irid imut, iżda jien dejjem emmint li fil-kas tiegħi kienet se ssir eċċezzjoni. Allura issa?”1
L-“allura issa” meta f’ din il-ħajja tkun qed tħabbat wiċċek mal-mewt u l-“allura issa” fil-kontemplazzjoni tal-ħajja wara l-mewt huma fil-qalba tal-mistoqsijiet tar-ruħ li l-evanġelju rrestawrat ta’ Ġesù Kristu jwieġeb b’ mod mill-isbaħ fil-pjan ta’ ferħ tal-missier.
F’ din il-ħajja aħna nidħqu, nibku, naħdmu, nilagħbu, ngħixu u mbagħad immutu. Ġob jistaqsi l-mistoqsija konċiża, “Jista’ bniedem imut u jerġa’ għall-ħajja?”2 It-tweġiba hija Iva ċara u tonda, minħabba s-sagrifiċċju tat-tpattija tas-Salvatur. Parti mill-ispjegazzjoni introduttorja li ta Ġob għal din il-mistoqsija hi mill-aktar interessanti: “Il-bniedem imwieled minn mara għandu ħajja qasira. … Bħal warda jiftaħ u mbagħad jidbiel. … Siġra għallinqas għandha tama li jekk tinqata’ terġa’ ttella’ u ma jiġux nieqsa ż-żraġen tagħha … u tagħmel il-friegħi bħal xitla ġdida.”3
Il-pjan ta’ Missierna huwa kollu dwar il-familja. Ħafna mill-aktar skrittura emozzjonali li aħna għandna tuża l-kunċett tas-siġra bl-għeruq u l-friegħi tagħha bħala analoġija.
Fil-kapitlu li jagħlaq it-Testment il-Qadim, Malakija, meta kien qed jiddeskrivi t-Tieni Miġja tas-Salvatur, juża din l-analoġija b’ mod mill-aktar qawwi. Meta beda jsemmi n-nies ħżiena u mkabbra, huwa nnota li huma sa jinħarqu bħat-tiben u “ma jħallilhom la għerq u lanqas fergħa.”4 Malakija jagħlaq dan il-kapitlu bil-wegħda assiguranti tal-Mulej :
Ara, jien nibgħatilkom ‘l Elija l-profeta qabel ma jasal jum il-Mulej u jum il-biża’:
“U jdawwar qalb il-missirijiet lejn uliedhom u qalb l-ulied lejn missirijiethom, li ma niġix naħbat għall-art u nħalliha tinqered.”5
Fi sbieħ ir-Restawrazzjoni, Moroni reġa’ enfasizza dan il-messaġġ fl-ewwel struzzjoni li huwa ta liż-żagħżugħ Joseph Smith fl-1823.6
Nies Insara u Lhud minn madwar id-dinja aċċettaw ir-rakkont ta’ Elija kif jinsab fit-Testment il-Qadim.7 Huwa kien l-aħħar profeta li ħaddan il-qawwa tas-siġill tas-Saċerdozju Melkisedeku qabel iż-żmien li fih ġie Ġesù Kristu.8
Elija Jirrestawra l-Imfietaħ
Ir-ritorn ta’ Elija seħħ fit-Tempju ta’ Kirtland fit-3 ta’ April, 1836. Huwa ddikjara li kien qed iwettaq il-wegħda ta’ Malakija. Huwa ta l-imfietaħ tas-saċerdozju għas-siġill tal-familji f’ din id-dispensazzjoni.9 Il-missjoni ta’ Elija hija assistita b’ dak li xi kultant insejħulu l-ispirtu ta’ Elija, li, kif għallem il-Presbiteru Russell M. Nelson, huwa “manifestazzjoni tal-Ispirtu s-Santu li jagħti xhieda tan-natura divina tal-familja.”10
Is-Salvatur kien ċar ferm dwar il-bżonn tal-magħmudija. Huwa għallem, “Jekk wieħed ma jitwelidx mill-ilma u l-Ispirtu, ma jistax jidħol fis-saltna ta’ Alla.”11 Is-Salvatur stess tgħammed sabiex jagħtina eżempju. Xi ngħidu dwar dawk li mietu u qatt ma tgħammdu?
Id-Duttrina tal-Ħidma tat-Tempju u l-Istorja tal-Familja
Fil-11 ta’ Ottubru, 1840, ġewwa Nauvoo, Vilate Kimball kitbet ittra lir-raġel tagħha, il-Presbiteru Heber C. Kimball, li flimkien ma’ membri oħra tat-Tnax kien qed iservi missjoni fir-Renju Unit. Il-konferenza ġenerali ta’ Ottubru kienet għadha kif ittellgħet ftit jiem qabel.
Sa nikkwota parti mill-ittra personali ta’ Vilate: “Kellna l-aktar konferenza kbira u interessanti li qatt kellna minn meta ġiet organizzata l-Knisja. … Il-President [Joseph] Smith introduċa suġġett ġdid u glorjuż. … li huwa, li nitgħammdu għall-mejtin. Pawlu jitkellem dwar dan, f’ kapitlu 15, vers 29 fl-Ewwel Korintin. Permezz ta’ rivelazzjoni Joseph irċieva spjegazzjoni aktar ċara dwar dan. Huwa jgħid li huwa l-privileġġ tal-membri ta’ din il-Knisja li jitgħammdu f’ isem l-antenati kollha tagħhom li mietu qabel ma ġie rrestawrat dan l-evanġelju. … Jekk nagħmlu hekk, aħna nkunu qed nagħmluha ta’ aġenti għalihom, u nagħtuhom il-privileġġ li jqumu fl-Ewwel Reżurezzjoni. Huwa qal li l-evanġelju jiġi ppridkat lilhom ġol-ħabs.”
Vilate kompliet: “Jiena rrid nitgħammed għal ommi. … Mhijiex din duttrina glorjuża?”12
Id-duttrina essenzjali li tgħaqqad il-familji ksibnieha linja wara linja u preċett wara preċett. Dawn l-ordinanzi f’ isem ħaddieħor huma fil-qalba tad-duttrina li torbot flimkien il-familji eterni, fejn tgħaqqad l-għeruq mal-friegħi.
Id-duttrina tal-familja f’ relazzjoni mal-istorja tal-familja u l-ħidma tat-tempju hija waħda ċara. Fl-ewwel struzzjonijiet li l-Mulel żvela dwar dan Huwa rrefera għall-”magħmudja tal-mejtin tagħkom,”13 L-obbligu duttrinali tagħna huwa lejn l-antenati tagħna. Dan peress li l-organizzazzjoni ċelestjali fis-smewwiet hija bbażata fuq il-familji.14 L-Ewwel Presidenza ħeġġet lill-membri, speċjalment liż-żgħażagħ u l-adulti żgħażagħ single biex jagħmlu enfażi fuq il-ħidma tal-istorja tal-familja u fuq l-ordinanzi għall-membri tal-familja tagħhom u l-antenati tal-membri tal-qasam jew wited tagħhom.15 Irridu ningħaqdu kemm mal-għeruq kif ukoll mal-friegħi. L-idea li nistgħu nagħmlu kuntatt mal-isfera etern hija verament waħda glorjuża.
Tempji
Wilford Woodruff indika li l-Prophet Joseph Smith għex ħajja twila biżżejjed li fiha bena l-pedament tal-ħidma tat-tempju. L-aħħar darba li hu, Joseph Smith, qatt iltaqa’ mal-Kworum tat-Tnax kien meta tahom l-għotja mqaddsa tagħhom.”16
Wara l-martirju tal-Profeta, il-Qaddisin lestew it-Tempju ta’ Nauvoo, u l-qawwa tas-siġill intużat biex tbierku eluf ta’ membri fidili qabel l-esodu tagħhom lejn Mountain West. Tletin sena wara, meta tlesta it-Tempju ta’ St. George, il-President Brigham Young innota s-sinifikat etern tal-ordinanzi tas-salvazzjoni li finalment ġew disponibbli kemm għall-ħajjin kif ukoll għall-mejtin.17
Dan hu ddikjarat b’ mod ċar mill-President Wilford Woodruff: “Probabbilment qatt ma ħassejtni daqshekk kuntent b’ xi prinċipju li qatt xi darba żvela l-Mulej daqs kemm ħassejtn fil-fidwa tal-mejtin tagħna; li aħna jkollna lil missirijietna, lil ommijietna, lin-nisa tagħna u l-uliedna magħna fl-organizzazzjoni tal-familja, fl-għodwa tal-ewwel reżurezzjoni u fis-Saltna Ċelestjali. Dawn huma prinċipji grandjużi. Minħabba fihom kull sagrifiċċju hu vallapena.”18
Kemm qed ngħixu fi żmien sabiħ. Din hija l-aħħar dispensazzjoni, u nistgħu nħossu li teżisti ċerta urġenza fil-ħidma tas-salvazzjoni f’ kull ħaġa li fiha hemm l-ordinanza tas-salvazzjoni.19 Illum għandna tempji madwar id-dinja li jipprovdu dawn l-ordinanzi tas-salvazzjoni. Li nattendu t-tempju biex niġġeddu spiritwalment u biex insibu l-paċi, is-sigurtà u d-direzzjoni f’ ħajjitna hija wkoll barka kbira.20
Anqas minn sena minn meta l-President Thomas S. Monson ġie msejjaħ bħala Appostlu, huwa ddedika l-Librerija Ġeneoloġika tat-Tempju ta’ Los Angeles. Huwa tkellem dwar antenati mejta “li jinsabu jistennew il-jum meta intom u jiena nagħmlu r-riċerka tagħna li hi neċessarja biex dan kollu jsir possibbli għalihom, … kif ukoll mmorru fid-dar ta’ Alla u nwettqu dik il-ħidma … li huma … ma jistgħux iwettqu.”21
Meta dak li kien il-Presbiteru Monson wassal dawk ir-rimarki dedikatorji fl-20 ta’ Ġunju, 1964, kull ma kien hawn jiffunzjonaw kienu biss 12-il tempju. Matul il-perjodu li fih il-President Monson serva fil-kunsilli ogħla tal-Knisja, saret id-dedikazzjoni inizjali għal 130 tempju mill-142 li jinsabu jiffunzjonaw bħalissa. Mhi xejn ħlief ħaġa mill-aktar mirakoluża li fiż-żmienna tara b’liema rata qed titħaffef il-ħidma tas-salvazzjoni. Tmienja u għoxrin tempju ieħor ġew imħabbra u jinsabu f’ xi stadju jew ieħor li jitlestew. Ħamsa u tmenin fil-mija tal-membri tal-Knisja illum joqogħdu f’ medda ta’ 200 mil (320 km) minn xi wieħed minn dawn it-tempji.
It-Teknoloġija tal-Istorja tal-Familja
It-teknoloġija tal-istorja tal-familja avvanzat ukoll b’ mod drammatiku. F’ Marzu tal-1994, il-President Howard W. Hunter iddikjara: “Bdejna nużaw it-teknoloġija informatika sabiex inħaffu l-ħidma sagra li nipprovdu l-ordinanzi għall-mejtin tagħna. L-irwol tat-teknoloġija … ġie mħaffef b’ rata mgħaġġla mill-Mulej innifsu. … Madankollu, għadna biss fil-bidu ta’ dak li aħna nistgħu nagħmlu b’ din l-għodda.”22
F’ dawn id 19-il sena minn dik id-dikjarazzjoni profetika, ir-rata mgħaġġla li bih avvanzat it-teknoloġija kważi bilkemm titwemmen. Waħda omm ta’ tfal żgħar li għandha 36 sena m’ilux qaltli, “Aħseb ftit—minn listi sħaħ ta’ ismijiet fuq il-microfilm ġewwa ċentri dedikati għall-istorja tal-familja, avvanzajna tant li llum nista’ noqgħod bilqiegħda bil-kompjuter mal-mejda tal-kċina tiegħi nagħmel l-istorja tal-familja wara li wliedi jkunu marru jorqdu.” Ħuti, illum iċ-ċentri tal-istorja tal-familja jinsabu f’ darna.
Il-ħidma tat-tempju u l-istorja tal-familja mhijiex biss għalina. Aħsbu f’ dawk fuq in-naħa l-oħra tal-velu li jinsabu jistennew għall-ordinanzi tas-salvazzjoni li jeħilsuhom mill-jasar tal-ħabs tal-ispirti. It-tifsira ta’ ħabs hija “stat ta’ priġunerija jew jasar.”23 Dawk li jinsabu fil-jasar jafu jistaqsu l-mistoqsija li għamel William Saroyan: “Allura issa?”
Waħda oħt fidila qasmet l-esperjenza spiritwali speċjali li hija kellha fit-Tempju ta’ Salt Lake. Waqt li kienet fil-kamra tal-konferma, wara li kienet għadha kif intemmet ordinanza ta’ konferma f’ isem ħaddieħor, hija semgħet vuċi tgħid, “U l-ħabsi jista’ jiġi meħlus!” Hija ħasset sens kbir ta’ urġenza għal dawk li kienu jinsabu jistennew għall-ħidma tal-magħmudija u l-konferma tagħhom. Wara li marret lura d-dar, hija fittxet fl-iskrittura l-frażi li kienet semgħet. Hija sabet id-dikjarazzjoni ta’ Joseph Smith f’ sezzjoni 128 tad-Duttrina u Patti: “Ħallu lil qalbkom tifraħ, u kunu verament kuntenti. Ħallu lid-dinja tinfexx fil-kant. Ħallu lill-mejtin ilissnu innijiet ta’ tifħir etern lis-Sultan Immanuel, li ordna, minn qabel ma nħolqot id-dinja, dak li jagħmilha possibli għalina li nifduhom mill-ħabs tagħhom; għax il-ħabsin jistgħu jiġu meħlusa..”24
Il-mistoqsija hi, x’ irridu nagħmlu? Il-kunsill tal-Profeta Joseph kien li fit-tempju nippreżentaw “ir-reġistri tal-mejtin tagħna, li jilqgħuha għal kollox.”25
Il-tmexxija tal-Knisja ħarġet sejħa ċara lil dawk tal-ġenerazzjoni li għadha tiela’ sabiex huma jkunu fuq quddiem biex imexxu l-użu tat-teknoloġija ħalli jesperjenzaw l-ispirtu ta’ Elija, li jfittxu lill-antenati tagħhom u li jwettqu l-ordinanzi tat-tempji għalihom.26 Ħafna mill-aktar xogħol diffiċli fil-ħidma tas-salvazzjoni, kemm għall-ħajjin kif ukoll għall mejtin, sa jsir minnkom iż-żgħażagħ.27
Jekk iż-żgħażagħ f’ kull qasam mhux biss imorru t-tempju u jagħmlu l-magħmudijiet għall-mejtin tagħhom iżda jaħdmu wkoll mal-familji tagħhom u ma’ membri oħra tal-qasam sabiex jipprovdu l-ismijiet tal-familja għall-ħidma tal-ordinanzi li huma jwettqu, kemm huma kif ukoll il-Knisja jiġu mberkin bil-kbir. Qatt tinjora l-influwenza tal-mejtin fl-assistenza tagħhom fl-isforzi tagħkom u l-ferħ li intom ultimament tħossu kif tiltaqgħu magħhom. Il-barka eternament sinifikanti li ngħaqqdu lill-familji tagħna hija ferm aktar milli nistgħu qatt nimmaġinaw.28
Fis-sħubija dinjija tal-Knisja, wieħed u ħamsin fil-mija tal-adulti bħalissa m’ għandhomx iż-żewġ ġenituri tagħhom it-tnejn li huma fis-sezzjoni tas-Siġra tal-Familja tas-sit tal-Knisja fuq l-internet FamilySearch. Ħamsa u sittin fil-mija tal-adulti m’għandhomx l-erba’ nanniet imniżżlin.29 Ftakru, aħna mingħajr l-għeruq u l-friegħi tagħna ma nistgħux niġu salvati. Il-membri tal-Knisja għandhom bżonn jiksbu u jirreġistraw din l-informazzjoni tant importanti.
Finalment aħna għandna d-duttrina, it-tempji u t-teknoloġija sabiex il-familji jwettqu din il-ħidma glorjuża ta’ salvazzjoni. Sa nissuġġerixxi mod kif dan jista’ jseħħ. Il-familji jistgħu itellgħu “Laqgħa tas-Siġra tal-Familja.” Din m’għandhiex tkun attività ta’ darba biss. Kulħadd għandu jġib miegħu stejjer eżistenti tal-familja, rakkonti u ritratti, fosthom affarijiet li kienu għall-qalb il-nanniet u l-ġenituri. Iż-żgħażagħ tagħna għandhom fihom entużjażmu biex jitgħallmu dwar il-ħajja tal-membri tal-familja tagħhom—minn fejn ġew u kif għexu. Fosthom kienu ħafna li qalbhom diġà daret lejn missirijiethom. Huma jħobbu l-istejjer u r-ritratti, u huma kapaċi teknoloġikament li jiskenjaw u japplowdjaw dawn l-istejjer u r-ritratti fis-Siġra tal-Familja u jikkonettjaw id-dokumenti tas-sors mal-antenati sabiex jippreservawhom għal dejjem. Bla dubju, l-oġġettiv ewlieni hu li niddeterminaw liema ordinanzi għad irid jitwettqu u jagħmlu dak li hu meħtieġ biex titwettaq din il-ħidma essenzjali tat-tempju. Tistgħu tużaw il-ktejjeb Il-Familja biex jgħinkom tirreġistraw l-informazzjoni, l-istejjer u r-ritratti tal-familja li wara tistgħu tapplowdjawhom fis-Siġra tal-Familja.
L-impenn u l-istennija tal-familja għandhom ikunu l-ogħla prijorità tagħna biex nipproteġu d-destin divin tagħna. Għal dawk li qed ifittxu li jqattgħu jum is-Sabbath tagħhom bħala familja b’ mod aktar produttiv, l-urġenza ta’ din il-ħidma tinsab quddiemkom. Waħda omm b’ ferħ tirrakonta kif binha ta’ 17-il sena jintafa’ fuq il-kompjuter kull nhar ta’ Ħadd wara l-Knisja sabiex jagħmel il-ħidma tal-istorja tal-familja u kemm binha ta’ 10 snin iħobb jisma’ l-istejjer u jara r-ritratti tal-antenati tiegħu. Dan wassal biex il-famila kollha titbierek billi tesperjenza l-ispirtu ta’ Elija. L-għeruq u l-friegħi prezzjużi tagħna għandna nieħdu ħsiebhom.
Ġesù Kristu ta ħajtu bħala att tal-fidwa f’ isimna lkoll. Huwa rriżolva l-mistoqsija li għamel Ġob. Huwa rebaħ il-mewt għall-umanità kollha, ħaġa li ma nistgħux nagħmlu għalina nfusna. Aħna nistgħu, madankollu, inwettqu ordinanzi f’ isem ħaddieħor u b’ hekk insiru salvaturi fuq l-Għolja Sijon30 għall-familji tagħna sabiex aħna, magħhom, nistgħu niksbu l-eżaltazzjoni kif ukoll is-salvazzjoni.
Jiena nagħti x-xhieda tiegħi tas-sagrifiċju tat-tpattija tas-Salvatur u taċ-ċertezza tal-pjan tal-Missier għalina u għall-familji tagħna. F’ isem Ġesù Kistu, amen.