Irwiefen Spiritwali
Mill-Presbiteru Neil L. Andersen
Tal-Kworum tat-Tnax-il Appostlu
Tħallux l-irwiefen ikaxkrukom magħhom. Dan huwa żmienkom—li tibqgħu b’ saħħitkom bħala dixxipli tal-Mulej Ġesù Kristu.
Nilqagħkom dalgħodu—speċjalment lilkom iż-żgħażagħ li tinsabu kemm hawn fiċ-Ċentru tal-Konferenza kif ukoll imferrxin madwar id-dinja. Intom parti minn ġenerazzjoni magħżula b’ destin partikolari, u sa nindirizza speċjalment lilkom.
Bosta snin ilu meta konna qed inżuru l-familja tagħna ġo Florida, uragan laqgħat l-inħawi ftit ‘il bogħod minn fejn konna. Waħda mara li kienet qed tgħix ġewwa karavan marret tfittex refuġju fil-kamra tal-banju tagħha. Il-karavan bdiet tiċċaqlaq min-naħa għall-oħra. Għadda ftit ħin. Imbagħad hi semgħet leħen il-ġara tagħha: “Jiena hawn fl-ewwel kamra.” Hekk kif ħarġet mill-kamra tal-banju, b’ għaġeb kbir, sabet li l-uragan kien għolla u ġarr il-karavan tagħha fl-arja, u niżżilha perfettament fuq is-saqaf tal-karavan tal-ġara tagħha.
Għeżież ħbieb tiegħi żgħażagħ, id-dinja mhux se tkun xi post trankwill aktar ma aħna nibdew resqin viċin it-Tieni Miġja tas-Salvatur. L-iskrittura tiddikjara li “kollox se jseħħ fl-istess ħin.”1 Brigham Young qal, “Ġie żvelat lili fl-ewwel żminijiet ta’ din il-Knisja, li l-Knisja sa tinfirex, tistagħna, tikber u testendi, u bl-istess rata li sa jinfirex l-Evanġelju fost il-ġnus tad-dinja, sa tinfirex il-qawwa ta’ Satana.”2
Aktar inkwetanti mit-terremoti u l-gwerer li huma mbassra li se jseħħu3 hemm l-uragani u l-irwiefen spiritwali li jistgħu jqaċċtukom mis-sisien spiritwali tagħkom u jġorru l-ispirtu tagħkom f’ postijiet fejn qatt ma mmaġinajtu, xi kultant mingħajr lanqas tindunaw li nġarrejtu minn fejn kontu.
L-agħar irwiefen huma t-tentazzjoni tal-avversarju. Id-dnub minn dejjem kien parti mid-dinja, iżda qatt ma kien daqshekk aċċessibbli, infiltranti u aċċettabbli. Hemm, bla dubju, forza qawwija li ddgħajjef l-irwiefen tad-dnub. Din tissejjaħ l-indiema.
Mhux l-irwiefen kollha fil-ħajja huma riżultat tal-għażliet tagħkom. Xi wħud jiġu fuqkom minħabba l-għażliet ħżiena ta’ ħaddieħor, u oħrajn jiġu fuqkom sempliċiment għax din hija l-mortalità.
Meta kien għadu tifel ċkejken, il-President Boyd K. Packer sofra mill-marda kiefra tal-poljo. Meta l-Presbiteru Dallin H. Oaks kellu seba’ snin, missieru miet bla mistenni. Meta Sister Carol F. McConkie tal-presidenza ġenerali tat-Tfajliet kienet għadha żagħżugħa, il-ġenituri tagħha ddivorzjaw. Żgur li se tħabbtu wiċċkom ma’ għadd ta’ sfidi, iżda hekk kif tafdaw f’ Alla, dawn isaħħulkom il-fidi tagħkom.
Fin-natura, is-siġar li jikbru f’ ambjent kollu riħ isiru aktar b’ saħħithom. Meta r-riħ jonfoħ qawwi madwar xi siġra żgħira, il-forzi ġewwa s-siġra jagħmlu żewġ affarijiet. L-ewwel, huma jistimulaw l-għeruq sabiex jikbru aktar malajr u jinfirxu aktar ‘il bogħod. It-tieni, il-forzi fis-siġra jibdew joħolqu ċerti strutturi taċ-ċelloli li fil-fatt iwasslu sabiex iz-zokk u l-friegħi jikbru aktar ħoxnin u aktar flessibbli għall-pressjoni tar-riħ. Dawn l-għeruq u l-friegħi aktar b’ saħħithom jipproteġu s-siġra mill-irwiefen li bla dubju jerġgħu jirritornaw.4
Għal Alla intom bla dubju aktar prezzjużi minn siġra. Intom uliedu. Huwa għamel l-ispirtu tagħkom b’ saħħtu u kapaċi jirreżisti l-irwiefen tal-ħajja. L-irwiefen f’ żgħożitkom, bħar-riħ jikkumbatti siġra żgħira, jistgħu jkabbru l-qawwa spiritwali tagħkom, iħejjukom għas-snin li ġejjin.
Kif tistgħu titħejjew għall-irwiefen tagħkom? Ftakru li intom għandkom tibnu l-pedament tagħkom fuq il-blata tal-Feddej tagħna, li hu Kristu, l-Iben t’ Alla; ħalli meta x-xitan jibgħat l-irwiefen qawwija tiegħu, … meta jixħtilkom il-lanez tiegħu, … meta l-forza tas-silġ u tat-tempesta tiegħu tinżel fuqkom, ma jkollhom l-ebda qawwa … biex ikaxkrukom magħhom … minħabba l-blata li intom tinsabu mibnijin fuqha.”5 Din hija s-sigurtà tagħkom waqt xi riefnu.
Il-President Thomas S. Monson qal, “Fejn kien hemm żmien meta l-istandards tal-Knisja u l-istandards tas-soċjetà kienu ħafna drabi kompatibbli, illum teżisti diviżjoni sħiħa bejniethom, u aktar ma tmur aktar qed tikber.”6 Din id-diviżjoni, għal xi wħud, toħloq inkwiet spiritwali mill-aktar b’ saħħtu. Ippermettuli naqsam magħkom dan l-eżempju.
Ix-xahar li għadda, l-Ewwel Presidenza u l-Kworum tat-Tnax ippubblikaw ittra lill-mexxejja tal-Knisja madwar id-dinja. Parti minnha tgħid: “Tibdil mil-liġi ċivili ma jibdilx, anzi ma jista’ qatt jibdel, il-liġi morali li waqqaf Alla. Alla jistenna minna li aħna nagħrfu u nżommu l-kmandamenti Tiegħu, huma x’ inhuma l-opinjonijiet u l-modi differenti fis-soċjetà. Il-liġi tiegħu tal-kastità hija ċara: ir-relazzjonijiet sesswali huma permessi biss bejn raġel u mara li huma legalment miżżewġin. Inħeġġukom sabiex terġħu tagħtu ħarsa lejn … id-duttrina li hemm f’ “Il-Familja: “Proklamazzjoni lid-Dinja’.”7
Filwaqt li d-dinja titbiegħed mil-liġi tal-kastità tal-Mulej, aħna ma nagħmlux l-istess. Il-President Monson qal: “Is-Salvatur tal-umanità ddeskriva lilu nnifsu bħala li Hu fid-dinja iżda mhux tad-dinja. Aħna wkoll nistgħu nkunu fid-dinja iżda mhux tad-dinja hekk kif niċħdu l-kunċetti foloz u t-tagħlim falz u nibqgħu leali lejn dak li kkmandana Alla.”8
Filwaqt li ħafna gvernijiet u individwi onesti bidlu t-tifsira ta’ x’inhu żwieġ, il-Mulej m’ għamilx hekk. Fil-bidu taż-żmien, Alla organizza ż-żwieġ bejn raġel u mara—Adam u Eva. Huwa fassal l-għan taż-żwieġ sabiex ikun ferm aktar minn sodisfazzjon personali u tax-xewqat tal-adulti, u jsir, fuq kollox, dejjem aħjar bħala l-ambjent ideali li fih jitwieldu, jitrabbew u jitrawmu t-tfal. Il-familji huma t-teżor tas-sema.9
Għalfejn inkomplu nitkellmu dwar dan? Kif qal Pawlu, “Ma nħarsux lejn il-ħwejjeġ li jidhru, iżda lejn dawk li ma jidhrux.”10 Bħala Appostli tal-Mulej Ġesù Kristu, ir-responsabbiltà tagħna hi li ngħallmu l-pjan tal-Ħallieq għal uliedu u li nwissu dwar il-konsegwenzi li jista’ jkun hemm jekk inwarrbu l-kmandamenti Tiegħu.
Riċentiment, jiena tkellimt ma’ waħda Laurel mill-Istati Uniti. Sa nikkwota mill-email tagħha:
“Tul din is-sena, xi wħud minn sħabi fuq Facebook bdew jippostjaw il-pożizzjoni tagħhom fuq iż-żwieġ. Ħafna minnhom huma favur iż-żwieġ bejn koppja tal-istess sess, u kien hemm bosta żgħażagħ Qaddisin tal-Aħħar Jiem li għamlulhom ‘like’. Jiena ma għamilt l-ebda kumment.
“Iddeċidejt li niddikjara t-twemmin tiegħi fiż-żwieġ tradizzjonali b’ mod li naħseb li jista’ jkun effettiv.
“Mar-ritratt profil tiegħi, jiena żidt il-kliem ‘Jiena nemmen fiż-żwieġ bejn raġel u mara.’ Kważi dak il-ħin stess bdejt nirċievi l-messaġġi. ‘Inti egoista.’ ‘Inti tiġġudika lil ħaddieħor.’ Xi ħadd qabbilni ma’ sid l-iskjavi. U mbagħad irċevejt dan il-messaġġ mingħand ħabiba tal-qalb li hija membru attiva fil-Knisja: ‘Trid taġġorna ruħek maż-żminijiet. L-affarijiet qed jinbidlu u anke inti trid tagħmel l-istess.’
‘Jiena ma qgħadtx nargumenta,” qaltli hi, “iżda d-dikjarazzjoni tiegħi ma neħħejthiex.”
Hija spiċċat tgħidli: “Xi kultant, kif qal il-President Monson, ‘Għandek bżonn tieqaf waħdek.’ Nittama li bħala żgħażagħ, aħna nieqfu flimkien sabiex inkunu leali lejn Alla u lejn it-tagħlim tal-profeti ħajjin Tiegħu.”11
Għandna speċjalment nieħdu ħsieb lil dawk li qed jikkumbattu fihom l-attrazzjoni lejn dawk tal-istess sess tagħhom. Huwa riefnu mill-aktar qawwi. Nixtieq nesprimi l-imħabba u l-ammirazzjoni tiegħi lejn dawk li b’ kuraġġ jinsabu jħabbtu wiċċhom ma’ din il-prova ta’ fidi u li jibqgħu leali lejn il-kmandamenti ta’ Alla!12 Iżda kull persuna, huma x’inhuma d-deċiżjonijet u t-twemmin tagħha, jixirqilha l-ħniena u r-rispett tagħna. 13
Is-Salvatur għallimna sabiex ma nħobbux biss lill-ħbieb tagħna iżda wkoll lil dawk li ma jaqblux magħna—u anke dawk li jiċħdu t-twemmin tagħna. Huwa qal: “Għax jekk intom tħobbu lil min iħobbkom, xi ħlas jistħoqqilkom? … U jekk issellmu ‘l ħutkom biss, xi tkunu għamiltu żejjed?”14
Il-Profeta Joseph Smith wissiena sabiex “noqogħdu attenti milli naħsbu li aħna aħjar minn ħaddieħor” u nuru qalb akbar ma’ kull persuna sal-punt “li nkunu rridu nġorruha fuq spallejna.”15 Fl-evanġelju ta’ Ġesù Kristu, m’hemmx post għar-redikolaġni, għall-bulijing jew il-preġudizzju.
Jekk għandkom xi mistoqsjia dwar xi kunsill mogħti mill-mexxejja tal-Knisja, jekk jogħġobkom iddiskutu dan mal-ġenituri u l-mexxejja tagħkom. Intom għandkom bżonn l-għajnuna li tasal għandkom meta tafdaw fil-profeti tal-Mulej. Il-President Harold B. Lee qal: “L-unika sigurtà li aħna għandna bħala membri ta’ din il-knisja hi ... li nagħtu kas tal-kliem u l-kmandamenti li l-Mulej sa jwasslilna permezz tal-profeta Tiegħu. … Sa nisimgħu ċerti ħwejjeġ li jeħtieġu minna l-paċenzja u l-fidi. Jista’ jkun li ma jogħġobkomx dak li jintqal. … Dan jista’ jikkuntradixxi l-ideat politiċi tagħkom … l-ideat soċjali tagħkom … u jkun ta’ interferenza mal- … ħajja soċjali tagħkom. Iżda jekk tisimgħu minn dak li jintqal, daqslikieku qed jgħidu l-Mulej innifsu, … “il-bibien tal-infern ma jegħlbukomx … u l-Mulej Alla jkeċċi l-qawwiet tad-dlam minn quddiemkom …’ (D&C 21:6).”16
Protezzjoni qawwija oħra mill-irwiefen tal-ħajja huwa l-Ktieb ta’ Mormon.
Meta l-president Henry B. Eyring kien għadu żagħżugħ, il-familji tiegħu marret toqgħod f’ belt ġdida. Għall-ewwel xejn ma għoġbitu din il-bidla u ftit li xejn seta’ jagħmel ħbieb. Huwa ħassu ħuta barra mill-ilma qalb l-istudenti li kien hemm fl-iskola sekondarja. L-irwiefen bdew jonfħu. Huwa x’ għamel? Tefa’ l-enerġija tiegħu kollha fuq il-Ktieb ta’ Mormon, fejn qrah diversi drabi.17 Snin wara, il-President Eyring xehed: “Jiena nħobb ferm nerġa’ naqra l-Ktieb ta’ Mormon u nixrob minnu ta’ spiss u b’ mod profond.”18 “Huwa l-aktar testimonjanza miktuba b’ saħħitha li għandna li Ġesù huwa l-Kristu.”19
Il-Mulej ipprovdielkom mod ieħor biex jgħinkom tibqgħu sodi, rigal spiritwali li huwa aktar b’ saħħtu mill-irwiefen tal-avversarju! Huwa qal, ‘Ieqfu … f’ postijiet qaddisa, u titħarrkux.”20
Meta jiena kont għadni żagħżugħ, kien hemm biss 13-il tempju fil-Knisja. Illum hawn 142. Ħamsa u tmenin fil-mija tal-membri tal-Knisja joqogħdu f’ medda ta’ 200 mil (320 km) minn xi wieħed minn dawn it-tempji. Il-Mulej ta lill-ġenerazzjoni tagħkom aċċess akbar għat-tempji mqaddsa Tiegħu milli ta lil xi ġenerazzjoni oħra fl-istorja tad-dinja.
Ġieli waqaftu ġewwa t-tempju, libsin l-abjad, tistennew li tagħmlu l-magħmudijiet? Kif ħassejtukom? Hemm sentiment ta’ qdusija tanġibbli ġewwa t-tempju. Il-paċi tas-Salvatur ixxejjen l-irwiefen tad-dinja.
Il-mod kif tħossukom fit-tempju huwa l-mod kif tridu li tħossukom f’ ħajjitkom.21
Sibu lin-nanniet u lill-antenati tagħkom li ħallew din il-ħajja qabilkom. Ħudu isimhom magħkom fit-tempju.22 Hekk kif intom titgħallmu dwar l-antenati tagħkom, intom taraw mudell tal-ħajja, taż-żwieġ, tat-tfal; mudell tas-sewwa; u xi kultant mudell li tixtiequ tevitaw.23
Aktar tard, fit-tempju titgħallmu dwar il-Ħolqien tad-dinja, dwar ċerti mudelli fil-ħajja ta’ Adam u Eva, u aktar importanti, titgħallmu dwar is-Salvatur tagħna Ġesù Kristu.
Għeżież ħuti, kemm inħobbukom, nammirawkom u nitolbu għalikom. Tħallux l-irwiefen ikaxkrukom magħhom. Dan huwa żmienkom—li tibqgħu b’ saħħitkom bħala dixxipli tal-Mulej Ġesù Kristu.24
Ibnu b’ mod aktar sod il-pedament tagħkom fuq il-blata tal-Feddej tagħkom.
Għożżu ferm aktar il-ħajja u t-tagħlim inkomparabbli Tiegħu.
Imxu b’ aktar diliġenza wara l-eżempju Tiegħu u l-kmandamenti Tiegħu.
Ħaddnu b’ mod aktar profond l-imħabba Tiegħu, il-ħniena u l-grazzja Tiegħu u r-rigali qawwija tal-Att tal-Fidwa Tiegħu.
Hekk kif tagħmlu dan, jiena nwegħidkom li intom tħarsu lejn dawn l-irwiefen kif fil-fatt huma—provi, tentazzjoni, distrazzjoni u sfidi li jgħinukom tikbru. Hekk kif sena wara sena intom tgħixu b’ mod ġust, jiena niżgurakom li l-esperjenzi tagħkom jikkonfermawlkom li Ġesù hu l-Kristu. Il-blata spiritwali taħt saqajkom issir solida u sikura. Intom tifirħu li Alla poġġiekom hawn sabiex tkunu parti mit-tħejjijiet finali għar-ritorn glorjuż ta’ Kristu.
Is-Salvatur qal, “Ma nħallikomx iltiema: Nerġa’ niġi għandkom.”25 Din hija l-wegħda tiegħu lilkom. Jiena naf li din il-wegħda hi reali. Jiena naf li Huwa jgħix, f’ isem Ġesù Kristu, amen.