Ulied Nisa ta’ Alla tal-Patt
Minn Jean A. Stevens
L-Ewwel Kunsillier fil-Presidenza Ġenerali tal-Primarja
Meta wlied Alla jiffukaw fuq it-tempju u l-patti sagri tagħhom, Alla jkun jista’ jibgħatilna l-barkiet Tiegħu b’ mod personali u b’ qawwa.
Għeżież ħuti, jiena nilqagħkom b’ imħabba kbira. F’ dan il-mument, tinsabu fejn tinsabu fid-dinja, nittama li qed tħossu l-imħabba li l-Mulej għandu għalikom personalment u l-Ispirtu jagħti xhieda lil qalbkom tal-messaġġ li għadu kif wasslilna dan il-kor mill-isbaħ permezz tal-kant tiegħu. Jiena nżid it-testimonjanza tiegħi ma’ tagħhom: Jiena naf li l-Feddej tiegħi jgħix u li Huwa jħobb lil kull wieħed u waħda minna.
Illejla aħna qed ninġabru flimkien bħala wlied nisa ta’ Alla tal-patt. L-età tagħna, u d-differenzi u l-personalità tagħna m’għandhomx jifirduna, peress li qabel kollox aħna kollha Tiegħu. Aħna għamilna patt li niftakru dejjem f’ Ibnu.
Il-qawwa ta’ dak il-patt individwali ħassejtha ġewwa qalbi tliet ġimgħat ilu waqt li kont qed nattendi servizz tal-magħmudija. Quddiemi kien hemm tmint itfal ħelwin bilqiegħda jistennew kollhom qima għax finalment kien wasal il-jum speċjali tagħhom. Iżda hekk kif ħarist fil-wiċċ jiddi tagħhom, jiena ma rajtx quddiemi sempliċiment grupp ta’ tfal. Minflok jiena rajthom kif naħseb li jarahom il-Mulej—individwalment. Jiena rajt lil Emma u Sophia u Ian u Logan u Aden u William u Sophie u Micah. Kull patt tal-magħmudija isir wieħed wieħed. Ilkoll lebsin l-abjad, kienu jinsabu hemm—lesti u disposti b’ qalbhom kollha, qalb li kienet ilha tħabbat fid-dinja tmien snin, biex jagħmlu l-ewwel patt tagħhom ma’ Alla.
Morru ftit lura fiż-żmien u ġibu quddiem għajnejkom il-jum tal-magħmudija tagħkom. Kemm jekk tiftakru ħafna dettalji kif ukoll jekk ftit li xejn, ippruvaw bħalissa ħossu fikom is-sinifikat tal-patt li intom għamiltu individwalment. Wara li ġejt imsejħa b’ isimek, inti ġejt mgħaddsa fl-ilma u ħriġt minnu bħala bint Alla—bint tal-patt, waħda li tinsab lesta li tissejjaħ bl-isem ta’ Ibnu u li twiegħed li timxi warajh u żżomm il-kmandamenti Tiegħu.
Il-patti li nagħmlu ma’ Alla jgħinuna nsiru nafu minn verament aħna. Huma jorbtuna miegħu b’ mod mill-aktar personali li permezz tagħhom inkunu nistgħu nħossu l-veru valur tagħna quddiemu u l-post tagħna fis-saltna Tiegħu. B’ mod li ma tistgħux nifhmuh għal kollox, Huwa lilna jafna u jħobbna individwalment. Aħsbu ftit dwar dan—ilkoll kemm aħna nokkupaw dan il-post f’ qalbu. Ix-xewqa tiegħu hi li aħna nagħżlu t-triq li twassalna lura għandu d-dar.
Hu kemm hu essenzjali u sinifikanti l-patt tal-magħmudija, huwa biss il-bidu—ix-xatba li ddaħħalna fit-triq lejn il-ħajja eterna. Aktar ’il quddiem fil-vjaġġ tagħna hemm patti tat-tempju x’ nagħmlu u ordinanzi tas-saċerdozju x’ nirċievu. Kif fakkarna l-Presbiteru David A. Bednar, ”Hekk kif nieqfu fl-ilmijiet tal-magħmudija, aħna nħarsu ’l quddiem lejn it-tempju.”1
Aħna nitħejjew biex nirċievu l-ħajja eterna mhux biss meta nagħmlu l-patti iżda wkoll billi nżommu b’ fedeltà dawn il-patti. Din hija t-tama tagħna, l-għan tagħna u l-ferħ tagħna.
Jiena xhud tal-qawwa tal-patti hekk kif rajt b’ għajnejja l-eżempju tal-ġenituri twajba tiegħi, li ħabbew u għexu l-evanġelju. Permezz tal-ħelwa ommi jiena kelli l-privileġġ li nara b’ mod ċar id-deċiżjonijiet ta’ kuljum li kienet tieħu bint tal-patt ta’ Alla. Anke meta kienet għadha tifla żgħira, l-għażliet tagħha kienu jirriflettu l-prioritajiet tagħha u kienu jiddentifikawha bħala dixxiplu veru ta’ Ġesù Kristu. Jiena rajt il-paċi, il-qawwa u l-protezzjoni li kisbet f’ ħajjitha hekk kif hija għamlet u żammet dawn il-patti sagri fil-vjaġġ tagħha. Ħajjitha f’ din id-dinja kienet tirrifletti l-imħabba tagħha għas-Salvatur u x-xewqa tagħha li timxi warajh. O, kemm nixtieq nimxi wara l-eżempju tagħha.
Il-ħajja tal-ġenituri tiegħi flimkien bdiet b’ mod xejn mistenni. Kien l-1936. Huma kienu qed jinnammraw b’ serjetà u kienu qed iħejju biex jiżżewġu meta missieri rċieva ittra bl-istedina li jmur iservi bħala missjunarju full-time ġewwa l-Afrika t’ Isfel. L-ittra kienet tgħid li jekk huwa kien den u lest li jservi, kellu jikkuntattja lill-isqof. Mhux diffiċli tinnutaw li l-proċess kif wieħed jiġi msejjaħ bħala missjunarju kien differenti ħafna f’ dawk iż-żminijiet! Missieri wera l-ittra lill-maħbuba tiegħu, Helen, u huma ħassewhom iddeterminati mingħajr dubju li kellu jservi.
Għal dawk il-ħmistax qabel ma telaq, Ommi u Missieri ltaqgħu kuljum biex jagħmlu piknik f’ Masġar il-Memorja ħdejn iċ-ċentru tal-Belt ta’ Salt Lake. Waqt wieħed minn dawn il-pikniks tagħhom, wara li ħassitha spirata bl-għajnuna tas-sawm u t-talb, Ommi qalet lill-għażiż tagħha Claron li jekk huwa kien għadu jrid, hija kienet lesta tiżżewġu qabel jitlaq. F’ dawk iż-żminijiet bikrin tal-Knisja, kultant l-irġiel kienu jiġu msejħa għas-servizz missjunarju u jħallu warajhom lin-nisa u l-familji tagħhom. U hekk kien fil-każ ta’ ommi u missieri. Bl-approvazzjoni tal-mexxej tas-saċerdozju, huma ddeċidew li jiżżewġu qabel ma huwa jitlaq għall-missjoni tiegħu.
Fit-Tempju ta’ Salt Lake, Ommi rċeviet l-għotja mqaddsa tagħha, u mbagħad huma żżewġu għal din il-ħajja u għall-eternità kollha mill-President David O. McKay. Huma kellhom bidu mill-aktar umli. La kien hemm ritratti, la libsa tat-tieġ sabiħa, la fjuri, u lanqas riċeviment biex jiċċelebraw l-okkażżjoni. Dak li verament kienu qed jiffukaw fuqu kien it-tempju u l-patti tagħhom. Għalihom, il-patti kienu kollox. Wara biss sitt ijiem ta’ żwieġ u bi dmugħ f’ għajnejhom, missieri telaq lejn l-Afrika t’ Isfel.
Iżda ż-żwieġ tagħhom kien ferm aktar mill-imħabba profonda li kellhom għal xulxin. Huma kellhom ukoll imħabba għall-Mulej u xewqa li jservuh. Il-patti sagri tat-tempju li huma għamlu tawhom is-saħħa u l-qawwa li jsostnuhom tul is-sentejn sseparati minn xulxin. Huma kellhom perspettiva eterna tal-għan tal-ħajja u tal-barkiet imwiegħda li jiksbu dawk li huma fidili lejn il-patti tagħhom. Dawk il-barkiet kollha jittraxxendu s-sagrifiċċju u s-separazzjoni li kellhom jesperjenzaw għal perjodu qasir.
Għalkemm ċertament ma kienx mod faċli kif tibda l-ħajja miżżewġa, deher li kien mod ideali kif tista’ tibni l-pedament għal familja eterna. Hekk kif bdew ikollhom it-tfal, konna nafu x’ kienu l-aktar ħwejjeġ importanti għall-ġenituri tiegħi. Kienet l-imħabba tagħhom għall-Mulej u l-impenn sod tagħhom li jżommu l-patti li huma għamlu. Għalkemm il-ġenituri tiegħi t-tnejn għaddew għal ħajja oħra, l-eżempju tajjeb tas-sewwa għadu barka kbira għall-familja tagħna.
L-eżempju ta’ ħajjithom jirrifletti fi kliem Linda K. Burton: ”L-aqwa mod kif issaħħaħ il-familja, kurrenti u futura, huwa billi żżomm il-patti.”2
Iż-żmien ta’ tbatija u prova għalihom kien għadu m’ għaddiex. Tliet snin wara li Missieri wasal lura mill-missjoni tiegħu, faqqgħet it-Tieni Gwerra Dinjija, u bħal ħafna oħrajn huwa ġie ingaġġat fil-militar. Huwa għamel erba’ snin oħra ’l bogħod mid-dar hekk kif serva fis-servizzi navali fuq numru ta’ bastimenti tal-gwerra ġewwa l-Paċifiku.
Kien żmien diffiċli għall-ġenituri tiegħi li jerġgħu jisseparaw ruħhom minn xulxin. Iżda għal ommi, dak iż-żmien ta’ solitudni, inkwiet u inċertezza kien ukoll żmien ikkaratterizzat mit-tfesfis tal-Ispirtu li kellimha dwar wegħdiet eterni, faraġ u paċi f’ nofs il-maltemp.
Minkejja l-isfidi tagħha kolllha, ommi għexet ħajja rikka, mimlija hena, ferħ, imħabba u servizz. L-imħabba tagħha lejn is-Salvatur kienet riflessa fil-mod li bih għexet ħajjitha. Hija kellha rabta eċċezzjonali mas-smewwiet u don u kapaċità li tħobb u tbierek lil dawk kollha ta’ madwarha. Il-fidi tagħha f’ Alla u t-tama fil-wegħdiet Tiegħu huma riflessi fil-kliem tal-President Thomas S. Monson dwar it-tempju meta huwa qal, ”L-ebda sagrifiċċju mhu kbir wisq, l-ebda prezz mhu għoli żżejjed, l-ebda taqbida mhi diffiċli wisq biex inkunu nistgħu nirċievu dawk il-barkiet.”3
Fl-istaġuni kollha ta’ ħajjitha, Ommi ġiet imsaħħa u mbierka permezz tal-imħabba tagħha lejn il-Mulej u permezz tal-patti li b’ fedeltà hija wettqet u żammet.
M’hemmx dubju li d-dettalji tal-istorja tagħkom se jkunu differenti minn tagħha. Iżda l-prinċipji minn ħajjitha japplikaw għalina lkoll. Meta wlied Alla jiffukaw fuq it-tempju u l-patti sagri tagħhom, Alla jkun jista’ jibgħatilna l-barkiet Tiegħu b’ mod personali u b’ qawwa. Bħall-eżempju li tagħtni ommi, l-għażla tagħkom li temmnu u żżommu l-patti tħalli warajkom wirt kbir ta’ fidi għal dawk li jiġu warajkom. Għalhekk, għeżież ħuti, aħna kif nistgħu naċċessaw il-qawwa u l-barkiet tal-patti tat-tempju? X’ nistgħu nagħmlu issa biex inħejju għal dawk il-barkiet?
Tul il-vjaġġi tiegħi, tgħallimt li hawn aħwa nisa ta’ kull età, f’ ċirkustanzi differenti, li ħajjithom tipprovdi tweġiba għal dawn il-mistoqsijiet.
Jiena ltqajt ma’ Mary ftit wara li għalqet tmien snin. Bħal ħafna oħrajn, hija għandha fiha entużjażmu kbir biex twettaq l-istorja tal-familja u diġà kkontribwiet ’il fuq minn 1,000 isem għall-ħidma tat-tempju. Issa Mary tinsab titħejja għall-barka li tidħol fit-tempju meta hija tagħlaq 12.
Brianna għandha 13, u tħobb taħdem fuq l-istorja tal-familja u l-ħidma tat-tempju. Hija aċċettat l-isfida tat-tempju tal-Presbiteru Neil L. Andersen.4 Hija ħejjiet mijiet ta’ ismijiet għall-ħidma tat-tempju u, flimkien magħha, inkludiet lill-familja u lill-ħbieb tagħha biex flimkien iwettqu l-magħmudijiet. F’ din il-ħidma sagra, qalb Brianna mhux biss qiegħda ddur lejn missirijietha ta’ din id-dinja iżda wkoll lejn Missierha tas-Smewwiet.
Għalkemm Anfissa hija żagħżugħa mħabbta ħafna li tinsab tistudja u se tiggradwa mill-iskola, hija xorta waħda ssib il-ħin biex tattendi t-tempju kull ġimgħa. Hija tfittex ir-rivelazzjoni u ssib il-paċi hekk kif hija sservi fid-dar tal-Mulej.
Katya, oħt għażiża mill-Ukraina, għandha mħabba kbira lejn it-tempju. Qabel ma nbena t-tempju ta’ Kjev, hija u oħrajn fil-fergħa tagħha ssagrifikaw 63 siegħa fuq il-karozza tal-linja sabiex jattendu t-tempju darba fis-sena fil-Ġermanja. Dawn il-Qaddisin devoti talbu, studjaw l-iskrittura, kantaw l-innijiet u ddiskutew l-evanġelju waqt il-vjaġġ tagħhom. Katya qaltli, ”Meta finalment wasalna t-tempju, aħna konna ninsabu mħejjija sabiex nirċievu dak li l-Mulej kellu lest għalina.”
Jekk irridu nirċievu l-barkiet kollha li Alla qed joffrilna b’ tant ġenerożità, it-triq li aħna nieħdu fid-dinja għandha twassalna lejn it-tempju. It-tempji huma espressjoni tal-imħabba ta’ Alla. Huwa jistedinna lkoll biex immorru għandu, nitgħallmu minnu u nirċievu l-ordinanzi tas-saċerdozju neċessarji biex nirtu l-ħajja eterna miegħu. Kull patt isir wieħed wieħed. Il-Mulej jimpurtah minn kull bidla kbira fil-qalb. U l-bidla tagħkom tagħmel id-differenza kollha għalikom. Sabiex meta mmorru fid-dar imqaddsa Tiegħu, aħna nistgħu nkunu ”armati bil-qawwa Tiegħu, … ismu … fuqna, … il-glorja Tiegħu … madwarna, u l-anġli Tiegħu jieħdu ħsiebna.”5
Jiena naqsam magħkom ix-xhieda ċerta tiegħi li Missierna tas-Smewwiet jgħix. Huwa permezz ta’ Ibnu l-Għażiż, Ġesù Kristu, li tiġi fis-seħħ kull tama, kull wegħda u kull barka tat-tempju. Jalla jkollna fidi biżżejjed li nafdaw fih u fil-patti Tiegħu, jiena nitlob f’ isem Ġesù Kristu, amen.