Fin Kom Fah Eis Kunom
Sel Elder Jorge F. Zeballos
Ke Mwet Itngucul
Lwelah kuht in fahsr nuh met lutlut ke ip kunacsr, oruh sulaclah pwacye, mukwikwi fal nuhke sulaclah ingacn, ac insese ke luhngse luhn Pahpah tuhmasr
Nga yac na 12 matwac ke misineri elos sunyuc ke pacl se emet in luti ke siti ma nga isuslac we fin acn acir Chile. Sie Sacnri ac, tukun nga fahsr wi pracns srihsrihk se ke mahlwem ohnkohsr, oasr misineri se use nuh sihk puhret ah ke el pahsi kuhfa luhn Leum ah. Nga ngwetwacng nuh sel ac kahkahsrihk fahk, “Nga koflah.”
“Efuh in koflah?” el topuk.
Nga fahk nuh sel, “Ke srihpen nga tiac mempucr ke Alu se.” 1
Misineri sac tiacna luhlahlfongi. El lut na pwacye. Nga muh el nuhnkuh, “Tuh mukul fuhsr se inge wi miting nuh kwewa! Fuhkah tuh elan tiac sie mempucr ke Alu uh?”
Lwen tohkoh ah, misineri ac oasr lohm sihk ac, ac elos oruh ma nuhkwewa ma elos kuh in luti nohfohn sucu luhk ah kac. Tuhsruhk ke sucu luhk ah tiacna ke ah, na wi luhk muhkwena ke wik nuh kwewa ke alu ac puhs liki mahlwem ohnkohsr ah pa oruh misineri ac in puhla luhlahlfongi in fahsr na fahsr ah. Sahflahiyac ah, pacl wowo se emet nga tuhpan ah tuhkuh ke elos suliyuc in eklac sie mempucr ke Alu luhn Jisus Kraist ac. Misineri ah ahkuhtweyac nuh sihk lah ke nga srihklac uh, nga ac enenuh lwelah luhn ninac ac pahpah tuhmuhk ah. Nga wi misineri ac som in liye pahpah tuhmuhk ah, nuhnkuh lah top lal uh ac fah “Wen, ke kom ac matwac fal uh, kom fah kuh in oraclah sulaclah lom sifacna uh.”
Ke misineri ah sramsram nuh sel ah, nga pruhe na upac tuh insiyacl in moklweyuckyak tuh elan kuh in use nuh sihk lwelah nga kena uh. Top lal nuh sin misineri ac oacna ma ten inge: “Elders, ke mahlwem ohnkohsr somlah ah, nga liyacl Jorge tuhlihk mukul se nuhtihk ah tang na tuhkahkwack ke lututacng in Sacnri nuh kwewa, nokomwacng nuknuk wowo lal, ac fahsr nuh ke alu ac. Nga liye muhkwena moklweyuck wowo luhn Alu an ke moul lal uh.” Na, sramsram nuh sihk, el ahklutyeyuc ke el fahk, “Wen, fin ma kunom in pa sulaclah se inge, na kom kuh in eis lwelah luhk in pacptaislac.” Nga asruhi nuh sin pahpah tuhmuhk ah, ngokyac muhtahl, ac kuloh nuh sel ke ma el oruh ah. Lwen tok ah nga pacptaislac. Wik tari ac pa anniversary ahk 47pa pacl yohk srihpac se ingacn ke moul luhk uh.
Meac ma kunacsr ekihn mempucr ke Alu luhn Jisus Kraist uh? Prestuhn Joseph Fielding Smith el ahkuhtweyac ohinge: “Oasr lasr kunohkohn luhlahp luo inge. … Ma se met, in suk molwelah lasr sifacna; ac ahkluo, ma kunacsr nuh sin mwet wiyacsr uh.” 2
Ma inge, na, pa kunohkohn yohk ma Pahpah tuhmasr El sulaclah nuh sesr: suk molwelah lasr sifacna ac luhn mwet sahyac uh, ke kahlwem lah ke fahk se inge molwelah kalmeyac pa in sun luhpah fuhlwact wolacna ma Pahpah tuhmwacsr El use nuh sin tuhlihk ahkostwen Nahtuhl uh. 3 Kunohkohn inge ma utuckuh nuh sesr uh—ac ma kuht sukohsohk in eis uh—enenuh in ahkuhtweyac ma yohk srihpac lasr, kena lasr, sulaclah lasr, ac mukwikwi lwen nuh kwewa lasr uh.
Nuh sin sie mwet ma muhtwacwacack in kahlwem kac lah, ke srihpen Iwaclah luhn Jisus Kraist, moul ma pahtpaht uh pwacyena ah kuh in eisyuck, fuhlweack in tiac eis ac oacna misac ma pahtpaht uh. Ohinge, sielacna luhn molwelah pa misac ma pahtpaht, oacna siena luhn oraclah wo pa tiac oraclah. Prestuhn Thomas S. Monson el luti kuht lah “mwet uh tiac kuh in arlac puhla wo ke pacl loes ke pacl se elos liye lah oasr kuh lalos in eis wo liki.”4Na, kuht ac falkihn fuhkah kuhtwena ma srihk liki moul ma pahtpaht kuht fin etuh lah moul ma pahtpaht uh kuh?
Lwelah nga in akacsruhi ke ip yohk ahkosr ma kuh in kahsrwe kuht ahkfalye kena lasr in eis ma kunacsr nuh sin Pahpah tuhmasr inkuhsrao uh oacyacpac kahsrwe kuht topuk nuh ke lwelah Lal lah kuht eklac oacna El uh.
1. Lotwelah Kunohkohn Lasr
Kuht fin ac oruh kena luhn God, kuht ac oruh kunohkohn uh nuh Sel, kuht enenuh in muhtwacwacack ke lotwelah, kahlwem kac, eis, ac moulkihn fal nuh ke kena Lal nuh sesr uh. Leum El fahk lah mwet nuh kwewa enenuh in lotwelah kunohkohn lal ac orekma ke ohfohs lal ma pakpucki el kac ke oaru.5In eis kena in oruh ma suwohs uh tiacna fal kuht fin tiac liye ahkwoyac in kahlwem ke ma Pahpah tuhmasr El kena sesr ac luhngse kuht in oruh uh.
Ke sramsram kacl Alice ke Wonderland ah, Alice el tiacna etuh acn in som nuh we, oruh el siyuck sel Kihsrihk Cheshire, “Kom kuh in nuhnak muhnahs, fahk nuhj sihk, acn nga enenuh in som nuh we uh?”
Kihsrihk soko ah topuk, “Ma ingacn ac wiwi na acn kom ke som nuh we uh.”
Alice el fahk, “Nga tiac arlac elyah lah oyac.”
“Na tiac pacna elyah acn ngwac som nuh we uh,” kihsrihk soko ah fahk.6
Tuhsruhk, kuht etuh lah inkacnek soko ma kol nuh ke sahk soko ah, suc fahko kac uh yuc na pwacye in oruh sie mwet in engan”7—“inkacnek soko an, ma kol nuh ke moul”—ohsrihksrihk. Ac enenuh kuh yohk in fuhfahsryucsr ke inkacnek soko an, ac “suhpuhs mwet kuh in konwacack.” 8
Nephi el luti kuht lah kahs luhn Kraist fah fahkwack nuh sesr ma nuh kwewa ma kuht enenuh in oruh.”9Na el sifilpac fahk lah Nguhn Muhtahl fah ahkkahlwemye nuh sesr ma nuh kwewa kuht enenuh in oruh uh.” 10 Tuhsruhk, kahsruh ma lwelah kuht in lotwelah kunohkohn lasr uh pa kahs luhn Kraist ma kuht eis sin mwet pahluh mahtuh ac in pacl inge ac fwackyuck nuh sese sifacna ma kuht eis sin Nguhn Muhtahl uh.
2. Oraclah Sulaclah
Lah kuht lotwelah kuh tiac ke Fohlohkyak luhn wosasuc, na masap, kunohkohn ma kuhpahsr nuh ke kuhlwacnsap nuh ke sie pahng, kuh olwelah kuht oraclah lun tempuhl, kuht enenuh in oraclah sulaclah ke in mukwikwi fal kuh tiac ke etwacack sasuc sacn. Kais sie mwet sukohsohk in sulaclah nuh sel sifacna in utyak nuh ke sie olwelah muhtahl ma oacna pacptais kuh akwuck ke tempuhl uh. Ke srihpen oraclah fuhlahk pa sie ip wo fal ke moul in luhlahlfongi luhn mwet uh pacl somlah ah, masap mahtuh uh fahk lah “kowos in tiac kikiacp in fuhlahk ke inek.” 11 Ne ohinge, ke infulwacn pacl uh, Mwet Lahngo El luti sie inkacnek fuhlwact in liyacacng olwelah lasr ke El fahk lah ahok kalmeyac pa ahok ac moh kalmeyac pa moh. 12Kahs luhn sie mwet enenuh in fal in oraclah ma pwacye ac olwelah lal nuh sin sie mwet sahyac—ac finne yohk liki fin mwet se sahyac an pa Pahpah tuhmasr inkuhsrao. Ahkfuhlwactye sie olwelah uh ac eklac mwe ahkkahlwemye se ke ma pwacye ac suwohs ke kahs lasr uh.
3. Mukwikwi Fal
Tukun lotwelah kunohkohn lasr ac oraclah sulaclah ma weacng etuh ac kahlwem ingacn, kuht enenuh in mukwikwi fal nuh kac.
Sie srihkasrak fokoko ke nuhnak fokoko in sun olwelah Lal yurin Pahpah Tuhmwacl tuhkuh ke puhlakihnyuck luhn Mwet Lahngo ke in oruh sie mukul mas ke palsy in utuckuh nuh Yohrohl in unweyucklac. “Ke Jisus El liye lupan lulalfongi lalos, el fahk nu sin mwet ulsac, ‘Wen nutik, ma koluk loms nunak munas nu sum.’”13Kuht etuh lah Iwaclah luhn Jisus Kraist yohk srihpac nuh sesr in eis nuhnak muhnahs ke ma koluk lasr uh, tuhsruhk ke unweyucklac luhn mwet palsy sac sikyak ah, ma usrnguck yohk sac soenna sikyak;kweok luhn Mwet Lahngo Gethsemane ac fin sahksing tuh soenna sikyak. Ne ohinge, Jisus El tiac ahkinsewowoye muhkwena mukul palsy sac ke kuh in tuyak ac fahsr, tuhsruhk El oacyacpac sang nuh sel nuhnak muhnahs ke ma koluk lal, ke ma ingacn sang sie akucl kahlwem lah El fah tiac tahfonglac, lah El ac fah ahkfalye olwelah El oraclah yurin Pahpah Tuhmwacl, ac we fin acn Gethsemane ac fin sahksin El fah oruh ma El olwelah in oruh uh.
Inkacnek ma kuht sulaclah in fahsr kac uh ohsrihksrihk. Ke inkacnek ingacn oasr ma upac ma ac fah enenuh luhlahlfongi lasr ke Jisus Kraist ac kuh yohk lasr in muhtana ke inkacnek uh ac fahsr nuh met. Kuht enenuh in auliyak ac in ahkostwen ac mongfihsrwacsr, finne kuht tiacna kahlwem ke ohiyac nuh kwewa ma rauni kuhtlac uh. Kuht enenuh in nuhnak muhnahs nuh sin mwet sahyac ac moul fal nuhke ma kuht lotwelah ac ke sulaclah kuht oraclah uh.
4. Engan in Eis Kena luhn Pahpah
In mwet tuhma lutlut enenuh kuht in tiac luti muhkwena kunohkohn lasr, oraclah sulaclah suwohs, ac mukwikwi fal kac, tuh oacyacpac ma yohk srihpac pa ahkyohkye kena lasr ac kuh in eis kena luhn God, finne ma ingacn tiacna oacna kena suwohswohs kuh yohk emet lasr uh.
Nga fwefwelac ke ac luhngkihn mukwikwi luhn mwet lepa se ma tuhkuh nuh yurin Leum, “kwacfe yohrohl,el faksufi ac kwafe nu sel ac fahk, ‘Fin ou lungse lom kom ku in aknasnasyeyulac.”14Mwet lepa sac tiacna sapkihn kuhtwena ma, finne kena lal ah suwohswohs; el fihsrwacsr in eis kena luhn Leum.
Kuhtuh yac somlah ah sie siyacnyacn na kuhlwacng, yohk luhlahlfongi lac suc kawuck luhk tuh ahkinsewowoyeyuck ke tuhkuh luhn sie tuhlihk mukul elos kena liye pacl loes, suc elos pruhe kac ke pacl loeloes. Lohm sac sesseslah ke engan ke kawuck lasr inge ac tuhlihk muhtwacn se nahtuhltahl, suc pa tuhlihk sefanna sahyac nahtuhltahl ke pacl sac, engankihn tuhkuh luhn ahwowo mukul sasuc sac. Sie lwen ah, tuh, oasr sie ma tiac motkweyuck sikyak: tuhlihk mukul srihsrihk sac, suc yac tolu na matwac, sana utucklac nuh ke sie coma. Pacl se na nga lohngwack ma inge ah, nga pahngon kawuck se luhk ah in ahkkahlwemye ahkkweye luhk ke pacl upac sac. Tuhsruhk top lal ah sie lesin nuh sihk. El fahk, “Fin ma inge kena luhn Pahpah in esacl nuh Yohrohl, na ac wona sesr.” Kahs luhn kawuck se luhk ah tiacna nien kuhtwena tohrkahskahs, seahkos, kuh foloyak. Ma siena na pwacye, ma nga puhla muhkwena ke kahs lal an pa tarilacna nuh sin God ke lwelah elos in engankihn tuhlihk mukul srihsrihk se nahtuhlos an ke pacl fototo sac, oacyacpac kena yohk lal in eis kena luhn God nuh selos. Lwen ekahsr tohkoh, tuhlihk srihsrihk sac utucklac nuh lohm celestial sel.
Lwelah kuht in fahsr nuh met in lutlutkihn kunohkohn lasr, oraclah sulaclah pwacye, mukwikwi fal nuh ke sulaclah ingacn, ac lwelah kena luhn Pahpah tuhmwacsr.
Nga tarilacna ac engan ke sulaclah ma pahpah tuhmuhk ah lwelah nga in oraclah yac 47 somlah ah. Ke pacl uh somlah, nga tuhfahna kahlwem ke ohiyac el use nuh sihk—in eis kunac ke sulaclah se ingacn—kalmeyac in ma kunac nuh sin Pahpah tuhmuhk Lucng ac suk molwelah luhk sifacna ac luhn mwet wiyuck, ke ma ingacn eklac yohk oacna ke Pahpah tuhmuhk el kena ac luhngse nga in eklac nuh kac. Ke lwen na sacohk se inge, nga fahkwack ke luhlahlfongi lah God Pahpah tuhmwacsr ac Wen Kuloh Nahtuhl moul. Ke inen Jisus Kraist, amen.